هل صحيح الاسعار حتزيد تانى مع دخول الصيف ...........انا بعت عربيتى ولسه مستنى و خايف الاسعار تزيد .... حد عنده معلومات بليز
عرض للطباعة
هل صحيح الاسعار حتزيد تانى مع دخول الصيف ...........انا بعت عربيتى ولسه مستنى و خايف الاسعار تزيد .... حد عنده معلومات بليز
بص يا سيدى أغلب الناس عندها اعتقاد و يمكن إيمان كمان و تأكيد على إن العربيات هترخص أوى و تبقى فى الأرض إن اختلفوا فى المواعيد فمنهم اللى قال على شهر 6 و منهم اللى قال بعد 30/6 يعنى أول 7 و منهم اللى قال على نص 8 كده و كل واحد بيدعم اللى بيقوله بخبر سمعه شفاهة بدون أى دليل أو مصدر موثوق منه. سوق المستعمل نازل عموما عشان الإشاعة دى أما الجديد فلو حسبناها بشكل عام مانزلش أوى يعنى و حركة ركود الشراء و البيع فى سوق العربيات عموما هى السبب الرئيسى فى نزول الجديد.
عموما اللى أعرفه إن الشركات اللى أفلست بسبب الأزمة العالمية هى فورد و كرايسلر و دول طبعا مش بيعتمدوا فى مكسبهم على عربيتين تلاتة ب100 ولا 200 ألف جنيه دول بيخاطبوا فئة معينة معينة بتجيب بالعربيتين و التلاتة فى السنة الواحدة و بأسعار خرافية 600 ألف و انت طالع فالمشكلة إن القوة الشرائية للناس دى قلت جدا و مابقاش عندهم أدنى استعداد إنهم يشتروا بنفس المعدل فابتدت الشركات دى تخسر لكن الرخيص أصلا ما تأثرش لأنه بيخاطب فئة أصلا قوتها الشرائية ماتأثرتش و من ناحية تانية نزول العربيات الباهظة دى عن أسعارها المعتادة مش هيتبعه نزول فى باقى الأسعار بالترتيب زى ما الناس فاكرة لأن أسعارها حتى بعد النزول ما قربتش أصلا من أسعار العربيات التانية يعنى تأثير نزول عربية زى الجاجوار من 650 ألف ل 520 ألف على عربية زى اللانسر مثلا اللى هى ب 120 ألف طبعا ولا حاجة و أخيرا فى واحد من أصحابى شغال فى شركة مالتىناشيونال متخصصة فى صناعة ضفاير الكهرباء للعربيات قاللى إن الحالة ابتدت تتحسن و أرقام المبيعات بترجع تدريجيا لحالتها الطبيعية و إن بالمعدل الحالى حيرجع السوق لطبيعته بنهاية 2009.
و لو عايز رأيى ممكن تستنى بس لحد أول 6 فى معرض أوتوماك الأخبار ده هيبقى المقياس الحقيقى لأى نزول عشان العروض الوهمية اللى بتبقى فى المعارض دى فهيبان من خلاله اتجاه السوق فى المرحلة التالية و هيبقى مؤشر قوى على اللى هيحصل.
انا حشترى مستعمل مش جديد و خايف الاسعار تزيد ...و بكده يبقى بعت رخيص و اشتريت غالى
مع احترمى الشديد لرى السيد jisso82 .............لا اتفق معاك وإن شاء الله ها يحصل انهيار فى شهر 9-2009 ولو
تسطيع الانتظار حتى اول 2010 هانشوف هايصه عروض وتخفيضات رهيبه
فى ارتباط نوعا ما بين الاتنين و المشكلة إن الأسعار نزلت زى ما قلتلك بناءا على أمل الناس فى نزول أسعار العربيات الجديدة و لتشبع السوق بالعرض و شوف كده و انت ماشى فى الشارع كام واحد حاطط على عربيته للبيع هتلاقيهم بالهبل أما لو خلصت كل المدد اللى عمالة بتتمد من شهر 6 ل 7 ل 8 ل 9 زى مااتكتب هنا دلوقتى فأكيد لو الوقت ده عدى و الجديد مانزلش القديم برده مش هينزلو احتمال كبير إنه يغلى تانى.
فلو عايز تشترى دلوقتى هيبقى أضمن لو حابب تستنى براحتك هى مغامرة يا إما تكسب جامد أوى يا إما هتخسر خسارة بسيطة لأن العربيات إذا ما نزلتش بدروب أو نزلة جامدة مش هتطلع طالعة جامدة فمتقلقش
أنا على فكرة بقول مجرد رأى مش متأكد منه لأنى مش مدعمه غير بآراء شخصية برده كل اللى أنا عايزه من أى حد يقول رأى يشرح بس بناءا على إيه مش أكتر و عموما احنا بنحاول نفيد بعض و لو وجهة نظرك أقوى و مقنعة انا عن نفسى هسمع كلامك و استنى ماحدش عايز غير إن فى الآخر يطلع بأكبر مصلة ممكنة و يستفيد و ما يرميش فلوسه على الأرض بس اشرح ليه اقتناعك بالموضوع ده و بناءا على إيه شهر 9 بالذات
و الله يا جماعه حاجه تحير ...طول العربيه مهى معايا باسمع اسعار رخيصه جدا جدا و اول متبيع و تيجى تشترى تلاقى الاسعار عاليه و العربيه اللى سعرها بسيط رايحه فى داهيه ....الظاهر مفيش حل غير نزول السوق وامرى لله ....
المشكلة يا أستاذ test50 إن أنا بايع تقريبا من شهر 3 اللى فات و مستنى بس عشان ماكملتش الفلوس و شغلى فى الصحرا تقريبا و مشوار زى الزفت ربنا ما يحكم عليك و مستنى لعل و عسى الفلوس أو العربيات ترخص بس لحد امتى. مادام ماحدش متأكد إن شاء الله لما أكمل الفلوس هشترى أنا بجد مش مستحمل
الحمد لله اتخذت القرار واشتريت دايو لانوس موديل 99 كامله و الكمال لله ..فابريكه من الداخل و رشه بعض اجزاء من الخارج وفيها رخصه سنه بكام؟؟؟؟؟؟؟ب37 الف محتاجه مصروف بسيط ...سير كاتينه و خلافه واحتمال مساعد يمين ....ياترى السعر كده كويس ولا لا؟؟؟؟؟؟؟
مبروك يا باشا واهم حاجة تكون رايك انت، لانك عارف الفتاوى كتير
الف شكر لكل من قام بالرد و عقبال عندكم ههههههههه.. وعموما اللى بيسالنى بقول ب39 عشان الفتاوى اللى حضرتك قلت عليها اصل ممكن واحد يفتيلك فتوه يكرهك فى العربيه ...بس الحمد لله انا مطمئن لانى صليت صلاه استخاره قبل الشراء وانا ثقتى بالله ليس لها حدود
شوفوا يا جماعه الاقتصاد بتاع العالم كله مرتبط ببعض يعنى مينفعش يكون العالم كله فى ازمه ماليه واحنا بس الى ف العالم معندناش و اكيد حضراتكم عرفتوا و سمعتوا ان عجز الموازنه ف مصر اصبح ازيد بحوالى الضعف يعنى التجار دلوقتى بيتفننوا نهم يسحبوا السيوله من جيوبكم ودى كارثه لما السيوله الى مع الناس هتخلص هتنزل ساعتها الاسعار لانه مش هيلاقوا حد يشترى والعالم كله لازم ينتج علشان العمال تشتغل و الانتاج يزيد و عجله الاقتصاد تدور يعنى من الاخر بعيدا عن التفاصيل المعقده الى باع عربيته المستعمله اليومين دول ب اى مبلغ هيجيب بيه زيروووووووووووو سنه 2010 إن شاء الله
و السلام عليكم و رحمه الله
خلاص آخر الكلام عشان الأمانة فقط لا غير إن شاء الله الفترة القادمة و المقصود بها لحد دلوقتى لنهاية 2009 بس من مدير عام شركة سيارات يابانية شهيرة بمصر يعرفه واحد صاحبى بصفة شخصية خليته يسأله على موضوع نزول و زيادة الأسعار المتوقع و كلام الناس اللى مالى المنتدى رد بإن الأسعار بتنزل لكن مش هيحصل دروب بس طلوعها خلال السنة دى صعب أوى و عنده أخبار شبه أكيدة بإن العربيات الأوروبية هتنزل فى شهر 8 و يمكن ده يأثر على باقى العربيات و فى الآخر أنا نقلت الكلام للأمانة فقط زى ما قلت فى الأول مش للتأثير على قرار حد فى الشراء أو فى البيع لأن على الرغم من إن الشخص ده مسئول و فى مطبخ الأخبار دى إلا إنه كلامه كان دردشة مع صديق مش كلام رسمى يتحاسب عليه غير إنه مدعوم بتوقعه و رأيه الشخصى
أنا قلت أبلغكم بس عشان اللى الكلام ده هيفيده أو يبسطه أبقى ماخبتوش بصرف النظر عن اقتناعى الشخصى بيه من عدمه.:049:
طيب يا جماعة انا عايز اشترى جوليت وسالت عليها لقيتها من 35 لحد 43 الف هل فى نهاية السنة دية زى ما كتير من الناس بتقول ان السعر هينزل ولو نزل الجوليت احتمال تبقى بكام ولو اى حد يعرف جوليت اقل من 35 يقولى لانى مشغول جدا الايام دية بساعر العربيات وكل يوم اسمع سعر شكل وجزاكم الله خير
اقتباس:
أرسل أصلا بواسطة ahmedmok http://www.nilemotors.net/nile/image...s/viewpost.gif
الحمد لله اتخذت القرار واشتريت دايو لانوس موديل 99 كامله و الكمال لله ..فابريكه من الداخل و رشه بعض اجزاء من الخارج وفيها رخصه سنه بكام؟؟؟؟؟؟؟ب37 الف محتاجه مصروف بسيط ...سير كاتينه و خلافه واحتمال مساعد يمين ....ياترى السعر كده كويس ولا لا؟؟؟؟؟؟؟
الف مليون مبروك... والسعر كويس جدآ.
الله يبارك فيك يا باشا و مشكورين على الرد