الموضوع: خلى بالك وانت بترخص عربيتك (يوم من عمري ) ؟!

السلام عليكم ورحمة الله وبركاته .
طبعا كلكم عايزين تعرفوا تخدوا بالكم من ايه .......طبعا على عربيتك انا هحكلكم

طبعا رحت علشان استلم نمر جديدة لعربيتى اصلي كنت مؤقت قالولي :-
1- روح نيابة المرور وهات شهادة المخالفات الى على العربية ......الحمد لله طلعت بعد ساعتين والشهادة استلمتها بعد ماتنفخت وحاسيت انى في طابووووووووور جمعية .
2- روح هتلنا تأمين اجباري على بقية الأيام ........رحت جبت التامين على بقية الأيام اصلي انا كنت مرخص 3 سنين .
3- اوقف في طابور الخزنة وادفع 100 ج تمن النمر الجديدة وهات ب4 ج دمغة ......يالهوى يالهوى على الطابور طبعا شربت 2 شاي واتكلمت شوية في الموبايل وقعدت اقرا شوية اذكار عبال مربنا كرمنى ووصلت للخزنة الحمد لله الحمد لله .
4- روح الأرشيف هات ملف العربية ....حاضر طبعا بتاع الأرشيف قالي صباحو عسل قلتله عنيا طبعا هو في نفسه بيقول انا مالي ومال عنيك هات المعلوم .
5- روح فك النمر وتعالى علشان تستلم الرخصة .... طبعا مافيش فحص علشان انا كنت فاحص من 3 شهور وواخد نمرة مؤقته الحمد لله .
6-الحمد لله استلمت الرخصة قالولي روح على مخزن اللوح علشان تستلم اللوحة والمثلث وشنطة الإسعافات .... طبعا كنت بتنطط وبرقص علشان طالع من المرور .
7- الواد الي بيركب النمر قالولي ده واد مسطول ركب امبارح لواحد النمرة الى قدام غير الى ورا ....... طبعا وهو بيركبلي النمر عينى في وسط راسي وكل شوية ابص على الرخصة وعلى النمرتين الى معاه .
8- المفـــــــــــــاجــــــ ـــــــــاة ........ واذكى اخواتوا بيركب النمرة الى ورا .....القى ايه يامعلم .....القى الفانوس بتاع العربية الى ورا مكسور مكسور مكسور ......

9- اذكى اخواتو ركب النمرة الى ورا وخد المعلوم وانا اخدت عربيتى وروحت البيت وقلت الحمد لله قدر ولطف .
10- ياريت تدعيولي بعد 3 سنين ميحصلش معايا الى حصل ده
اسف على التطويل بس ده كان يوم من عمري حبيت احكهلكم علشان كل واحد رايح يرخص ياخد معاه اي حد يقف جنب عربته يحرسهاله ععبال مايجى (وطبعا الحارس ربنا ) بس اسمع كلامى وخد بالأسباب وبالمناسبة النمرة الجديدة حروفها (هـ ج ) يعنى نفسي اهج من المرور والبلد وعلى راي مش فاكر اسمه ايه ... المهم (لو لم اكن مصريا لأرتحت نفسيا)