تــــــــــلــــــــــوــ ـــــــــث ..
امبارح طول اليوم تعبان من التلوث ..
انزل من بيتى الصبح اروح اشوف حالى . و اذا بالدنيا زحــمـــــــة و الجو حـــــــر ..وده شيء طبيعى بس لما الزحمة يطول وقتها فالواحد بيبقي هاين عليه يفرد جناحاته الوهيمة و يحلق بعيد عن اجواء العاصمة الخانـــــــقـــــة ..
خلصت الزحمة و خفت عوادم السيارات و رحت الجامعة .
وللاسف كان ماتش الاسماعيلى فى الكلية الحربية فالطريق وقف تانى شوية ..
خلصت و روحت .. و كانت الساعة 3 و الطريق متوقف تمامااااا بسبب الماتش و حاجة تقرف ..خلصت ازمة الكلية الحربية و روحت الساعة 4 وربع .
صاحبي كلمنى علشان نتفرج على الماتش .
روحنا اكلنا من محل اكل ( المفروض انه محترم ) بطنى اتقلبت بعد الاكل و مردتش اقول لصاحبي . شوية و اتفاجيء ان صاحبي هو كمان بطنه هتنفجر بسبب الاكل . قلت يعنى هى ناقصة تلوث !!
روحنا الكافيه وقعدنا فى النص علشان نعرف نتفرج .
صفر حكم المباراة و كان الناس بتبحث عن شريك الحياة ( الشيشة ) . اكتر من 20 شيشة حواليا قدامى وورايا و جمبي و بقي نادى شباب الشيشة خلاص مش عارف اكلم مين ولا مين !!
خلص الشوط الاول وانا صدرى واجعنى وقرفان و دايخ كمان .
و الكافيه بقي فاضي . فقلت احسن و الله ان الناس هديت .
ابتدى الشوط التانى و رجع الناس للحياة من جديد . الكافيه بقي لونه ابيض و كان الناس بتتنافس فى الشد و السحب .. حاجة قرف يعنى .
خلص الماتش و طيرت على البيت من التعب و مكنش قدامى غير سريري ..
قفزت على السرير و بحاول انسي كل الكلام ده بقي .
و اتفاجا بجارى العزيز انه جايب صب جديد 900000 وات و عايز يبرد حقه زى ما بيقولوا ..
و كل شوية اقول هيسكت هيسكت ... يقوم يعلى اكتر ( تلوث ضوضائي بقي ) :) حاولت انادى عليه او اخبط عليه و هو ولا هنا .
بقولكم 900000 وات هيسمع ازاى يعنى !!
رحت مولع التكييف مع ان الجو ماكنش حر اوى و رحت نايم بعد ساعة عناء تقريبا !!
اول مرة اعرف ان التلوث ممكن نلمسه و يكون بالطريقة دى و لا احد يبالى ولا حد عنده دم ..