-
أنا واحد من الطبقة المتوسطة و الحمد لله اتخرجت و بقيت طبيب بس أرفان و خايف من المستقبل جدا مش عارف ازاي هتجوز و أشتري شقة و لا حتى تأجير في ظل الأسعار الرهيبة دلوقت , طبعا غير الأرف اللي موجود في كل مكان مصالح حكومية و غيره.
لكن لو حد سألني بتحب مصر و لا لأ...... هقسمله بالله أني بحبها و مستعد أفديها بأي شئ ...... أنا بسمع كلمة مصر قلبي بيترجف من حبي و عشقي ليها.
لازم نفرق بين حبنا لبلدنا اللي لازم يكون حب غير مشروط و بدون قواعد..... حب بإخلاص للأبد .. و بين طريقة عشتنا في مصر احنا اللي عاملين كده في نفسنا هي مبتعملناش حاجة.
بنرمي البذور في أرضها بتطلعلنا زرع جميل ناكل منه و نستمتع بيه و نيجي احنا نحط عليه كيماوي و قرف يبوظه ( و نقول ايه القرف ده حتى الأكل بأه زفت في البلد المقرفة دي)
بنشرب من مية النيل اللي مفيش زيه و في بلاد تتمنى يكون عندها فرع منه بس معدي فيها و نيجي احنا نرمي فيه الزبالة و مخلفات المصانع ( و نقول ايه القرف ده حتى الميه بأت زفت في البلد المقرفة دي)
و غيره و غيره.................
و في الآخر ييجي واحد يقولك أنا بكره البلد دي , هي عملتلك ايه هي بتديلك الحاجة الحلوة و أنت اللي بتبوظها بأيدك , لو قرفت من عيشتك بأيدك تغيرها , قاطع كل غشاش و كل حرامي و كل مزور و كل مفتري و كل ظالم و ثور عليه أعترض على الغلط و متقفش تتفرج و أنت ساكت و أنت هتشوف النتيجة و هتعرف أنك عايش في نعمة منتش حاسس بيها و هتحب مصر زي منا بحبها
-
لما تعمل رخصه سيارة فى 3 ايام كامله لرجل خدم البلد 35 سنه فى سلك ونظام عسكرى قاسى
واخرى الرخصه تصل اليها فى البيت لان عمها ظابط
-
مصر
اى بلد فى العالم بتتقاس بشعوبها
احنا فعلا فينا سلبيات كشعب مصرى بس ساعه الجد بنكون حاجه تانيه
الشعب المصري اللى ممكن يكون مخنوق من مصر جدا ولما يدخل اي شات يلاقى حد بيشتم على مصر يقعد يدافع عنها بكل ما يملكة من قوة
الشعب المصري هو اللى تلاقيه بيحاول يريح السياح جدا وياسلام لو سأله على حاجة تلاقيه واقف وقفه ابن البلد بجد
شعب المصري .. الشعب الوحيد اللى بيقول ده واجب ولازم نعمل كده
الشعب المصري هو الشعب اللى لما تتسرق يجمعوا من بعض ويلمولك عشان تعرف تروح او لما تتزنق او تمرض تلاقيه واقف جنبك
الشعب المصري هو تلك الشاب اللى اتخرج من 3 سنين ومازال قاعد فى البيت ولو حد عرض عليه انه يعمل اي حاجة تضر بلده يقولك لا كل الا مصر
الشعب المصري هو ذلك الرجل الكبيير اللى واقف قدام طابور كبيير سواء فى الفرن او الجمعية او البوسطه او اي حاجة فى بلادنا وهو بيقول يامسهل الحال يارب هانت
مهما كان احنا بنعاني في بلدنا بس برده كلنا بنفتخر بمصريتنا
والله مافيش حد زيينا ولا فى ديننا ولا فى شهامتنا ولا فى جدعنتنا
انا هاسالك وانت جاوب يامصرى
تعمل ايه لو لقيت راجل كبير بيمد ايده علشان يعبر الطريق وانت واقف بجواره ؟
تعمل ايه لو شفت طفل وحده فى الشارع بيبكى ؟
تعمل ايه لو قاعد فى مطعم وبتاكل وشوفت واحد بيبصلك وشاكله محتاج وجعان ؟
تعمل ايه لو واحد خبط عربيتك ونزل بابتسامه بيعتزرلك؟
تعمل ايه لو فى طريق سفر ولقيت اسره واقفه ع الطريق وعربيتهم عطلانه ؟
علشان انت مصرى صدقنى هاتجاوب اجابه صح
وعلى فكره مش كل الناس بس اغلب المصريين
شوف فرحتك لما منتخبنا بيتغلب على فرق من دوله تانيه فى مباريات كره القدم
واحنا بنحتفل بانتصارتنا فى اكتوبر
لما تقعد مع راجل عجوز وتسمع حكايات زمان شوف السعاده اللى بتكون فيها
ولا لما تسافر الارياف وتشوف كرم وطيبيه اهلها
الله عليكى يامصر ويامصريين
بصوا دايما لنص الكوب الممتلىء
-
مصر = شعب + حكومة + حاضر + ماضى
والمستقبل بيد الله
من ال 4 تفتكر ناخد تقييم:
ممتاز؟ جيد جدا؟ جيد؟ مقبول؟ ضعيف؟ ضعيف جدا؟ هباب؟؟؟؟؟؟؟؟
شعب تندثر فيه حاليا كل القيم الجميلة من أدب وأخلاق وثقافة وتعليم وإتقان وضمير ودين و و و و
حكومة لا تهتم إلا بالبقاء فى حين أنها تفتقد الكثير بل أغلب مؤهلات البقاء فما بالك بالكفاءة
حاضر مخجل من تعليم يخرج الجهال وإقتصاد مهلهل وسياسة تابعة وضعيفة ورياضة ضحك العالم عليها وزراعة لا تطعمنا ونيل لا يسقينا وصناعة هى الأسوأ فى الجودة وطرق لا تصلح لبنى آدم ومرور فاشل وشرطة ظالمة وإداريات فاسدة ورشاوى فى كل مكان ورغيف خبز حجرى ولحم خنزير مكتوب عليه حلال وأسعار مشتعلة وعملة ضعيفة وفن هابط و و و و و و و
ماضى به السعيد والحزين والمشرف والمشين واللامع وغيره والعالى وعكسه
كيف أكون سعيدا بهذا الحال؟
لو تقصد إرتباطى بها فهو أكيد وبعده تأتى كلمة: للأسف كما يكون لك إين فاشل بليد سئ الخلق ولا تستطيع إصلاحه فسيبقى فى عنقك ما حييت
وآسف لهذه النظرة السوداوية لكنها ترجمتى للواقع
-
بلدنا جميلة جدًا وبحبها فوق الوصف
لكن مافيش بلد في الدنيا تسوى حاجة من غير الشعب
بص على الشعب المصري دلوقتي
قليل جدًا اللي عنده انتماء لبلده عارف ليه
علشان معظم الشعب المصري مالوش حقوق في بلده
الأجنبي له حقوق أحسن من المصري
حقوقك بتأخدها على حسب فلوسك وسلطتك
لو الاتنين دول مش موجودين يبقى أنت ولا حاجة
بص على الصيادين المصريين اللي مخطوفين في الصومال
ولا حد عبرهم
بص لما واحد أمريكاني اتخطف ايه اللي حصل
بالإضافة لحالة عدم الاستقرار اللي في البلد
ماحدش ضامن أي حاجة في البلد لا الغني ولا الفقير
ما تعرفش تخلص أي حاجة إلا بالرشوة (اللي بقى لها أسماء كتير الأن)
إعلام يقلب الحقائق
كل دي حاجات خلت الناس تزهق (مش تكره) من البلد
ما اعتقدش إن في حد بيكره بلده بمعنى الكره
لان بلده دي هي اهله وعشيرته وناسه بغض النظر عن الأحوال العامة
للأسف الشديد مصر اللي كانت بلد الأمن والأمان أصبحت غااااااابة كبيرة
فيها اللي عايش في دور الفار واللي عايش في دور البومة واللي عايش في دور التعبان واللي عايش في التعلب
كفاية كده بلاش اكمل
ربنا يصلح الحال
Content Relevant URLs by
vBSEO 3.6.0 PL2