علبة الديريكسيون والاسكاترا وحقيقة الامر

**sab3aawy** · 02-05-2009 11:46 PM

المشاركة الأصلية كتبت بواسطة aymanezze

اعتقد من الرسم اللى الموجود ان الصامولة دة موجود عند المقص اليمين .
ولا اية رايك وشكرا على معلوماتك المفيدة والمهمة .

حضرتك لوا وقف وشك للعربية من قدام، يعنى واقف امام الفوانيس الأمامية، ديريكسيون العربية هيكون على انهى ايد بالنسبة لك...اليمين (جربها وهتلاقى كلامى صح) ومع كدة احنا بنقول ان الديريكسيون شمال، والباب اللى جنبه(بتاع السواق) شمال ، والفوانيس اللى فى نفس الناحية شمال(لو الفانوس اللى ناحية السواق اتكسر وانت رحت لبتاع قطع الغيار وقلت له ادينى فانوس يمين وجيت تركبه مش هيركب، مع انه فى اللحظة اللى انت واقف فيها امام العربية هيكون على ايدك اليمين) وبرضه العجلتين اللى ناحية الديريكسيون اسمهم شمال قدام وورا، والمساعد اللى راكب على الاطار اللى ناحية الديريكسيون اسمه المساعد الشمال، ومثله تماما المقص بتاع الاطار اللى راكب ناحية الديركسيون ، اسمه مقص شمال، كل ما هو ناحية السائق اسمه شمال، مع انه يقع على ايدك اليمين لو انت واقف امام السيارة، نفس الفكرة، لو تخيلنا ان السيارة شفافة وكل اللى جوا حوض الموتور باين ، لو انت واقف قدامها هتبقى شايف علبة الديريكسيون بنفس الوضع اللى قدامك فى الصورة ده كدة، صامولة الريجلاش فى الناحية اللى على ايدك اليمين لكنها تحت كرسى السائق فى شمال السيارة، لانه ببسطة راكبه فى نفس النقطة اللى بيلتقى فيها عمود طارة الديريكسيون بعلبة الديريكسيون، وزى ما انت عارف ان عمود الطارة جاى من الطارة اللى فى الشمال(باعتبار اننا فى مصر حيث السيارات عجلات قيادتها على يسار السيارة) يبقى المقص اللى عندها هو المقص الشمال...وللا ايه رأيك

**Abdo_Eldesokey** · 14-05-2009 08:55 PM

الصراحة يا بشمهندس سبعاوي ... كلامك كله كنوز بجد ...

مفيش كلمة مفهاش استفادة ... ربنا يزيدك ويباركلك

أنا إن شاء الله هجرب الموضوع عندى في التويوتا وأحاول أصوره إن شاء الله

بس سؤال ... هل هناك ضرر من تكرار الموضوع ده ؟

والمسمار بتاع الرجلاش ده مقاسه كام ؟ ولا بيتعمل ببنسة ؟

**sab3aawy** · 14-05-2009 09:51 PM

المشاركة الأصلية كتبت بواسطة Abdo_Eldesokey

الصراحة يا بشمهندس سبعاوي ... كلامك كله كنوز بجد ...

مفيش كلمة مفهاش استفادة ... ربنا يزيدك ويباركلك

أنا إن شاء الله هجرب الموضوع عندى في التويوتا وأحاول أصوره إن شاء الله

بس سؤال ... هل هناك ضرر من تكرار الموضوع ده ؟

والمسمار بتاع الرجلاش ده مقاسه كام ؟ ولا بيتعمل ببنسة ؟

فى معظم العربيات اللى قابلتها كان 24 ، لكن هذة ليست قاعدة، عموما انا فى العربية الشاهين كنت بعمله ببنسة عادية جدا وبدون النزول تحت العربية لكن بمجرد الأنحناء بجانب العجلة اليسرى لأن المكان كان واسع بما يكفى، لكن فى العربية النسيان الأمر بيستلزم رفع السيارة والنزلو تحتها واستعمال كلابة رباط رفيعة او مفتاح بلدى 24 لان المكان ضيق للغاية، هى جننتنى علشان اعرف اطولها اول مرة، تكرار الأمر غير ضار بشرط انك تكرره لما تكون محتاج له فعلا، لأن انت ببساطة بتكررها كلما تآكلت الحشوه قليلا ، لحد ما يجيلها يوم وتخلص وتبقى محتاج حشوه جديدة، وفيه عربيات مافيهاش السترينر ده اصلاه، يعن مثلا العربية الماروتى بتاعة زوجتى مافيهاش، لذلك انت محتاج اولا تعرف عربيتك فيها وللا لأ، المكان لا يختلف من سيارة لسيارة دايما بيكون فى منطقة التقاء عمود عجلة القيادة بعلبة الديريكسيون ،

**aboezz44** · 16-05-2009 04:50 PM

بارك الله فيك يا مهندس سبعاوى

**Bishoy.Girgis** · 17-05-2009 01:04 AM

حضرتك يا باشمهندس سبعاوي ببتكلم في الموضوع ده من الموديل 2002 حتي 2008
هل الموضوع يختلف في الموديل 2009
شكرا

**sab3aawy** · 17-05-2009 09:21 AM

المشاركة الأصلية كتبت بواسطة largeman

حضرتك يا باشمهندس سبعاوي ببتكلم في الموضوع ده من الموديل 2002 حتي 2008
هل الموضوع يختلف في الموديل 2009
شكرا

نفس الكلام فى 2009، السيارة ميكانيكيا مافيهاش اى اختلافات عن الموديل السابق سوى امكانية اضافة بعض الكماليات الألكتروميكانيكة مثل الabs والebd

**ابو حسين** · 18-05-2009 05:54 PM

بارك الله فيك يا سبعاوي باشا

**eslamenan** · 11-08-2009 01:05 PM

المشاركة الأصلية كتبت بواسطة sab3aawy

نفس الكلام فى 2009، السيارة ميكانيكيا مافيهاش اى اختلافات عن الموديل السابق سوى امكانية اضافة بعض الكماليات الألكتروميكانيكة مثل الabs والebd

انا ليه اكتر من 10 ايام بادور عن الموضوع ده عشان اعرف فين الريجلاش ده ونزلت تحت العربيه اكتر من مره عشان ادور على الريجلاش ده عشان عندى دبه مع المطبات على الطريق السريع
لكنى للاسف ملقتش اى ريجلاش فى المكان المشار اليه فى الصوره الى موجوده فى اول الموضوع
المكان الى فيه الريجلاش الموضح مغلق بنفس معدن الاسكاترا مع العلم انا معايه موديل 2009 واستلمها اول الشهر الحالى 7-2009
ممكن يكون غيرو نوع الاسكاترا -- جايز - (ياريت حضرك تتاكدلنا من وجود الرجلاش فى الموديل الجديد)
بس هيكون ايه الحل طالما مفيش رجلاش
وشكرا ليك استاذ سبعاوى
م/ اسلام