الموضوع: ::: البولونيز المظلومة :::

المشاركة الأصلية كتبت بواسطة sabry7

السلام عليكم ورحمة الله وبركاتةسوف احكى تجربتى فى شراء السيارة انا شوفت السيارى على النت وعاجبتنى كلمت صاحبها ورحت شوفتها وطبعا انا ماعنديش خبرة خالص فى اى شىء فى العربية وسالته هى العربية رشه دواخل اوقيها بارومة او اعى عيب قالى لا قلتلة هجيب ميكانيكى يتفرج عليها الاول وبعدين اقرر اوم ايه رحت عندنا المنطقة ورحت واخد واحد ميكانيكى جارنا فى الزاوية وصاحبى ومتربيين سوى وخته وركبنا المترو ورحنا فيصل ونزل تحت العربية واعد يقلب شمال ويمين وفوق وتحت وبعدين مشينا وقالى العربية حلوة ماقيهاش حاجة وسلييمة موتور وعفشة وصاج وكله تمام واتفت مع صاحب العربية هرد علية لما نروح وكان فية عربية تانية فى المنيل ركبنا من فيصل ورحنا شوفناها وماعجبتناش ومشينا وقالى العربية التانية حلوة قلت على بركة الله ومع الصدمة الاولى قلت اما اعرض علية فلوس انا اصلى اخذته يوم الاجازة بتاعته وقلت يعنى هياخد 50 ولا 75 جنية مش مشكلة وقلتله عايز كام انت تعبت معايا قلى عيب ياخى مش مستهلة المهم ضغط علية قالى هات 200 جنية ولو واحد غريب كنت هاخد من 400 جنية واخدين بالكم من المشوار كلة فى المترو فى الريق وماخدش 3ساعات كله على بعضة انا ذهلت من الرقم مش عارف ليه حق اذهل ام لا المهم ضربت ايدى فى جيبى واديته 200 جنية اللى خلى وراح ضاربهم فى جيبة المهم رحت خلصت مع صاحبه وسالته تانى العربية مافيهاش اى حاجة مستخبية كده ولا كده انا هاخد كلامك ثقة والراجل كلمة قاللى عيب دى حتى العربيه بتجيب ال140 بسهولة وانا جاى بيها من اسكنرية 140 طول الطريق ملحوظة لحد دلوقت وحت من بعد ماعملت طقم شنبر مش عارف اعدى ال120 واعد اسايس فى العربية علشان خاطرى هاتى ال140 مرة واحدة زى ماقال صاحبك القديم مش ممكن ابدا ونسيت اقولكم انى سالته عن استهلاك البنزين اللى ده انا رحت اسكندرية وجيت ب40 لتر قلت ماشاء الله ملحوظة انا رحت بيها السويس وجيت يعنى نصف مسافة اسكندرية بنفسى الكمية يعن اقل سوية حوالى 37 لتر ادى تانى كذبة المهم بعد ماخلصت معاه واشتريت العربية وهى موديل 89 واهم حاجة ان قيها جنوط حلوة رحت الشغل وانا فرحان بقى معايا عربية ومن كلام الميكانيكى صاحبى خد بالك من صاحبى دى والراجل اللى امنته اللى هو صاحب العربية وذكرته بحديث من غشنا ليس منا المهم رحت الشغل ووريت العربية لواحد صاحبى معاة عربية قديمة 124 قلتلة اتفرج على العروسة اللى انا جايبها هى الامانة لله شكلها يفرح من برة وشكلها حلو بلونها الاحمر والجنوط المهم نزل تحت العربية واعد يقلب زى صاحبى الميكانيكى فاكرينه وشغل الموتور وهنا كانت الصدمة الكبرى العربية مليلنة بارومة من تحت بطول العربية من بين العتب وجسم العربية وبطن العربية فى الدوسات معمولة كلها وفيه خرطوم فايز نازل من الموتور بيطلع دخان وقالى دى عايزة طقم شنبر واقول لكل واحد عايز يشترى عربية يخلى بالة من خرطوم الفايز ده اهم حاجة لانهم بيحاولو يخبوه ومشعارف فى اية فين وايه فين والبطارية كمان طلعت حكاية البطارية كل اللى يشوفها يقول جافة وبعد مافتحلة غطاءها يقوللى الله دى سايلة علشان بنلاقى الفتحات اللى بيتحط فيها السائل المهم رحت لبتاع بطاريات قاللى البطارية دى اللى بقولو عليها جافة وهى باظت وكسر الغطاء بتاعها وعباها مية نار شوفتو الفكر الجهنمى عمل كدة لحد مايبع العربة وهى ماشتنى كام يوم وبقت تفصل لوحديها وتشتغل بمزاجها اتارى كل البطاريات اللى بتتباع فى مصر على انها جافة هى بطارية عادية بس متبرشمة واذا باظت لاتستعمل ثانية بس المصرى ملك الفهلوة والغش والخداع يشغلها لحد مايبع العربية وانت تشترى بطارية جديدة بعد اسبوع على الاكثر واتارى البطاريه الجافة الاصلية بتتملى بودرة ومش اى حد يقدر يشتريها وبتزل مصر فى موديلات قليلة جدا خلو بالكو المهم ماطولش عليكم صرفت حوالى 2500 جنية تانى لحد ماظبت العربة من سمكرة وبطارية ةعفشة وطقم شنبر وفرامل ولحد دلوقت ماجبتش ال 140 زى ماقال صاحب العربية اللى راح بيها وجة من اسكنرية على 140 ودى حكايتى وخلو بالكم من عربياتكم البولونيز عربية جميلة بس للى يصرف عليها ويراعيها وحمالة اسية وعلى فكرة عربيتى اسمها مروة والسلام عليكم ورحمة الله وبركاته والى اللقاء

ربنا يعوض عليك في الخسائر إللي خسرتها دي كلها، لكن مع ذلك أنت ممكن تستفيد من العربية بدل ما تبيعها بخسارة أو تضحك على حد غيرك و تدبسه في العربية، يعني خللي العربية معاك و اتعلم فيها أساليب الميكانيكية و الصنايعية في مصر، و ماتصرفش كتير لأن الصنايعية هيطمعوا فيك و الحاجة أم جنيه هتاخدها بخمسة و ممكن تكون عندك حاجة سليمة يقول لك "دي بايظة غيرها" لأ اقعد عافر معاه لحد أما يقول لك على أرخص حل، لحد ما تلاقي ميكانيكي كويس و محترم و أمين تقدر تتعامل معاه و أنت مطمن.
بالمناسبة، أنت ساكن فين في القاهرة؟ أنا أعرف ميكانيكي كويس في شبرا لو تحب أوديك له و هيعجبك شغله.
طبعًا الميكانيكي إللي راح معاك كتير عليه 200 جنيه، آخره 50 جنيه و يبقى سارقك كمان، و طبعًا ماتروحلوش تاني لو جرى إيه، و بصراحة كان المفروض تشوف ميكانيكي تاني ييجي معاك عشان تتأكد طالما أنت حسيت فيه الطمع.
طبعًا أنت كده العربية واقفة عليك لحد دلوقتي بـ18750 يعني 19 ألف، و أنا شايف إنك لو كملت شغل في العربية هتوصل معاك لـ30 ألف لأنك لسه جديد و العربية بتاعتك شكلها أعطالها كتير، فأنا من رأيي إنك تخليها كده و ماتصلحش الفتيس و لا تغيره لحد ما يجيب آخره، و حاول تلم البارومة إللي عندك بأقل التكاليف، ماتلعبش في الكربراتير لأنك كده في الآخر هتغيره، و أظن إن أنت ماراجعتش على العفشة من ساعة ماجيبتها و لازم تراجع عليها عند عفشجي كويس.
اسمع نصيحتي و ماتمشيش ورا كل إللي بيقوله لك الميكانيكي و إلا في الآخر هتندم، لأن أنت كده داخل على تغيير فتيس و طقم دبرياج و تغيير كربراتير (بس أنا شايف إنه سليم) ده غير البارومة.
الله يكون في عونك، و لو احتجت حاجة إحنا موجودين.

المشاركة الأصلية كتبت بواسطة sabry7

هومين اللى دخل الاعلان ده فى المشاركة بتاعتى

ههههههههههههههههههههههههه هه
الإعلان ده تبع المنتدى، و هو مش داخل في المشاركة بتاعتك، هو بيتحط كده في نص الصفحة عشان الكل يشوفه.