الموضوع: جهاز كاسيت سيارة لا يحتوي إلا على فتحة Usb وفتحة كارت ذاكرة وفتحة Aux وبه راديو

المشاركة الأصلية كتبت بواسطة smartghost911

محتاج مساعدتكم يا شباب فى تحديد كاسيت يكون مناسب لإحتياجاتى و سعره معقول
أنا عايز كاسيت يكون بيشغل ديجيتال ميديا و بس يعنى أغانى من على فلاشة أو من على الموبايل أو حتى ميمورى كارد
يعنى مش حابب يكون فيه سيديهات أو كاسيت لأن مع المطبات الحاجات دى بيبقى مشاكلها كتير و أنا مش بحتاجها
أهم حاجة يكون صوته واضح و نقى مش شرط يكون عالى أو كده بس يكون بيطلع صوت صح

طبعا أفضل لو ماركة أو على الأقل مجرب ..


dst من ارخصهم ب 220


مساعدة تانية (تقلت عليكم) أنا فى واحد ثقة عارض عليا سماعات بيونير 6*9 400 وات رقم موديلها ts-a6972e
معنديش فكرة سعرها كام .. هى جديدة فى كرتونتها و لم تستخدم إطلاقاُ ..
يا ترى أجيب دى ؟ و أدفع فيها كام ؟ و هتنفع على أى كاسيت أركبه؟

ملحوضة أخرى قد تكون ذات جدوى عربيتى لانوس

هكون ممتن جدا لكل مشاركة

بالنسبة للسماعات اسال حسام كوداك اكتر واحد هيفيدك

بجد موضوع هايل بجد جدا و كبير اوى واعضاء فى منتهى الجمال والزوق والاحترام ومفيش احلى من كدة
بالرغم انى قريته من اوله لاخره فى ساعه ونص عشان اقدر اتواصل معاكم بس استمتعت بالحوار اوى بين الاعضاء
وانا هنزل يوم الخميس بأذن الله هجيب كاسيت جديد DST
واجيب سماعات بردة عشان السماعات عندى خلاص ودعت
وانشاء الله اول ماجيبه هاقولوكوا على التجربة
وانا عندى ايكوليزر لو هوا احتاج تشغيل ايكوليزر
مع انى عندى كاسيت سونى شرايط قديم شويه كان والدى جايبه من روسيا وشغال تمام وشغلته بس كل شويه اوديه بتاع تصليح كاسيت عشان التروس بتاعته وانه لازم احط قطنة او منديل على الشريط من جوه عشان يلف مع الترس ومواااااااااال كبير اوى كل اسبوع

بس الحمدلله لقيت الحل ويوم الخميس انشاء الله هنزل اجيب كاسيت

تقبلوا تحياتى

بصوا يا جماعه انا هقول تجربتى انا قريت كل المشاركات وكنت ناوى اجيب ال dts اللى انت بتقولوا عليه بس بقدرة قادر نزلت التوفيقيه وبصراحه ما استريحتش ليهم خالص تحس ان معظمهم نصبين وبيغلوا الحاجه ومعرفتش اوصل لمحل ارخصهم المهم روحت شارع الازهر لاقيت الناس اسعارها موحده وزى بعضهم وكلمتهم واحده جيبت كاسيت اسمه متسوبيشى مش فاكر رقمه كام بالظبط تقريباً اسمه c 36 وجيبت سمعتين بايونير بيضاوى المهم الليله كلها بتاعت حوالى 400 أو 450 وبصراحه مكنتش متوقع اللى سمعته صوت جامد جاد وبيز شديد وتقريبا السبب فى كده مش الكاسيت السبب السماعات علشان نضيفه وللمعلومه انا مركب الموضوع ده من حوالى شهرين والحمد لله مفيش اى مشاكل وكله زى الفل واى استفسار من حد انا ممكن ارد عليه

كاسيت وسماعتين بس مفيش لا جم ولا صب ممكن تقولى اسم المحل وعنوانه واسم الكاسيت بالضبط و السماعات صناعتها ايه وكام وات والاسعار بالضبط

المشاركة الأصلية كتبت بواسطة abo_zied

كاسيت وسماعتين بس مفيش لا جم ولا صب ممكن تقولى اسم المحل وعنوانه واسم الكاسيت بالضبط و السماعات صناعتها ايه وكام وات والاسعار بالضبط

بص يا باشا المحل يعتبر تانى او تالت محل على ايدك اليمين وانت داخل شارع الازهر هتلاقى هما كام محل جمب بعض بتوع سماعات وكاسيتات وكاميرات ديجيتال بس وهتلاقيه دورين الحاجات دى كانت فى الدور التانى وهقولك السماعات كام وات بالظبط وموديل الكاسيت بتاعى بالظبط بس والله الكلام ده من حوالى شهرين ورميت كل حاجه بس هدورلك على الفواتير بس تقريبا الكاسيت كان 180 جنيه والسمعتين البيونير حوالى 260 جنيه او 265 جنيه على ما اتذكر بس متهيئلى السمعتين هما اللى منطقين الكاسيت وعلى فكره الراجل كان عنده موديلات كتير جدا من المتسوبيشى ده يعنى على سبيل المثال قالى فى موديل فى ريموت وبيعرض على شاشة دى فى دى لو اشترتله شاشه بس صوت اقل شويه ومينفعش يتوصله جى ام ولا صب وده اللى انا جبته علشان انا كنت عايز حاجه بريموت ولاقيت موديل تانى صوته بيقول احسن وبيتوصله صب او جى ام بس مبيعرضش على دى فى دى ولا ليه ريموت وعلى فكره الفرق بين الاتنين حوالى 10 او 15 جنيه تقريبا المهم انه عن تجربه شخصيه انا مبزودش الصوت عن 23 او 24 وبيعمل حاجه اخر روشنه وازعاج والفليوم فيه لغاية 60 تقريبا المهم انا شايف انى عملت نظام صوتى ممتاز بسعر كويس جدا وبيشغل يو اس بى وكارت ميمورى وفى فاتحه aux وشكله حلو وليه شاشه ملونه كده بيظهر عليها شكل اكولايزر بس فيه عيب واحد ان الاغانى بتمشى ورا بعضها يعنى مبعرفش انقل من فولدر للتانى مع ان الكاتلوج مكتوب فيه ان ممكن اقلب من فولدر للتانى بس انا مش عارف اعمل كده بصراحه وفى عيب كمان انه مش بيسيف محطات الراديو وطبعا انا بتكلم على الموديل اللى انا جبته وان شاء الله بكره هدور على العلب او الفواتير واقولكم ايه النظام بالظبط

يا جدعان انا لايت الجهاز عند جو
Fotos von GO car accessories آ® | Facebook

السعر 250.....ايه رايكم

المشاركة الأصلية كتبت بواسطة ahmed_nubira

يا جدعان انا لايت الجهاز عند جو
fotos von go car accessories آ® | facebook

السعر 250.....ايه رايكم

هو نفس الجهاز اللى عند ارخصهم ب 220