الموضوع: سيفيك والا نيو سيراتو اس اكس

المشاركة الأصلية كتبت بواسطة CosmicOne

يارجالة عندى واحد قريبى معاه النترا جى ال اس (تكييف تتش) وبيبعها دلوقتى و محتار بين حجتين

New Cerato SX 116000L.E
Civic 2008 used 120000L.E

ممكن يفاصل فى سعر السيفيك شوية بس صاحبها طالب 120000

هوا محتار علشان السيفيك فيها اوبشنز اقل بكتير من السيراتو و السيراتو شكلها اجدد

انتوا اية رأيكو؟؟؟

مشكورين مقدماً :)

مبدأيا هوه طبعا يشتري سيفيك وموضوع انها مستعملة فدي موديل 2008 يعني كسر زيرو بس طبعا يفحصها في التوكيل ويتأكد انها معملتش حادثة أو ما شابه ، ولو تمام يتوكل على الله فيها ، حتة بقه أسباب الحيرة بتاعته وهي :
1 - الأوبشنز أكتر في السيراتو : مفيش حد يفضل عربية زي السيراتو على السيفيك عشان الأوبشنز ولا حتى الأوبشنز دي بتفرق في بيع بعد كده وكمان ، وبعدين تشتري عربية جودتها على بعضها كلها 50% عشان فيها اوبشنز أكتر ، وتسيب عربية حودتها اكتر من 80% عشان فيها أوبشنز أقل ، وبعدين مهما كان اوبشنز السيراتو ، انت في الآخر راكب سيراتو ، وحتى لو الأوبشنز اللي في السيفيك أقل فبردو انت راكب سيفيك ، وده وضع وده وضع تاني خالص ، ودي ركوبة غير دي خالص ، وبعدين الوبشنز حاجه حلوه وكل حاجه بس دي كماليات فمينفعش ابني عليها قراري واضحي بالأساسيات ، يعني يا يجيب عربية عالية الجودة وفيها كماليات كتير وييدفع فيها ، او لو ممعوش يبقة يجيب عربية عالية الجودة ويتنازل عن الكماليات الزايدة اللي هية اصلا مش فارقة اوي يعني ،
2 - موضوع الشكل ده بصراحة غريب جدا ، يعني ايه شكل السيراتو اجدد ، فيه حاجه اسمها أحلى مش أجدد ، وطبعا السيفيك شكلها أحلى بمراحل من السيراتو اللي حاولو اصلا يقلدو شكل السيفيك بس طبعا هيهات ، السيفيك اجمل بكتير من بره ومن جوه ،
وفي الأخر ايه معنى انه ينزل من النترا يركب سيراتو ، ما هو كده يبقى اصلا معملش حاجه والأتنين في نفس المستوى ، حتى الألنترا كمان الصالون بتاعها احسن منها بكتير ، والله الموفق

المشاركة الأصلية كتبت بواسطة mohammedsamirabdeen

برده حضرتك مصمم ان السيراتوا جودتها 50 في المية طب ماتقول عربية البطاطا اعلى منها في الجودة احسنمحدش قال ان السيفيك وحشة بس الكتيت كتيت وبعدين حد معاه سيفيك 2008 يبيعها ليه؟؟؟الله اعلم .....
السيفيك يا جماعة واسعة قوي بس فيها عيبيين
1 -قريبة من الارض جدا جدا
2- لازم وانت سايق ترجع كرسيك وراء علشان تشوف المراية اليمين طبعا مش مشكلة قوي
بس عموما السيراتو قديم وجديد عربيات محترمة وقوية وغنية باكاماليات وبها رفاهية عالية وعوامل ثبات وامان متطورة ولها توكيل قمة في الاحترام
ياما عربيات ياباني اسم بس وواخدة اكتر من حقها زي المازدا 3 مثلا ولا ايه راي حضرتك؟؟؟؟
بلاش الردود المتحفزة دي يا باشا وخلي الكلام في المعقول اسلوب حضرتك هجومي على الكوري وخاصة السيراتو وبعدين السيراتو مش هتخرج نهائي من المنافسة ان شاء الله

يعني هوه الهدف اننا ندافع عن وجهات نظرنا وخلاص حتى لو هنقلب الحقائق!!!!! ، ولا بنقدم العون والنصيحة لمن يطلبها ، وبعدين انت زعلان اني قلت جودة السيراتو 50% ليه ، ما انا بردو قلت السيفيك 80 % ، وطبعا دي ارقام نسبية ، والغرض بس منها اني اقول ان السيفيك اعلى في الجودة بفرق واضح وده بردو معروف ، ومش عارف هوه ده كمان فيه جدال بمناسبة ايه ؟؟؟ ومن الآخر كده السيراتو شريحة اقل من السيفيك وده معروف ، السيراتو في شريحة ( الانترا ، نيسان صني ، اوبترا،...) والسفيك في شريحة (مازدا3 ، كورولا ،امبريزا،اوكتافيا A5 ،...) ، أما المازدا 3 اللي انت بتقول اسم على الفاضي ، فواضح ان حضرتك على دراية اكبر من موقع whatcar وكل الريفيوز والتقيمات اللي خليتها سيارة العام سنتين متتاليتين وكل الناس اللي بتشكر فيها جدا ، ومنكم نستفيد

السيراتو ممتازة جودتهما مش 50% ولا حاجة!!..
و تشترى زيرو طبعا!

المشاركة الأصلية كتبت بواسطة mohammedsamirabdeen

مش هقول الا (يا قلبي يا كتاكت يا ما انت شايل وساكت) ؟؟؟؟؟؟؟؟؟؟؟؟؟؟؟؟
على فكرة المازدا3 المفروض تخرج من المنافسة جوه بلدنا
1 - غالية على الفاضي
2- توكيل سيء
3- قطع غيار نادرة وشاححه واحيانا بالطلب وناااااااااااار عندك مثلا الاكصدام امامي او خلفي ب 2400 جنيه؟؟؟؟؟؟؟؟؟؟؟
دي عايزة حساب مخصوص ليها في احد البنوك والجنيه غلب الكارنيه يا هندسة!!!!!!!!!!!!!!
على العموم سعدتك ماتزعلش احنا مقولناش السيراتو اسطورة لكن ممكن نقول وكام من تلميذا فاق استاذه!!!!!!!!!!!

يا عم ارحمني بقه ، انت سبت الموضوع ومسكت في المازدا3 ليه؟ مديقاق في ايه وتلاقيك اصلا عمرك ما ركبتها حتى ، عشان لو ركبتها هتعرف يعني ايه مازدا3 ؟
- وبعدين غاليه على الفاضي ايه ؟ طب قول حتى حاجه تنفع تتقال ، العربية دي لو توكيلها مركز فيها كنت هتلاقي اعلى فئة اللي 145000 ب 180000 او اكتر ، بس عشان كلها خليجي سعرها نازل كده ، وشوف السيفيك نفس فئة المازدا اللي ب 145000 هتلاقيها ب 185000 وعلى فكره المازدا3 تقييماتها اعلى من السيفيك سواء في موقع Whatcar ( المازدا3 اربع نجوم والسيفيك تلات نجوم ) ، وكمان معظم الريفيوز وتقييمات المستخدمين بترجح مازدا3 ، يعني اصلا سعر المازدا3 عندنا في مصر اقل من الطبيعي بحوالي 30000 او 40000 جنيه ،
- قطع الغيار غالية ، معاك بس مش فرق كبير عن السيفيك وجيتا وغيرهم ، لكن مش شاحة زي ما بتقول وموجودة في اماكن كتير وكمان معمرة جدا ، وهيه اصلا غالية عشان كده لأنها ياباني 100% ومفيش ليها قطع غيار تقليد زي باقي العربيات ، يعني هتلقيها في الأخر اوفر واريح ،

ويا ريت بس بلاش تقعد تقول كلام غير كل الدنيا وتقلب حقائق وخلاص ، لمجرد اني بشكر في مازدا3 او معجب بيها وطبعا مش انا لوحدي يعني ومشوفتش حد الا وبيشكر فيها جدا ، فخليك بقى منطقي شويه، وبجد اصلا الجدال بقه عقيم وغير منطقي ، وريح دماغك يا عم ، المازدا3 والسيفيك عربيات تعبانة واي كلام ، والسيراتو عربية تمام واللي عاوز يشربها يشربها بالهنا والشفا ، وعلى فكره انا مش هرد في موضوع بيقارن بين سيراتو وبين حاجه تانية عشان موجعش دماغي لأن الحوار بيقلب جدال وانا بيكون كل هدفي النصح مش اكتر ، واللي يحط السيراتو في مقارنة بينها وبين سيفيك او مازدا3 او اوكتافيا او العربيات اللي في مستواهم واللي اصلا مينفعش يتقارنو بيها ، يبقى احسن عقاب ليه انه يشتري السيراتو !!!