الموضوع: جولف "3"

سورى يا جماعه هى جولف 3 مش جولف 2 وهى اول يد من الزيرو وبها ساوند سيستم كامل
مستنى ردودكم ومشاركتكم بسرعه عشان العربيه واقفه على نصايحكم ليا
اخوكم كيوبيد

المشاركة الأصلية كتبت بواسطة qupid_forever

سورى يا جماعه هى جولف 3 مش جولف 2 وهى اول يد من الزيرو وبها ساوند سيستم كامل
مستنى ردودكم ومشاركتكم بسرعه عشان العربيه واقفه على نصايحكم ليا
اخوكم كيوبيد

العربيه على اللي انته بتقوله ده تبقى تحفه.. بس عايزك تاخد بالك من كام حاجه كده:

· ملكش دعوه بموضوع الفواتير ده خالص و متدخلوش في حساباتك بس طبعا لو الجنزط بي بي اس تبقى ممتازه... و لو الموتور 2800 سي سي و سليم يبقى تحفه.
· طبعا الموتور ال 2800 سي سي ده هيكون آداؤه رائع و فعلا هيه دي المواتير اللي مناسب ليها الفتيس الاوتوماتيك... بس هل انته مستعد لبنزين موتور 2800 سي سي؟
· ركبلها اير باج ازاي و فين؟؟ لو فيها اير باج في الغالي هيكون فيها من الأول.
· بيعملها صيانه فين؟ و هل فيه مكان معين بيجيب منه قطع الغيار؟؟ قصدي مكان في مصر طبعا.
· لو لقيت اجابات ترضيك على كل الاسئله دي لازم تكشف على العربيه كويس جدا جدا و يستحسن يكون الكشف ده في التوكيل.

ان شار الله حد من زملائنا في المنتدى هيرد عليك في موضوع السعر.

ربنا يوفقك في الاختيار.

اولا مش عارف اقولك إيه على اهتمامك بموضوعى والرد عليا
بس فى شويه حجات عايز اعلق عليها
1_من ناحيه البنزين يعنى هتستهلك بنزين اد إيه هو حتى بالتقريب
يعنى هتخرب بيتى مع العلم إنى طالب فى الجامعه واكيد باخد مسروف
او بمعنى اصح هيكون الفرق فى البنزين كبير وملحوظ.
2_فى حجات كتير بيقول كانت جايه من المانيا عشان اخوه هناك وحكايه الصيانه قالى إن فى واحد مخصوص مش بيوديها غير ليه وقالى طبعا لو هخد العربيه هيعرفنى بيه عشان كويس جدا وهو مش بيستريح غير ليه وكمان عشان مش بيأمن لى حد غيره .ونصنى لو خدت العربيه مش اوديها انا كمان غير للميكانيكى دا.
3_انا اعرف ميكانيكى كويس اوى وكمان ناوى اجيب سمكرى غير إنى طبعا هرفعها فى بانزينه للكشف يعنى هجيب عليها واطيها لحد ما اطمن ........بس حكايه إنى اكشف عليها فى التوكيل ...
يا ترى من رايك هيوافق و يا ترى فين التوكيل وتتكلف حكايه التوكيل دى كام حتى ولو بالتقريب ........
كده بجد اكون شاكر اوى لو جاوبتنى على اسالتى دى
واكيد مستنى ردود باقى الاعضاء إخواتى الباقييييين
وبكرر يا جماعه يا ترى عربيه بالمواصفات دى تكون بكام مش عايز اتخم هو قالى مبلغ وانا قلتله مبلغ بس عايز اسمع منكم
بجد يا ريت تقوليولى على المفيد وتنصحونى
متشكر بجد بس حاسس إنى بسأل إخواتى بجد
الموضوع متوقف لغايه ما اسمع منكم ارائكم على العربيه وكمان سعرها
بس خايف تروح لو كانت لقطه فعلا
اتمنالكم التوفيق
كيوبيد

السلام عليكم

بص يا باشا هوة انا حقولك على الى انا اعرفة بالنسبة للسعر

انا كنت شفت على النت عربية جولف 4 معروضة للبيع و كان فيها جنوط سبور و موتور 2800 برضة و كانت ب 97 الف على ما اتذكر

و بصراحة برضة مش عاوز اديك سعر للعربية دية علشان بصراحة معرفش و ممكن اديك سعر و يكون غلط

و بالنسبة لأستهلاك البنزين اكيد حيبقى عالى و بالزات لو انت حتسوق بقى قيادة رياضة :D ( موتور 2800 على عربية صغيرة حيغريك انك تجرى :lol: بس خد بالك من السرعة ) و كمان اوتوماتيك بس فى المقابل حتاخد اداء عالى :) و انا د
ورتلك على النت و لقيت الأستهلاك بتاع البنزين اهه

City: 11.7 l/100 kms (20 mpg)
Hwy: 7.6 l/100 kms (28 mpg)

و دة المصدر

http://www.canadiandriver.com/testdrives/99vw_gti.htm

فى الأغلب هوة دة الموتور الى متسقط 2800 سى سى V6 صح ؟

و ياريت تسأله هية بتاخد بنزين 90 او 92 عادى ولا لازم 95 اصل فية عربيات حديثة مينفعش اقل من 95 و الا حتلاقيها بتكركر و ادائها ضعف و طبعا لو لازم 95 يبقى خراب بيوت :D ( اعتقد انها ممكن تاخد 92 عادى بس اسأل برضة علشان تتأكد انا بصراحة معرفش )

و ربنا يوفقك فى شراء العربية و هية ما شاء الله تحفة على كلامك :)

و على فكرة استهلاك البنزين عالى جدا هوة نفس استهلاك بنزين الهامر H3 تقريبا الى هية 3700 سى سى

و مكتوب

Average mpg 20.5

المصدر

http://www.whatcar.com/car-review-co...9&ED=51436&U=0

و الجيب شيروكى ال 3700 سى سى

Combined Fuel Consumption 23.2 mpg - Automatic

المصدر

http://www.carpages.co.uk/guide/jeep...v6-limited.asp



انا بس بقولك علشان متشتريش و بعدين تددبس مش علشان حاجة والله و لو حتستحمل استهلاكها يبقى توكل على الله هية ممتازة جدا ما شاء الله كمواصفات و كماليات

طب سورى انا مش فاهم حاجه من
City: 11.7 l/100 kms (20 mpg)
Hwy: 7.6 l/100 kms (28 mpg
يا ريت حد يفهمنى
كيوبيد

City: 11.7 l/100 kms (20 mpg)

يعنى فى المدينة بتستهلك حوالى 12 لتر لكل 100 كيلو

Hwy: 7.6 l/100 kms (28 mpg

و دة معناه انها بتستهلك حوالى 8 لتر لكل 100 كيلو فى الطرق الطوالى او السفر

و طبعا الأستهلاك دة اقل حاجة يعنى فى العادى بيبقى اعلى

طبعا متشكر اوى ل فهد واحمد على نصايحهم ليا ومعلوماتهم
بجد انا حاسس إنى بتعلم وبستفيد معلومات من إخواتى
عموما يا جماعه الظاهر إنى مش كان ليا نصيب فى العربيه
إتباعت إمبارح على 63000
وطبعا ربنا يبارك للى اشتراها
بس اكيد هحتاج استشارتكم فى اى عربيه الاقيها مناسبه
وخيرها فى غيرها والحمد لله على كل شى
اشوفكم على خير
كيوبيد