حاجة غريبة فى البونتو الجديدة محيرانى

**احمد عزت** · 04-05-2009 11:05 PM

السلام عليكم ......من حوالى كان شهر وانا بفكر اجيب عربية زيرو وتكون معقولة فى السعر والكماليات .....ووقع اختيارى المبدئى على البونتو خاصة بعد سعرها الجديد غير ان سعرها القديم اصلا كان عاجبنى بردك ....بس اللى مخوفنى
اولا هبوط اسعارها المفاجأ
ثانيا العربية محترمة فى كل حاجة ظاهريا يعنى لما تركب العربية تحسها تقيلة كدة والتابلوة بالرغم من ان شكلة قديم شوية بس خامتة نضيفة اوى وكمان واسعة والدهان بالرغم انة خفيف بس الصاج محترم وكماليتها بردك كويسة جنوط وايرباج وزجاج كهربا وسنتر وباور كهربا وسيتى باور وفوانيس ممكن تغير ارتفاعها وفوانيش شبورة .......بس اللى مخوفنى ان الحاجات دة كلها ممكن تكون اى كلام فى اى كلام
يعنى الايرباج دة مكتوب بس انة ايرباج مش عارفين نوعة اة هل هوة اس ار اس زى اغلب العربيات ولا دة من التكنولوجى القديم اللى كان بيفرقع فى وشك وخلاص....والسيتى باور والباور نفسة دة هل لية مشاكل ولا لأ
الاهم من كدة الموتور اللى 1250 سى سى واللى بيقولو عنة مجازا 1300
كويس ولا سنتين تلاتة ويسخن ويطلع عينك
هل العربية دة اساسا فعلا معمرة كونها عربية اوربية ايطالية الصنع .....

طبعا انا مش متحامل على العربية بالعكس انا شايف انها صفقة مربحة .....بس لازم نحسبها صح يا جماعة الاول قبل ما نجرى على اى حاجة وخلاص.......

ياريت تشاركونى الرأى

**NaderNabil** · 05-05-2009 12:15 AM

أولاً السعر نزل لكذا سبب...أولهم قرب إنتهاء الموديل...و ده معناه ان الوكيل لازم يخلص الستوك اللي عنده بسرعه...و بأي سعر
ثاني حاجة المفروض ان معظم السيارات الأوروبية أسعرها نزلت في الفترة اللي فاتت...بسبب إنخفاض سعر اليورو...كل ده إنعكس علي سعر البونتو

دلوقتي حضرتك بتتكلم عن عربية بقالها 8 سنين ماشية في دول كتير جداً في العالم...و دول من العالم الاول كمان...مش عالم ثالث زينا...إذا لا خوف منها إطلاقاً...نفس الكلام بالنسبة للموتور

العربية فيها 2 إيرباج و انت خايف منهم....ليه؟ مافيش حاجة اسمها يضرب لوحده في وشك...و SRS معناها Supplement restraint system....و معناها مساعد لنظام الشد اللي هو حزام الأمان...مش نوع جديد من الإيرباجز ولا حاجة

...هاتلي عربية تانية فيها نفس الحاجات دي في الفئة السعرية دي غير ال السيريون ال 1000 سي سي و أزيد منها ب 5000جنيه

العربية دي بأمانة لو كانت بالسعر ده قبل ما أجيب البيكانتو ماكنتش إترددت لحظة و جبتها....و وداعاً للبيكانتو و الI10 الزيرو

**click** · 05-05-2009 12:22 AM

مشكور اخويا نادر

وهي عامله كام دلوقتي

**NaderNabil** · 05-05-2009 12:24 AM

65,900 جنيه مصري
العرض حتى أخر مايو أو نفاذ الكمية

**click** · 05-05-2009 01:11 AM

مشكور استاذ نادر

**amir** · 05-05-2009 01:27 AM

طيب ممكن الناس تفيدنا بخصوص اسعار الصيانات بالتوكيل و اسعار قطع الغيار؟
هو كان فيه موضوع عن قطع الغيار بس الموضوع لبونتو الشكل القديم هل الاجزاء كلها واحد ما بين القديم و الجديد و الاختلاف في شكل الكبوت و الفوانيس الاماميه بس ولا ايه
اصحاب البونتو برجاء الاهتمام لأني ان شاء الله هاشتري جديا خلاص اليومين الدول و مش عايز بعد ما اشتري اقول ياريتني جبت حاجه تانيه