الموضوع: بكل صراحة..موديلات 2008..ميجان ولا A5 ولا فيكترا..بدون تحيز

المشاركة الأصلية كتبت بواسطة chato_eg

باشا...إزاى تفترض إنك لو جبتها من بره تبقى نفس السعر
الميجان إللى فى التوكيل أعلى فئة ب 150 ألف أو أقل و فيها فتحة سقف و cruise control ...
إللى قريبة منها فى ال a5 الخليجى ب 170 ألف...و من غير فتحة السقف لإنها بتنزل فى الموديل الأعلى

هو مربط الفرس فى إن الميجان لا تقل بأى حال عن ال a5 ....بل تتفوق فى جوانب الراحة و العزل الداخلى و الوزن الأخف...إنما الميجان أرخص و لها قطع غيار خارج التوكيل و ليها قطع غيار استيراد و السادة إللى مش مصدقين ممكن يراجعوا المواضيع المثبتة فى قسم رينو...

فأنا شايف إن فرق السعر الكبير ( 20 ألف جنيه على الأقل ) و ( 35 ألف لل full option ) لا مبرر له.. .إطلاقا

نيجى للناحية بتاعت الأداء..تقصد بيها إيه...سريعة و لا ثابتة على ملفات على سرعات عالية ولا معمرة ؟؟؟
الفخامة...بشهادة الناس كلها الميجان فخمة...لكن ليها أسلوب خاص فى توصيل الفخامة....ممكن تراجع الموضوع بتاع سر حب مالكى الميجان فى قسم رينو
الراحة و المطبات....أبصم بال 10 على إن الميجان أريح...دى حاجة مافيهاش نقاش إن العربيات الفرنساوى عموما أنعم و أطرى و أريح من الألمانى المشهور بقساوة التعليق علشان الطابع الرياضى و الكلام ده
يعنى الميجان أطرى من أى أوبل ركبتها فى حياتى من ال corsa hatchback للفيكترا الجديدة...و كذا بالنسبة لل a5 و الجيتا...و لا حتى ال bmw الفئة الثالثة أطرى...
لا ينافس فى موضوع النعومة و الطرواة إلا اليابانى و كمان لهم مذهبهم فى ذلك...مش بنفس الشكل بتاع الأوروبى و ده موضوع خارج النقاش هنا

فى النهاية أرجع و أؤكد إن كل بنى آدم بيستطعم حاجة و له دماغ غير باقى البشر...إللى بيحب ال a5 ربنا خلق له ال a5 ...
و إللى بيموت فى الميجان....ربنا خلق له الميجان...
مش هاينفع كده تقارنها بالورقة و القلم و نحط مزايا و عيوب فى قوائم من أجل الوصول لقرار أيهما الأفضل....
لاحظ إن كل عيب أو ميزة له وزن معين و بيختلف من شخص لآخر
يعنى إللى شايف ال a5 ناشفة ...آه ناشفة بس مش كارثة يعنى
أنا شخصيا كنت متضايق جدا منها أول ما ركبت....و لما قعدت معايا شوية و رجعت تانى للميجان...تنفست الصعداء...أخيرا رجع عمودى الفقرى مكانه ..!!
و هكذا تتنوع وجهات النظر....فكل واحد له أولويات بالترتيب...و الحمد لله إن زمن احتكار شركة النصر ولى من زمان و أصبحت الدنيا وردى إلى حد ما و فى تنوع و اختيارات

تمام كده و أنا حاسس انك راجل منطقي زي حالاتي بس انا مش متحيز قوي
العربية من بره و حتفضل بره شوية و الفرق بينهم الف أو ألف و 500 دولار بالكتير
بس انا مضايقني تقفيل الميجان و الدنيا بتقشر من جوه و حاجات تانية بسيطة .. بس علي رأيك .. اربع خمس الاف تركب حاجات و محتاجات و برضه انت الكسبان