اوبل فيكترا 2003 اوتوماتك

**kokowawa79** · 13-05-2009 02:16 PM

انا لسه جايب عربيه اوبل فيكترا 2003 اوتوماتك 2000 سى سى من كام يوم. ايه رايكم فى الموديل ده؟ وايه مميزاته؟

الصراحه العربيه ماشاء الله ذى الفل وجبارة ودخلت بيها سباق مع بى ام دبليو 318i ومرسيدس. بجد كان هاين على انزل ابوس العربيه من ادائها الممتاز بفضل الله.

انا عايز نصايحكم فى موضوع صيانتها وايه الحاجات اللى دايما اكون متابعها فى العربيه ومواعيد تغيير الزيوت والسيور والكلام ده.

انا ملاحظ حاجه ان استهلاك البنزين عالى زياده عن اللزوم يعنى مثلا ال 10 لتر بيقعدو معايا 3 - 4 ايام رغم انى بروح بيها الشغل بس لحد الان. انا شغلى فى المهندسين وبيتى فى كوبرى القبه....هل ده عادى؟ كمان الصبح الراجل بتاع الجراج بيغسلها ولما بدورها بلاقى ريحه بنزين بيخرج من الشكمان اكنه مش محروق بس مش فى اى دخنه...الريحه دى بتروح لما بمشى. هل ده عادى؟

وجزاكم الله خير.

**Ahmad Allawy** · 13-05-2009 03:14 PM

ما شاء الله تبارك الله..
عربية عظيمة فعلا.. ربنا يباركلك فيها و يحفظهالك يا رب..
شوف بقي يا باشا.. الموتور اللي عندك ده ما شاء الله 137 حصان تقريبا..

شوف اللينك دي فيها النصايح اللي بنفضل انها تتعمل اول ما تجيب العربية..
http://www.nilemotors.net/Nile/showthread.php?t=73535
عشان تريح دماغك.. و تمشي بالعربية و انت مطمن باذن الله..

بالنسبة لموضوع استهلاك البنزين.. يفضل انك تحسب بالكيلومتر بالظبط.. مش بالمشوار..
و الطريق شكله ايه.. واقف ولا ماشي.. و التكييف شغال ولا لأ.. و كده..
و الافضل كمان انك تجربها علي طريق سفر و تشوف الاستهلاك شكله ايه.. عشان الناس تقدر تفيدك..

و بالنسبة لموضوع ريحة البنزين المش محروق كويس دي في الاول الصبح و العربية باردة فبيتهيألي ده طبيعي..
و طالما الريحة دي بتروح لما العربية تسخن.. يبقي مفيش مشكلة..

قولنا علي اخر التطورات.. و ادينا معاك باذن الله لحد ما تظبط و تبقي زي الفل..

**فادى محمد** · 13-05-2009 03:14 PM

الف مبروك يا باشا وبالنسبه لاستهلاك البنزين يبدو من كلامك ان العادم بيخرج نيء مش محترق كويس . لو مكنتش غيرت البوجيهات لما جبت العربيه فغيرها او اكشف عليها لو كنت مغيرها وغير معاها فلتر البنزين وحط منظف انجكشن مع التفويله وحتلاحظ تحسن كبير جدا ان شاء الله .

**ghost** · 13-05-2009 10:30 PM

ربنا يباركلك فيهاااااااااااااااااااااا ا
ممكن سواءل رخم خلصة فى العربيه على كام و هل هيه Cd - Cdx - Cds عشان اخواك مقبل على الخطوه ديه شهر 6

**Ahmad Allawy** · 13-05-2009 10:54 PM

المشاركة الأصلية كتبت بواسطة ghost

ربنا يباركلك فيهاااااااااااااااااااااا ا
ممكن سواءل رخم خلصة فى العربيه على كام و هل هيه Cd - Cdx - Cds عشان اخواك مقبل على الخطوه ديه شهر 6

هما cd ودي الاوتو ال2000 او ال1600 سي سي.. (مش متأكد من ال1600 دي)
و الcdx ودي ال2000 ايكوتك اوتوماتيك الكاملة تماما.. اللي فيها كل حاجة بما فيها فتحة السقف..
و ال1600 المانيوال gls

**kokowawa79** · 13-05-2009 11:20 PM

المشاركة الأصلية كتبت بواسطة ghost

ربنا يباركلك فيهاااااااااااااااااااااا ا
ممكن سواءل رخم خلصة فى العربيه على كام و هل هيه Cd - Cdx - Cds عشان اخواك مقبل على الخطوه ديه شهر 6

العربيه خالصه على 70000 وانا مش شديت مع الراجل على السعر لانها بصراحه ماشاء الله حالتها شاذة وانا مش حطيت فيها اى حاجه..........
كمان انا كنت بدور على 2000 سى سى موديل حديث عشان التكييف والاداء وكمان هى full options بس من غير فتحه سقف. ماتورها ايكوتك 2 كامه 16 صباب.

انا بصراحه مش اعرف يعنى ايه cd - cds - cdx ياريت تقولى الله يكرمك.

وربنا يوفقك فى عربيه كويسه....

**tamertamer** · 14-05-2009 01:26 AM

بص مبروك عليك العربية اولا
استهلاك البنزين نتيجة عدم الاهتمام بعمل الصيانة الدورية للعربية على الاغلب
وهى عمل صيانة الخمسين الف كيلو وريح دماغك من المتور خالص
وهى تشمل
1 - بوجيهات
2- سيركتينة
3- سير دنمو
4- بلية شداد الكتينة
5- تبص على طرنبة المية
6- فلتر الهواء
7- فلتر البنزين
8- تبص على تيل الفرامل

والانواع الكويسة
عندك الفيبى او الجى ام

وهتريح دماغك نحو 50 الف كيلو بس فى صيانة جانبية كل 20 الف وهى عبارة عن 1 - طقم بوجية 2- فلتر البنزين 3- تيل الفرامل ودة حسب استخدامك
عن تجربة شخصية حياتية وسدقنى هتريح دماغك كتير

وخلى بالك من العربية دية لانها شرسة وبتغر اوى اوى خصوصن لو كانت منوال ربنا معاك وسوق على مهلك ربنا يحفظهالك وخلى بالك لو شفت عربية اوبل بيضة 1600 دة انا ومتحولش تشد معاية عشان انا مبرحمش حد ادينى حزرتك