الموضوع: شىء غريب عجيب فعلا

السلام عليكوا
امبارح و انا ماشى بعربيتى (لادا 2107) كان غيار الفتيس على الثالث
المهم انى كنت سرحان شوبة و لما جيت انقل على الرابع مادستش دبرياج من غير ماقصد
الغريب ان العربية نقلت عادى خالص و الفتيس مازعقش و لا اى حاجة
بل كان فيه سلاسة غريبة فى النقل و حتى النتشة الطبيعية اللى فى النقلة ماحستش بيها خالص
بعد ما حكيت لصحابى على الموضوع ده قالولى انه عادى لو نقلت من ال3 لل 4 مش لازم تدوس دبرياج
المهم بقى انا الفضول خدنى شوية و قلت اما اجرب
ركبت العربية انهاردة و قلت اما اجرب الحكاية دى تانى ... المفاجأة انى نقلت من الثالث للرابع و برده عادى جدا و العربية كانت ناعمة جدا -على غير المعتاد مع اللادا - من غير حتى مالمس الدبرياج
الموضوع عجبنى قلت طب ماجرب انقل من الثانى للثالث
هديت العربية و جبت سرعة التانى و بعدين مشيت على شوية و عن RPM 3 و شوية كده نقلت للثالث من غير دبرياج و المفاجأة انه كان عادى جدا و ماحصلش اى حاجة
عجبنى قوى الموضوع و عملته مرتين كده من التانى للثالث بس جه فى مرة و مارضاش ينقل (او انا مارضتش اتعانف معاه )فدست دبرياج و جيت على نفسى شوية
المهم انه عادى جدا لما بنقل من الثالث للرابع من غير دبرياج و الغريب فعلا ان الغيار بيتم بنعومة و سلاسة جدا و لا كأنى راكب اتوماتيك حتى
السؤال بقى
هل الموضوع ده عادى فى العربيات كلها .... و لا ده حاجة فى اللادا .... و لا ده عيب فى الفتيس ؟؟؟؟ مع العلم ان الفتيس شغال عادى جدا الحمدلله
و السؤال التانى بقى
لو الموضوع ده عادى ؟؟؟؟ هلى هايأثر بعد كده على صندوق التروس و لا مالوش تأثير خالص .
لو اى حد عنده معلومات عن الحكاية دى يقولى يا جماعة اصل انا هاتجنن خلاص