حرامى تحت التمرين

**عزيز محمد** · 01-05-2009 11:23 PM

السلام عليكم ورحمة الله وبركاته

النهاردة ذهبت لصلاة الجمعة بمسجد الرضوان والذى يقع عند نهاية مترو مصطفى النحاس، ركنت عند المسجد ووضعت الشماسة ونزلت لأفاجأ بعد انتهاء الصلاة إن زجاج هواية الباب الخلفى الأيمن مدشوشة تماما، والعربية مفتوحة ومحتويات التابلوة متنطورة على الكراسى.

علشان تبقوا فى الصورة: السيارة هيونداى فيرنا الزجاج عادى مش فايميه والكاسيت اللى فيها هو كاسيت الفابريقة بتاع الشرائط، ومفيهاش أى حاجة ممكن تغرى اى حد إنه يكسرها ولا كان فيها شنة ولا هدوم ولا أى حاجة إطلاقا، ومع ذلك واحد قرر يودى نفسه فى داهية ويحاول يسرقها.

الحمد لله لم أخسر سوى ثمن شراء زجاج جديد وتركيبه (45 جنيه)، لكن ما يشغل بالى هو لماذا قرر هذا اللص اختيار سيارة ليس فيها ما يغرى بالسرقة وموضوعه فى شارع عام وأى حد داخل على الجامع هيشوفه والساعة واحدة الظهر. يعنى مفيش أى مبرر إطلاقا للمخاطرة.

أغلب ظنى إنه كان لص (تحت التمرين) لإنه رغم إنه فتح السيارة لكنه - والحمد لله رب العالمين- ما فتحش الكبوت وأخد البطارية، وكمان ما حاولش يفك الكاسيت - أنا عارف إنه ما يجبش فلوس لكن كان يبقى اسمه خرج من المخاطرة بحاجة - وكمان ساب شاحن الموبايل الموجود بالتابلوة.

بصراحة مش عارف إيه الدرس اللى الواحد ممكن يتعلمه من حركة زى دى - حاسس إنها حاجة عاملة زى قميس بست زراير وصديرى وكرافت مربوطة وجاكت ومع ذلك سرقوا الفانلة - غير إن الإنذار ما بقاش من الكماليات زى ما ممكن حد يكون متصور.

**EslaM_NagY** · 01-05-2009 11:37 PM

الحمد لله العربية مكنش فيها حاجة قيمة
بعد كدة الواحد يصلي برة في الشارع جنب العربية
تحيا مصر

**Terrible_DaRsH** · 01-05-2009 11:38 PM

ممكن كان عايز يعمل تست درايف و معرفش :)

الحمد لله انها جت سليمة .

**Drift_Lover** · 01-05-2009 11:48 PM

الحمد لله جت سليمه المره دي.
بس من الواضح جدآ انه كان بيدور علي فوس او موبايل او متعلقات شخصيه ذات قيمه... مش عاوز يقلب العربيه من الكاسيت او البطاريه...
وأكيد عربيتك مافيش فيها انذار مش كده؟.

**samirayad** · 02-05-2009 12:01 AM

اللى حصل ده أكبر دليل على أننى عمرنا ما حنتقدم .....طالما لسه فيه ناس متخلفه كده...........

_ طيب أيه العائد والمردود اللى أستفاده ......ولا حاجه ......دا حتى كان ممكن ينقبض عليه لأضراره بالغير ........

_ والصرحه أنا شايف أن العناصر دى ( وللأسف دول كتير ) من ضمن الأسباب اللى جايبانا لورا.........وعمرنا ماحنتقدم ولا حنشوف خير طول مافيه أمخاخ بتفكر بالشكل ده.............

**عزيز محمد** · 02-05-2009 12:04 AM

المشاركة الأصلية كتبت بواسطة Drift_Lover

وأكيد عربيتك مافيش فيها انذار مش كده؟.

فعلا العربية مفيهاش إنذار

**ابوهاشم** · 02-05-2009 12:10 AM

استاذ محمد ياريت تركب انذار
يعنى ممكن الحرامى يخاف لو حس ان العربيه فيها انذار
ممكن يفضحه
والحمد لله انه ماعرفش ياخد حاجه

**lancerevolution** · 02-05-2009 12:18 AM

أكيد مالوش فى سرقة العربيات أو كاسيتات العربيات يعنى ما بيعرفش يصرفها و أكيد كان بيدور على حاجة تانية تتباع بسرعة و تجيب فلوس كتير يصرفها على حقنة مخدرات