الموضوع: ::: البولونيز المظلومة :::

المشاركة الأصلية كتبت بواسطة kreka

الكهربائى هو اللى قالى على المكنتين وقالى دول اليابانى بتوع الازاز التقيل ... بس اسمع ان فى مكن بيكون رخيص ب 150 تقريبا


المسمار معرفش فين تحديداً بس ليييييه ؟ مش تعرف تظبطه انت خطر

طالما سألت أقول لك، أنا مرة كانت عندي مشكلة إن الباب التاني بتاع الكربراتير علق فبقى يدخل بنزين بالهبل على الموتور و البوجيهات انتهت (العربية كانت ماشية بـ2 بوجيه بس!!!)، غيرت البوجيهات و قال لي تعالى تاني بكرة أشفهم، تاني يوم جيت أدور العربية مش عايزة تدور و دارت معايا بالعافية و بتقطع و لما روحت له يوم فك البوجيهات لقاها مهببة الراجل استغرب أوي و ماعرفش المشكلة منين، غيرت البوجيهات تاني و قال لي تعالى بكرة، أنا بقى طنشت لأن أنا كده كل يوم هغير بوجيهات و العيب أصلاً مش في البوجيهات، قعدت أدور شوية على النت المهم فهمت إن الهباب ده بسبب زيادة نسبة البنزين في الخليط، يبقى الحل إني أزود شوية هواء و العربية هتبقى تمام.
أنا لحد دلوقتي العربية بتطلع عيني في الدوارة الصبح و هي باردة كأنها شرقانة و لازم أزود بنزين أول ما تلقط عشان العربية تقوم و بتقطع باستفزاز بس لما العربية بتسخن كل المشاكل دي بتنتهي و تدور من أول تكة عادي و السحب ممتاز، وكمان الـrpm بيقى 600 في السلانسية و ده قليل و المفروض يكون 900 على الأقل.
عشان كده أنا عايز أعرف مسمار الهواء فين و أحاول أظبطها بنفسي، و أنا لو ماجربتش مش هتعلم.

المشاركة الأصلية كتبت بواسطة kreka

السلانسيه بيكون 800 ..... والمسمار معرفش مكانه بالتحديد .. ليه مجربتش تغير الميكانيكى ؟

اعرف ازاى ان البوجيهات تعبانه ؟؟؟؟؟؟؟

لما تدور ارفع السخان عشان تلقط على طول

أنا بتعامل مع اتنين ميكانيكية و الباقيين حرامية، الأولاني طيب و أمين بس ممكن حاجات مايعرفهاش، التاني شاطر بس ممكن يعمل لي فيلم عشان يظبط مسمار الهواء بس، يعني ممكن ينضف الكربراتير و يظبط كهرباء و شوية حاجات كده يزود بيهم التسعيرة.

هتعرف إن البوجيهات تعبانة لما العربية تتالت (تبقى متالتة يعني 3 بوجيهات شغالين و الرابع منتهي) و هتلاقي العربية بتقطع و بتطلع هباب أسود من الشكمان.

بالنسبة للسخان: مش هو ده إللي تحت الدريكسيون على الشمال شوية و بيتشد لبرة؟ لو هو أشده قبل ما أدور و لا و أنا بدور و لا لما العربية تلقط؟
لو هستناه لما العربية تلقط يبقى ما عملتش حاجة؛ لأن العربية بتدور بالعافية و هي باردة و ممكن المارش يتحرق مني

المشاركة الأصلية كتبت بواسطة kreka

اه هو دا شده قبل ما تدور لأن دا لو سليم بيذود الأر بى ام يعنى بيقوم بدور ضغطه البنزين
هنزل أجرب دلوقتي.

تقريبا الكربيراتير بتاعك مش تمام ....... نصيحه متخليش الميكانيكى كل شويه يعمل ناصح ويفك الكربيراتير ينضفه ..... هو أخره يتنضف مره فالسنه
لأ، الكربراتير تمام؛ لأن الكربراتير لو مش تمام العربية كانت هتفضل تقطع على طول لكن هي بتعمل كده و هي باردة بس و أول ما تسخن بتبقى 10 على 10.
أما الميكانيكي أنا ماخليتوش يفك الكربراتير نهائيًا لأن أنا عارف إنه سليم و عشان كده كنت عايز أظبط مسمار الهواء لوحدي بدون اللجوء للميكانيكي.

جربت موضوع السخان و مانفعش للأسف.

عملت شوية شغل في العفشة:
1-غيرت بيض المقصات للعجلتين الأماميتين، الطقم (4 بيضات) التركي بـ110 جنيه و الكوري بـ180 جنيه و مالاقيتش الأماني، أنا جيبت التركي.
ملاحظة: بيض المقصات إللي اشتريته بتاع فيات 132.
2- بلية الأكس للعجلة الخلفية شمال، البلية الياباني بـ33 جنيه و الصيني بـ12 جنيه، أنا جيبت الياباني، و لازم تودي الأكس كله لخراط عشان يفك البلية القديمة بالمكبس و يحط البلية الجديدة بالمكبس بردو، الخراط خد 7 جنيه في الحكاية دي، يبقى التكلفة الإجمالية للبلية 40 جنيه.
طبعًا كل ده غير المصنعية، العفشجي خد 20 لكل عجلة (يعني 80 إجمالاً).

كده التكلفة الإجمالية لصيانة العفشة 230 جنيه و كان ممكن تزيد في حالة إني لاقيت بيض مقصات ألماني.