فلتر الهوا الرياضى .... استفسار؟
برجاء من الباشمهندس MMamdouh الرد أنا معايا الأفيو 2006 و موتورها شبه اللانوس اللى مع حضرتك..حجمه أصغر شويه...
بالنسبه لموضوع فلتر الهوا الرياضى ده.....
هل كله مقاس واحد ؟يركب لأى عربية؟
هل فعلا بيحسن الأداءبشكل محسوس؟ يعنى حوالى كام hp؟
أنا ماعرفش الأفيو ram intake وللا cold air intake فهل بيرفع القدره فى الحالتين وللا فى حاجه أحسن من التانيه؟
بيزود ال acceleration بس وللا كمان ال top speed ؟أنا سمعت انه بيكتم السحب شوية في السرعات العاليه؟
و ايه أثاره الجانبية؟ غير موضوع التراب؟
هل المفروض يتغير على فترات أقل من الفلتر العادى؟
هل هيسخن الموتور لأنه بيدخل هوا أكتر فدرجة حرارة الاحتراق هترتفع؟
هل هيزود استهلاك البنزين وللا هيوفر؟ و ليه؟
هل هيقصر عمر الزيت(موبيل1) بسبب التراب اللى داخل؟
وموضوع التراب ده .......لو الزيت اتوسخ و غيرته يبقى أنا نضفت التراب........ ولا بتبقى رواسب مثلا فى الموتور؟
وهل يمكن تجنب موضوع التراب ده؟ ازاى؟
.........مع جزيل الشكر مقدما......... :oops: :?: :idea:
Re: فلتر الهوا الرياضى .... استفسار؟
اقتباس:
المشاركة الأصلية كتبت بواسطة running_man
برجاء من الباشمهندس MMamdouh الرد أنا معايا الأفيو 2006 و موتورها شبه اللانوس اللى مع حضرتك..حجمه أصغر شويه...
موتور الافيو هو هو موتور اللانوس بس الافيو تزيد حساس شكمان و كتالتك و حساس كامة
اقتباس:
بالنسبه لموضوع فلتر الهوا الرياضى ده.....
هل كله مقاس واحد ؟يركب لأى عربية؟
الفلتر الرياضى مقاسات و اشكال مختلفة... فى الافيو و اللانوس انت مش محتاج فلتر كبير
اقتباس:
هل فعلا بيحسن الأداءبشكل محسوس؟ يعنى حوالى كام hp؟
بشكل محسوس دى بترجع لكل واحد حسب عربيتة و سواقتة و طريقة تركيب الفلتر... الزيادة فى عربياتنا الصغيرة دى بيبقى بتاع 3 الى 4 حصان
اقتباس:
أنا ماعرفش الأفيو ram intake وللا cold air intake فهل بيرفع القدره فى الحالتين وللا فى حاجه أحسن من التانيه؟
الافيو لا رام ولا كولد اير... دى مسميات طريقة تركيب الفلتر فى العربية
الRAM air intake بيبقى فلتر و ماسورة قصيرة داخل الحوض... ميزتة انه بيبقى مفيش فيه اى مقاومة للهواء و بيدى اسجابة ممتازة على لفات موتور عالية و عيبة انه بيسحب هواء سخن من الحوض فا الاداء بيبقى وحش على لفات قليلة خصوصا لو شغلت التكييف
الcold air intake بيبقى فلتر و ماسورة طويلة ممتدة لحد الفراخ اللى بين الاكسدام و الكارتيرة و بكدة بيسحب هواء بارد و الاداء مبيتاثرش على لفات قليلة بس النظام دة بيبقى فيه شوية مقاومة نتيجة طول الماسورة و الفلتر بيتوسخ اسرع لانة معرض لتراب اكتر خصوصا لو انت شلت غطاء الفوج لايت من الاكسدام
زى ما شفت كل نظام له ميزة و عيب و انت تختار اللى يناسب طريقة سواقتك و استعدادك لتنضيف الفلتر
اقتباس:
بيزود ال acceleration بس وللا كمان ال top speed ؟أنا سمعت انه بيكتم السحب شوية في السرعات العاليه؟
الفلتر بشكل عام بيقلل مقاومة الهواء و بالتالى الاداء بيتحسن كل ما لفات الموتور تزيد و بالتالى بيفرق فى السحب و السرعة... ممكن لو ركبت ram السرعة القصوى تقل لان سحب الهواء السخن حيبقى عامل مؤثر بس العربية اللى فيها ram حتوصل للسرعة القصوى اسرع من اللى فيها cold air
اقتباس:
و ايه أثاره الجانبية؟ غير موضوع التراب؟
الصوت لو انت مش بتحب الازعاج و التنضيف... بالنسبالى الصوت حلو بس ممكن ناس تانية تشوف انه ازعاج و الفلتر حيحتاج يتنضف كل فترة و دة ممكن يكون موضوع مزعج عند بعض الناس
هل المفروض يتغير على فترات أقل من الفلتر العادى؟
اقتباس:
هل هيسخن الموتور لأنه بيدخل هوا أكتر فدرجة حرارة الاحتراق هترتفع؟
لا لان الكونترول بيحس بالهواء الزيادة فا بيدى بنزين زيادة عشان يحافظ على نسبة الهواء/الوقود الصحيحة و بالتالى العربية مش حتسخن
اقتباس:
هل هيزود استهلاك البنزين وللا هيوفر؟ و ليه؟
اه و لا
اه لو انت بتحرق بالعربية فبالتالى بقيت دلوقتى بسحب هواء اكتر و مع الهواء الاكتر فى بنزين اكتر و استهلاك اعلى... بس دى ضريبة الاستمتاع بال performance :twisted:
لا لو انت مبتحرقش... بالعكس الفلتر حيوفر بنزين لان دلوقتى الموتور بيتنفس اسهل و بقى محتاج وقود اقل عشان يطلع نفس القدرة اللى انت محتاجة
يعنى من الاخر استهلاك البنزين بقى مرتبط بطرقيقة القيادة اكتر من اى حاجة تانية
اقتباس:
هل هيقصر عمر الزيت(موبيل1) بسبب التراب اللى داخل؟
مش عارف :roll:
خلينا نقول ان الافضل انك تجيب فلتر من ماركة محترمة عشان تقلل اى احتمال لتسرب التراب و بعدين لو انت بتغير الزيت فى مواعيدة يبقى مفيش مشاكل ان شاء الله.
انا جايب فلتر صينى عيان و بعد اول 1000 لقيت فى تراب فى الماسورة فا قمت حاطت علية زيت باور عشان يمسك التراب... الماسورة دلوقتى بقت نضيفة بس الفلتر بقى زى الزفت... انا حعرف افك الفلتر و انضفة بس مش حعرف افك الموتور انضفة :lol:
اقتباس:
وموضوع التراب ده .......لو الزيت اتوسخ و غيرته يبقى أنا نضفت التراب........ ولا بتبقى رواسب مثلا فى الموتور؟
التراب اللى بنتكلم علية بيبقى ذرات رفيعة جدا مش وى ما انت متخيل... عنى مش حتيجى فى يوم تفك كارتيرة الزيت حتلاقى فى قعرها عربية رمل :D
فلتر الزيت بينقى الزيت من اى شوائب دا غير ان معظم التراب حتلاقية اترسب على جوانب المنافولد انه اتقل من الهواء و مبتحركش بسهولة و جوانب المنافولد مزيتة من خرطوم البخار
اقتباس:
وهل يمكن تجنب موضوع التراب ده؟ ازاى؟
اشترى فلتر من نوعية محترمة
اقتباس:
.........مع جزيل الشكر مقدما......... :oops: :?: :idea:
اى خدمة :wink:
MMamdouh