اكيد طبعا مفيش زعل:049:
لانها مداعبة بس مش اكتر ولا تحريض علي كدة:biggrin:
وبرضة بحبك يا مصر ( مصر البلد الطيبة الناس الطيبين بس)
عرض للطباعة
احنا خسارة فى البلد..ولا البلد خسارة فينا..
ممكن اعرف الموضوع دة راح فين..........هو المنتدى ابتدى يحذف المواضيع المهمة .......انا ملاحظ ان ما حدش عارف يعبر بحرية .........
ياريت المشرفين يقولولى الموضوع راح فين .........مكتوب منقول .........طيب اتنقل فين........
انا كدة هابتدى اتخنق........دى حريتنا واحنا ماغلطناش فى حد.....علشان مالقيش الموضوع ......
انا عايز اعرف الموضوع دة راح فين............؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟
والكلام موجه للمشرفين وللادارة...........
أنا عن نفسي بموت في حاجة اسمها مصر و مستعد اضحي بأي حاجة عشنها.
محدش يسألني ليه بس انا أهلي ربوني على كده بلدك دي بعد دينك و من الآخر مصر دي في دمي مقدرش أكرهها , العيب مش فيها العيب في الناس اللي عايشين فيها.
أنا كلمة بكره مصر دي بتعصبني من أمتى حد بيكره أرضه و بلده هي عملتلك ايه , كون أن انت مستسلم لحد تاني يقرفك في عشتك ده مش ذنبها ده ذنبك انت روح اكره نفسك الضعيفة.
بحبك يا مصر
انا اظن ان اكتر حاجتين نقصينا ومخليه الواحد دايماً سلبي هما ( الرضا - التفائل )
1- الرضا بكل حاجة حوالينا وكل حاجة ربنا ادهلنا والاقتناع ان كل واحد عايش في احسن حالة ممكن يكون فيها ...
2- التفائل : ان مهما الوضع كان سئ وكان الواحد بيقابل مشاكل فحييجي يوم كل المشاكل تتحل والدنيا حترجع تضحك تاني وان دوام الحل من المحال يعني مفيش حد عايش في مشاكل على طول ومفيش حد عايش في فرح على طول...
معلش بقى سمحوني في الكلمتين اللي جايين دول ...
وقلولي لو انا غلطان...
مش من المفروض ان نلاقي اي شكوي من حال البلد او حال الدنيا باذات في المنتدى هنا عارفييين ليه ...؟ حقولكم..
1- بما انك بتشارك معانا فده معناه انك عندك كمبيوتر او لاب توب واكييد عندك انترنت ...!! واكييد اكييد عندك موبايل ... صح..
واذا كان عندك شوية الرفاهيات دي فأنت اكيييد عندك كل الاساسيات... يعني مستورة والحمد لله.... يعني بتبات في بيت مش في الشارع.. يعني بتلاقي حته تناف فيها - وعندك حنفية بتنزل مياه - وعندك ثلاجة - وبوتاجاز ..... وانت فاهم الباقي..
2- بما انك داخل على منتدى سيارات فده معناه انك عندك عربية - او بتفكر تمتلك عربية... يعني اكييد بتشتغل شغلانة كويسة ممكن توفرك تمن العربية... دليل برضة على ان الحال ميسور والحمدلله.. ربنا يزيد ويبارك... قول امين..
طيب عاوز ايه اكتر من كده.. بتشتكي ليه... ...
ارجوكم متزعلوش مني بس انا عاوز اعرف ليه الواحد بيبص للي مش عنده ويقول انا معنديش... طيب ما تبص للي عندك وتقول الحمدلله ربنا يدمها نعمة..
وشكراً
مش هقدر ارد بكلام احسن من كده
أنا مصرى إبن مصرى وليا الشرف
برغم المهانة برغـــــــــــــــم القرف
برغم الزبالة اللى مالية الشــــــوارع
برغم الفســـــــــــاد اللى بيه أعترف
سمو معـــــــــــــــالى رئيس الوزارة
نتيجة موظف بسيـــــــــــــط انحرف
برغم المجاعة اللى داخلين عليهــــــا
وفينا اللى عـــــــايش حياته فى ترف
برغم البطــــــــالة فى أوضة وصالة
برغم أن أخر جنيـــــــــــــه اتصرف
برغم طـــــــــــابور الصباح السخيف
وكل منايا يادوب كــــــــــــــام رغيف
برغم أسايـــــــــا لمنظر عشايـــــــــــا
وأقول مش مهم يــــــــــا واد نام خفيف
برغم إنى شايف بــــــــــلاوى وساكت
وعايش مطنش كـــــــــــــــــأنى كفيف
برغم حكومة شعـــــــــــــارها الكلام
ورغم رئيسنــــــــــــــــا عليه السلام
ورغم أن كله يــــــــــــــا عالم بيغلى
إلا كرامتى بترخص قــــــــــــــــوام
برغــــــم إنى عايش في بلدى فريسة
ووجبة شهية لبعض اللئـــــــــــــــــام
برغم أن كـــــــــــــل تاريخك يا بلدى
فعهد جنابه كـــــــــــــلام فوق رخام
برغم ده كله يــــــــــــا مصر بحبك
وطـــــظ فيهم وده آخر كــــــــــــــلام
مهم إننا نتفق الأول يعني إيه مصر.....
- بلد في الكرة الأرضية ؟؟؟ يعني مساحة من الأرض و فيها نهر و على بحرين و فيها أهرامات و كدة ؟؟؟
- ولا شعبها....إلي في الحضر أو الريف و ثقافته و معتقداته و عاداته؟؟؟؟
- ولا مكان بنعيش فيه....البيت و الشارع و المدرسة و الشغل و المصيف و المستشفى و الجيران و القانون و القهوة و السوق و الاسعار.....؟؟؟
أنا عن نفسي......هجاوب عن الأسئلة بناءا على التعريف التالت .... و ده طبعا معتمد على أنا ساكن فين و حالتي إيه....خليني أقول إني عايش في القاهرة و حالتي متوسطة.....مستور زي ما بيتقال ......
عادي.....كل واحد حر في رأيه.....و من حق أي حد إنو يكرها أو يحبها ..... طيب أنا كا واحد غريب عن ليبيا.....مبحبش ليبيا.... ولا أحب أعيش فيها ولا أتعامل مع أهلها.....هل ده معناه إن أي واحد ليبي لازم يضايق من كدة؟؟؟؟
ببقى زعلان......عشان الشعب بيفرح أوي....زيادة عن اللازم......و بينسى الزفت إلي إحنا فيه.....على مستوى البلد أو على مستوى الأمة كلها .....
بزعل جدا.....عشان لو كان أعد في مصر مكانش هيطلع .....أحمد زويل مثلا.....لو كان فضل أستاذ في جامعة إسكندريه كان زمانو دلوقتي واقف في مظاهرات الأساتذة عشان زيادة الكادر!!!
و لو عالم مصري طلع.....ف كم واحد كان ممكن يطلع و مطلعش؟؟؟؟؟
و عموما ده شئ طبعي إن أي شعب يطلع منه علماء......أكد حد هيطلع ذكي .....
بالنسبة لرأفت الهجان.... بأول كويس إن مخابرات مصر عرفت تنظم عملية زي دي.....ساعدت في الصراع مع اليهود.....و حررنا سينا......بس بحس إن ربنا مش مبارك في التعب ده .... لحد النهاردة سينا عبارة عن صحارى.....ماعدا الشواطئ طبعا.....إزاي تلت مساحة مصر و مفهاش مدن سكنية كبرى زي إسماعيلية و السويس؟؟؟
و بالنسبة لي عبد الناصر.....مابحبش سيرته ...... كان عاطفي أوي ..... و ناس كتير تعذبت و ماتو ف المعتقل أيامه.....و فيلم إحنا بتوع الأتوبيس ده حصل كتير ..... كفاية إن النكسة حصلت في عهده ......
بحلم بي اليوم إلي نفتح فيه أراضيهم و يبقو مش أعدائنا.....و إن شاء الله اليوم ده جي....
عادي....بروتوكولات و مظاهر.....الحب مش بي العلم و الأناشيد
بتأكد أد إيه مصر بلد جميلة جدا (التعريف الأول) ......و أد إيه كان عايش فيها ناس سايبين أثار جامدة ...... و أد إيه إحنا بي نضيعها و بي نهرب فيها !!!
بابداء أستعد عشان أواجه غلاسة و تطفل الشيال إلي مصر يشيل الشنطة الوحيدة إلي معايا.....ده غير قرف الجمارك و الجوازات.....
عادي ... رحمة من ربنا ..... مش حاجة أحب مصر عشانها ......
أكيد ببقى مشدود و متحفز......عشان لو ده حصل لازم نشوف إزاي نجاهد .... و نحمي أهلنا و ممتلكاتنا.....
أنا رأي إن الحب مش بي الانفعال و الشعر و كدة ......
الحب لازم يتوجه صح....عشان يبقى طاقة بناءة.....
يعني مثلا.....إن أشوف الحقيقة و السلبيات بواقعية.....ده بداية إن يكون ف أمل ل الإصلاح ..... حتى لو هيجي بعد قرون .....
لكن أقول كفاية كلام في سلبيات و أنا بحبها مهما حصل .... مش ده إلي يحل مشاكلها.....بالعكس دي تزيد ......
و ف النهاية .... أنا بكره مصر من كل قلبي (التعريف التالت).....و شايفها بلد سيئة جدا ......
و شكرا على الموضوع المتميز ......
الادارة بردة ماردتش عليا ...........الموضوع بتاعى راح فين؟
طيب أنا بحب مصر .
بس أيه مصر ؟؟؟
مصر هي المجتمع اللي الواحد أتربي فيه و أتعلم و عايش بيأكل من خيره .
و كل ده له واجبات اللي هي الأمانة لهذا المجتمع و الأخلاص له .
و مينفعش بالكلام بس .
أخلاصي للمجتمع بيتمثل في شوية حاجات أهمها .
أني أحافظ على نظافة المكان اللي أنا عايش فيه بقدر الأمكان .
منفعة المجتمع اقتصاديا ..... يعني مثلا تشجيع الصناعة المصرية الجيدة ....... و الأمتناع عن شراء المستورد .......
الحفاظ على الشارع و ما فيه نظيفا و في حالة جيدة ؟
-----------------
نيجي بقى لمعنى الوطن .
أي وطن في الدنيا هو اللي يوفر لأولاده حياة كريمة
طيب يعني أيه وطن .
وطن يعني
أرض + شعب + حكومة
و هنا مصر هاتبقى الأرض و الشعب و الحكومة هما العاملان المكملان لكلمة وطن .
و هنا الشعب في أعداد كبيرة منه لسة عايشة بعقلية 200 سنة فاتوا ........ و الحكومة مش بتعمل اللازم علشان تنور عقول الناس دي .
و بالتالي .....
الناس هي اللي بتنكد على نفسها حياتها .
زي الراجل اللي طلع للوزير في الشرقية يقوله انا عندي 13 عيل .........
طيب هو الوزير ماله ........ هو الوزير هو اللي خلف ال 13 عيل و لا الراجل هو اللي أختار كدا ؟؟؟؟؟؟؟؟؟؟؟؟
ده مثال بيبين أن مش الحكومة لوحدها هي المسئولة عما يحدث للناس .
و لكن هذا لا يبرئ ساحة الحكومة .
و في النهاية مصر بلد جميلة و لكنها ليست الأجمل .
و الشعب المصري شعب طيب و لكن ليس وحده الطيب في العالم .
و الشعب بيحب يخدم و برضه مش لوحده اللي بيحب يخدم .
علشان بس أحنا بنقعد نصدق كلام الاعلام ....
كل الناس بتحب تساعد ........ و يمكن كمان فيه ناس عندها الموضوع ده أكتر من المصريين .
و الأمثلة كتيرة لو عايزين و أمثلة من خبرة حياتية مش من التليفزيون .
لازم نفتكر أن الكرة الأرضية فيها حاجة أسمها بني آدم و كلهم من أب و أم واحد ة ......... يعني كلنا أخوة في الأول و في الأخر .