الموضوع: مقارنة مهمة بين دايهاتسو سيريون 1500 اوتوماتيك و سكودا رومستر ستايل مانيوال

مميزات السيريون عن الرومستر
- اعادة البيع ولها سوق عن الرومستر
- عمر افتراضي من رايي اطول
- قطع غيار ارخص + عمر افتراضي اعلى
- استهلاك بنزين ااقل
- توكيل جيد

المشاركة الأصلية كتبت بواسطة أبو عبدالله

مميزات السيريون عن الرومستر
- اعادة البيع ولها سوق عن الرومستر
- عمر افتراضي من رايي اطول
- قطع غيار ارخص + عمر افتراضي اعلى
- استهلاك بنزين ااقل
- توكيل جيد

مرحب بيك يا ابو عبد الله, و سعيد بمشاركتك, انا باتفق معاك في كل المميزات اللي انت قولتها و انا بافكر في السيريون بجدية و لكن متردد شوية بسبب صغر مساحة الشنطة خاصة اني متجوز و لدي ابن و كثتر بودي مراتي تقعد عند اهلها اسبوع و بنكون واخدين حاجات معانا مش قليلة, و كمان انا طبيعة عملي تخليني احتاج في بعض الاحيان اشيل كراتين في السيارة, حاجة كمان, انا طويل 195 سم, و خايف من موضوع الراحة و المساحة الداخلية, و كمان هي حاسس ان حجمها من برة صغير, فممكن تكون مش هاتتناسب معايا خاصة اني مدير شركة, و لكني متعاطف معاها جداً و انا مش عارف ليه دايهاتسو مش عاملة عربية سيدان لحد دلوقتي.

الوحيد الي هايقدر يفيدك عملياً هو dr_druggist .....هو ما شاء الله بيمتلك السيارتين

المشاركة الأصلية كتبت بواسطة abou_ruqi

مقارنة غريبة بين فئتين بعاد قوي عن بعض ، وحدة هاتشباك و التانية mpv متعددة الاستخدامات

عاوز عربية كبيرة عائلية آمنة وعافية وتغنيك عن العربيات النص النقل في نقل حاجاتك يبقى رومستر
عاوز عربية مدينة شبابية محندقة يبقى السيريون

هي مش بعيدة قوي, السيارتين مش سيدان, و اعتقد ان الهاتشباك مش بعيد اوي عن السيارة متعددة الاغراض, انا عاوز كل اللي انت قولته في الرومستر, بس خايف من قطع الغيار و ندرتها خاصة اني زي ما وضحت من الفيوم, و خايف كمان من التوكيل, و شايف ان توكيل دايهاتسو محترم جداً, و بعدين انا عايز اقارن بين الاتنين من حيث دي فيها ايه زيادة عن دي و دي ناقصة ايه من حيث المواصفات و الكماليات

المشاركة الأصلية كتبت بواسطة عمرو عمارة

الوحيد الي هايقدر يفيدك عملياً هو dr_druggist .....هو ما شاء الله بيمتلك السيارتين

يا ريت, دي فعلاً هاتبقى مقارنة جامدة, طيب نوصلوا ازاي, معاك ايميله

في إنتظار رأي dr druggist طبعاَ لأن فعلاَ رأيه هيكون القول الفصل لحضرتك .

بالنسبة للسيريون انا عايز ألفت نظرك إنها من جوة مش هتواجه أي مشاكل بالنسبة للراحة و المساحة، لأنها فعلاَ من أوسع السيارات في فئتها و يمكن فئات بعديها !
يعني هي أوسع من سيارات كتير كالنوبيرا مثلاَ و شوف النوبيرا سفينة و السيريون قد إيه !

فعلاَ اللي يشوف السيريون من برة لا يمكن يتخيل وسعها ده من جوة، و رأيي حضرتك ممكن تزور معرض فيه السيارة مع المدام .. و إركب السيارة و رجع الكرسي لحد ما تبقي مستريح في قعدتك في السواقة و خلي المدام تقعد وراك مباشرة و شوف هتبقي قاعدة مستريحة ولا لأ .

العيب فعلاَ إن الشنطة صغيرة شوية .

مش هقدر أفيدك بالنسبة للرومستر لأني مركبتهاش أو سوقتها قبل كدة بس انا معجب بيها جداَ خاصة إن سعرها منافس .

بس شوف إذا كان فيه مركز خدمة قريب لك لسكودا، و مدي توافر قطع الغيار فيه .
و بالنسبة لدايهاتسو أعتقد أقرب حاجة ليك هيبقي مركز أبو رواش الجديد اللي تحت الإنشاء و هيفتح في وقت قريب .. و الفيوم مش بعيدة يعني زي ما كنت بروح من أكتوبر لحد العبور تقريباَ .