مقترحات لتعديل تيريوس

**yaso12** · 18-05-2009 04:51 PM

الى الاستاذ محمد ممدوح
عايز استعين بخبرتك فى حاجة محدش جرب عليها قبل كدة وهى الدايهاتسو تريوس موديل 99 مانوال !!!!
فهل ممكن لو تكرمت تقترح عليها تعديلات جوهرية توصل العربية دى واكيد انته عارف عيوبها
1- تعزيز الثبات فى السرعات
2- زيادة قدره السحب والتسارع
واكون شاكر ليك جدا جدا

**MMamdouh** · 18-05-2009 10:45 PM

انا مش خبير فى التيريوس بس اقدر اقولك ان اللى بتطلبة صعب جدا

اساسا التيريوس المفروض انها جيب بس هى صغيرة جدا.. و بالتالى قاعدة عجلاتها صغيرة و عالية عن الارض... زيادة ثبات عربية بالتصميم دة فلم

و كمان العربية نازلة بمكنة 1300... يعنى امكانية زيادة قدرتها عشان تعمل فرق محترم صعبة

MMamdouh

**Fadi Ezzat** · 19-05-2009 05:25 AM

طيب احنا ممكن نزود الثبات عادى
لكن بالنسبة للماتور ياستاذ ممدوح
هل فية ماتور اكبر يتسقط عليها ولا لأ

**MMamdouh** · 19-05-2009 11:45 AM

المشاركة الأصلية كتبت بواسطة yaso12

سؤال كمان فى حاجة كمان، سمعت ان تغيير هيد الموتور بهد موتور 1600 زى اللى فى الاكسبلوجن هبفرق كتير يا ترى الكلام صح واللا ايه؟

no idea

وهل مسألة تغيير البوجيهات والسلوك والفلتر الى رياضى كافية فى رايك عشان ترفع القدره.

هى حتفرق طبعا بس المهم حتفرق قد ايه... انا اتوقع ان الفرق يكون صغير عشان المكنة اصلا صغيرة

وفى رأيك نزود الثبات الزاى يا استاذ فادى

تركيب جنط اكبر و كاوتش اعرض... بس طبعا المشكلة ان العربية اساسا جيب و بالتالى صعب تلاقى مقاس جنط+كاوتش رياضى يحافظ على حجم العجلة الاصلى

اضافة الى كدة التيريوس اساسا عفشتها ناشفة بس ضعف ثباتها جاى من ارتفاعها الكبير لانها المفروض جيب... و برفرض لقيت عفشة رياضية ليها حتبقى عفشة مخصصة للسباق فى الصحراء مش للجرى على الاسفلت

MMamdouh

**aboelmagd** · 27-05-2009 08:45 AM

اسمح لي ابدي اعجابي بقلمك وتميزك واسلوبك الراقي وتالقك

**tutankhamoun** · 27-05-2009 10:22 AM

يا جماعة زي ما قال الأستاذ محمد ممدح
صعب تعزيز ثبات العربية
عالية عن الأرض
قاعدة العجلات كنزة
تصميم البودي للصحراء مش للجري .

العربية دي فيها عيب تصميم ......... و مش مخصصة للجري أبدا .
التيريوس الجديدة صححوا المشاكل اللي في الموديل القديم .

إنما تعزيز الثبات يكاد يكون مستحيل
و الجنط العريض مش هايعمل حاجة تُذكر علشان بس الناس اللي ناوية تصرف توفر فلوسها علشان مفيش تأثير مميز هاتحصل عليه .

و لا هاتعرف تأخد ملف بسرعة زي العربيات السيدان و لا هاتعرف تزود سرعتك عن حد معين .

ربنا يستر طريقكم .......... ووفروا فلوسكم ........
اللهم ما بلغت اللهم فأشهد .....