الموضوع: الي معاه نيسان صني يخش

loooooooooooool

المشاركة الأصلية كتبت بواسطة mdsoultan

السلام عليكم اولا:
اول حاجه الف مبروك عليكم النيسان صني
ثانيا فيه حاجه لازم تاخد بيها لما تشتري العربيه مفيش حاجه اسمها فتره تلين للعربيه
ليه بقى انا هقنعك انت لما بتشتري العربيه لو مشيت بيها على حسب كلام التوكيل ان انت متذيدشي عن 100 الموترو هيسخن ويبوظ صح الكلام كله ده اشتغلات لانه لو صح كان لينها هوه في المصنع لانه عاطيك العربيه بالضمان بتاعها وهوه مش هيخسر شيء بس ازاي يديك ضمان 3 سنين والعربيه لسه بتلين طيب لو واحد قرص على الموتور يروحله يديله عربيه غيرها ولا يغيرله الموتور الشغلانه هتقع بخساره الحكمه من كلامهم فتره تلين 1000 كم ان انت تاخد على العربيه وعلى عزمها الجديد لسه متعرفهوهش ثانيا اسمها فتره تدريب مش تلين يعني استلمها من الصاله شغل التكيف امشي 220 خد راحتك يعني انا لو ابويه بيموت ولازم اسافر بيه واوصله بسرعه العربيه الجديده مش تنفع بقى ههههههههههههههههههههههههه هههه لا تكيف لا سرعه ايه يارجاله محدش يضحك عليكواااااااا
ثانيا حط زيت الي بيتغير كل 3 الاف كيلو ليه بقى علشان الزيت ده بيحافظ على الموتور اكتر التاني لو قرصت في الموتور الزيت بيسود ومش هتعرف تغيره حرام 225 جنيه في 4 الاف كم طبعا لازم تخليه 9 او 10 علشان انته هتستخسره صح
بعد 5 كم بدل الكوتشات الاربعه على شكل مقص


ربط العفشه لان النيسان صني عفشتها بتتفك كتير
كلام العربيه نازله وفيها كاوتشات التراب ناقصه بتاعه المساعدين ماحصلشي انا لما قريت الكلام اتخضيت وروحت توكيل السبع الضحكه عليه كانت بقرش المهندس كان هيضربني رفع العربيه ومس ايدي وحطها فوق عند البطاحه وقالي دوس ده ايه كاوتش ولا فردت شبشب هههههههههههههههه
على راي عادل امام اتكسفت كسوف ياراجل وخدت العربيه وقلت ياارض انشقى وابلعيني غير الكلام الماسخ الي انا سمعته يعني ايه علابيه تنزل من غير كاوتشات مساعدين محصلتشي في السيات
حط ميه حمراء في الراديتير الاصليه
دهان العربيه زي الفل بس انت اول ماتنزل الصبح امسح العربيه بفوطه زفره وبعد كده امسحها بفوطها فيها ندى ميه بس ودمتم والعربيه تعيش معاك الفين سنه
وربنا يديكم خيرها ويكفيكم شرها ودمتم
حياه جديده مع عربيه جديده

يا أخي انا مش لاقي في كلامك حاجه تعتبر صح غير موضوع تبديل اماكن العجلات... و حتى دي بتعتمد على نوع العربيه و هتدخل الاستبن في دوره التغيير و لا لأ

غير كده.. بقيه الكلام ابعد ما يكون عن الصحه. يا ريت نكتب اللي متأكدين منه فقط.. او نسأل لو منعرفش.

المشاركة الأصلية كتبت بواسطة mdsoultan

ياحمد اكتب في المفيد حبيبي من تغير ماتقول صح ولا غلط انا بكتب غلط وسايبلك الصح ههههههههههههههههههههههههه ههههههههههه

بدل حضرتك عارف ان اللي بتكتبه غلط يبقى متكتبوش لأن فيه ناس هتصدقك.. و ممكن تعمل بكلامك و تبقى حضرتك سببتلهم ضرر.

الحاجه التانيه انا معرفكش بصفه شخصيه.. و ليس بيننا نوع من المعرفه... فبلاش موضوع "يا حبيبي" و الحاجات الظريفه بتاعتك دي.

يعنى كل توكيلات مصر مبتفهمش؟

يعنى كل توكيلات مصر مبتفهمش؟

لو عايز الكلام المفيد اقولهولك انا

1- تليين السيارة : المحرك بالفعل دار شوية فى المصنع ، لكن بدون حمل، يعنى سلانسيه ، والتليين على السلانسيه لا يغنى عن التليين على الحمل، كما ان باقى اجزاء السيارة لسة ملينتش مثلالجيربوكس والفرامل، ولذلك فالكتالوج به فقرة كاملة عن التليين، هى مش بتحدد سرعة للتلين لكن بتحط قواعد للقيادة فى اول 1000 ميل ، منها انك متمشيش على سرعة ثابتة كتير ومنها انك متحمل السيارة حمولتها الكاملة فى فترة التليين ومنها انك متفرملش بشدة ومنها انك متقرصش فى السحب ومنها انك متجرش مقطورات بالسيارة، فهل المصنع اغبياء مثلا علشان يحطوا كلا م من شأنه انه يخنق مشترى السيارة؟ كما انه انت لو ملينتش السيارة هى مش هتفوت فى فترة الضمان ، لكن بدل ما هتعيش 500 ألف هتعيش 300 ألف بس (مثلا) وبالتالى التوكيل مش هيخس عليه اى حاجة لو مقاللكش لين، كما ان حكاية سخونة الموتور على 100 دى بالذات من احلى النكت اللى سمعتها السنة دى، الموتور على 100 بيكون قرب ال 3000 rpm سرعة اعلى كفائة ، والمقاومة الايروديناميكية لجسم السيارة مش عالية زى سرعات 140 و 160 الخ، وحركة الهواء على الردياتير ممتازة جدا، ومعروف ان سرعة من 90 ل 100 هى اكثر السرعات اقتصادية فى السيارة: اقتصادية =اقل استهلاك وقود لنفس المسافة = اقل كمية حريق لنفس المسافة=اقل سخونة لنفس المسافة، يبقى سخونة ايه اللى بنتكلم عليها، حدى يا جماعة شاف موتور بيسخن على 100 وميسخنش على 120-140-160؟


2-حكاية الزيت بتاع كل 3 آلاف: المسألة مهياش زيت وخلاث والا كنا حطينالك زيت عباد شمس وغيرناه كل 1000 كيلومتر زيت عباد الشمس هيكلفنا حوالى 27 جنيه فقط لكل غيار ويبقى كدة غيرنا الزيت كتير وحافظنا على نظافة الموتور، الفكرة فى خواص الزيت، والفرق الأساسى بين الزيت ابو 3000 آلاف كيلومتر والزيت ابو 10 آلاف كيلومتر ان خواص هذا الأخير لا تتدهور نهائيا ولمسافات اكثر بكثير من عشرة آلاف كيلومتر، وبالتالى شوية التآكل اللى بيحصلوا فى المحرك لما زيت ال 3000 آلاف يقدم مش بيحصلوا فى حالة زيت ال عشرة آلاف


3-انت كاتب ان الكاوتش ابدله كل 5 كيلومتر، يعنى افهم من كدة انى علشان انزل من البيت اروح الشغل هاخد فى مسافة ال 30 كيلو حوالى6 ساعات لأنى هبدل الكاوتش 6 مرات، وحتى لو تقصد كل 5 آلاف كيلومتر فمحدش فى العالم كله بيعمل كدة، الناس العادية بتعملها كل 20 ألف، والناس المحسوكة بتعملها كل 10 آلاف، لكن مش 5 آلاف ابدا، ده مش كاوتش نسر يا عم
كما ان الاكوتش مبيتبدلش على شكل مقص، الكتالوج شارح دورة تبديل الكاوتش كويس جدا واقترح عليك تلقى نظرة عليها


4- اما بأه اكتر حاجة عجيبة انت قلتها فهى حكاية الفوطة الزفرة اللى بعدها فوطة مندية دى، عارف ايه اللى هيحصل لما تعمل كدة، الفوطة الزفرة بتسيب اثر زيتى على البوية هو اللى بيخليها تلمع، لو جيت بعدها مباشرة بفوطة مندية الميه اللى فيها هتخلى الآثار الزيتية اللى على البوية تجلط وتعمل جلاميط مطينة كدة على كل العربية تخلى منظرها يقرف، انت بتستعمل واحدة من الاتنين فى المرة الواحدة، اما الفوطة المندية او الفوطة الزفرة ، لكن مش الاتنين فى مرة واحدة ابدا،


5-عفشة الصنى بتفك؟ كلام فاضى


هو مش انا قلت لك قبل كدة بطل تسمع كلام الميكانيكية؟ صدقنى هيجيبوك ورا