أرجو سرعة الرد اذا امكن

**محمد أنور** · 22-09-2007 11:17 PM

انا معايا لانسر 2007 بقالها سنة و كنت دافعلها 2000 جنيه تأمين قبل الاستلام من المصرية للسيارات فالمعادي.. والتأمين دة قرب ينتهي كمان يومين و المصرية للسيارات بيكلموني عشان اجدده و بيقلولي انهم هيعملولي خصم و هيكون ب 1600 جنيه
فالأخ hamada 2010 كان بيقول انه المفروض ان تأمين اللانسر 1300 جنيه.. فالكلام دة صحيح وللا ايه ؟ و لو فعلا صحيح يفضل اجدد عند شركة التأمين وللا المصرية للسيارات وللا مش هتفرق ؟

**Heshaam** · 23-09-2007 05:42 PM

ممكن حضرتك تبص الوثيقة معمولة تبع أي شركة تأمين وتكلمهم مباشرة وتشوف رسوم التجديد أد إيه؛ غالبا هتلاقيها أرخص لأن المصرية بتاخد عمولة في النص واللي يهمك هو شركة التأمين مش المصرية (أنا شخصيا عملت كده وكانوا بيتعاملوا مع مصر للتأمين بس مش متأكد لسه بيتعاملوا معاها ولا لأ)

يا رب أكون قدرت أفيدك وحاول تستمع لآراء تانية برده

**أبو_حمزة** · 24-09-2007 10:02 AM

طالما ما عملتش اى حوادث خلال السنة الأولى يبقى المفروض تأمين السنة التانية يكون 50% من السنة الأولى + شوية مصاريف ادارية
يعنى حوالى 1200 أو 1250
و الله أعلم

**محمد أنور** · 24-09-2007 03:50 PM

شكرا يا هشام و يا صباغ على الردود و على اهتمامكوا
لأ الصراحة أنا عملت حادثة من 3 شهور.. ف كدة الكلام هيختلف ولا اية فسعر التأمين ؟

**أبو_حمزة** · 24-09-2007 04:47 PM

المفروض يختلف بس اد ايه الله اعلم
كل شركات التأمين بتحتفظ بتاريخ المشترك و حسب تاريخه يتم تحديد قيمة التأمين
يعنى لما يبقى واحج روش و عمال يخبط فى العربية أكيد مش ها ياخدوا منه زى واحد محافظ على عربيتة عشان يحافظوا على ارباحهم
و لو وصل الأمر لحد معين من الحوادث (بيترجموها لفلوس) بيرفضوا التجديد
المهم انت تحاول تفاصل مع المعرض بقدر الامكان و ده ناس كتير بتعمله
ربنا يوفقك