الموضوع بقى مكرر
وقمة الإستهتار واللامبالاة بأرواح الناس
ومهما اتكلمنا وقلنا وعدنا .... "مفيش فايدة"
أنا عارف ان الكلام ده فعلا اتكرر على المنتدي كتير
وكل يوم أقرا موضوع مشكلة مختلفة مع سواقين الميكروباص بالذات لعضو بالمنتدى
لكن اللي حصل معايا النهارده حاجة فعلا مستفذة
وأنا رايح الشغل الصبح
وقبل مطلع الدائري (اليو تيرن اللي قبل المنيب)لقيت صاروخ ابيض في لبني معدي من جنبي "عكس الإتجاة" ومرة واحدة عدى الناحية التانية - اللي هي الحارة اللي انا ماشي فيها- وطبعا من غير ما يكلف نفسة ويبص في المراية
وكانت النتيجة اني مسكت فرامل وحودت يمين جامد لدرجة اني طلعت علي بواقي الرصيف اللي جنبي
والبيه إداني قفاه ومشي
قلت احصله وبالراحة أقوله انه ممكن يأذي نفسه ويأذي اللي حواليه باللي بيعمله ده
تخيلوا
لقيت الناس اللي في الميكروباص عمالين يزعقولي وكل واحد بكلمة ( ياعم خلص,قصر, اتكل على الله في نهارك ده . و ده كان كلام بعض الناس المؤدبة غير باقي الكلام اللي ماينفعش أقوله)
ماأكدبش عليكوا
انا رحت مزعق فيهم وقلتلهم : أصل انتو كلكوا عالم بهايم ! (من غلبي) وطلعت
فوجئت بالباشا بيجري ورايا وعمال يزنق عليا على مطلع الدائري وعمال يستحلفلي
وواحد من الزباين "المحترمين" اللي معاه راح رازع الإزاز اللي جانبي بإيده لما كان هايكسره
أنا هاديت وسيبته يمشي قدامي بمسافة معقولة
لغاية ماجيت قبل منزل الكورنيش "عند الكمين" وروحت جاي قدامة مباشرة ومدي انتظار ومهدي وانا مقرب منه خالص علشان مايعرفش يطلع مني لحد ما وقفته عند الكمين بالظبط في الحارة الشمال
وقعدت ادي كلاكس للبهوات اللي قاعدين جوه المكتب الألوميتال علشان حد ياخد باله ويطلع
راح السواق راجع بضهره ولبس في العربية اللي وراه وكسر يمين وجري
ملحوظة:_
ماحدش من ال"بهوات" اتحرك من مكانه على الرغم من اننا كنا وقفنا الطريق حوالي 5 دقايق
يعني الحمد لله ان السواق مشي !!!
أنا بقالي فترة بافكر جديا اني اجيب صاعق وأخليه في العربية للظروف دي
بس دلوقت الموضوع مابقاش مجرد تفكير , بقى قرار
عارف اني طولت عليكم
والموضوع مش جديد ويمكن اتكرر معاكم وأكتر من كده
بس انتو مش متخيلين انا مخنوووق قد ايه ومش عايز اتكلم مع حد
ف مالقيتش غير اني اكتب عن اللي حصل ولو انا الغلطان ياريت تقولولي
وشكرا لسعة صدوركم ,,,,