اوكتافيا a4 ولا نيو سيراتو

**mohameddawoud** · 28-05-2009 05:16 PM

انا معايا سكودا اوكتافيا a4 موديل 2007 اوتوماتيك عامله 38000 كم فابريكه بالكامل وبفكر ابيعها واركب كيا سيراتو الجديده الهاى لاين ايه رأيكم يا جماعه انا متردد الله يخليكم افيدونى

**M.ABDEEN** · 28-05-2009 05:36 PM

بص يا باشا النيو سيراتو بصراحة تدخل في نخاشيش اي حد لشكلها وقوتها وثباتها وكماليتها وتوكيلها المحترم بس اي فور متينة جدا والماني تشيكي شكلها عواجيزي مقارنة بالسيراتو (معلش ان اسف للتعبير)موتورها اقل قدرة من السيراتو وهو من تكنولوجيا التسعينات لكن هي تحترم بس طبعا لو اوكتافيا اي فايف متفكرش اصلا انك تبيييع

**mohameddawoud** · 28-05-2009 05:46 PM

شكرا يا محمد بس مقولتليش اعمل ايه انا معايا a4 مش 5 وهى مفيهاش مشكله بس الأوبشن اللى فى السيراتو حيهبلنى وشكل التابلو هبل اعمل ايه بس هى الفكره كلها انى طبيعة شغلى كلها ايمدج وبدل وحاجات خانقه كده فياريت تحددلى

**blazer** · 28-05-2009 06:03 PM

بصراحه حرام انك تبيعها و عشان مجرد انك عجباك السيراتو
طبعا انا مش اشد المعجبين بلسيراتوا
بس دا مش سبب كافى يعنى ال a4 ثباتها زى الفل وماتورها محترم جدا قد يكون اقل من السيراتو فى السحب بس مش اوى
ولو كل عربيه جديده نزلت هتغير العربيه يبقى مش هتخلص (امال لما الميجان 3 هتنزل هتشوف كم هااائل من الاوبشنز و التكنولوجى الفضائى)
لو عاوز اوبشنز ممكن تعمل حاجه تنزل اى محل كاسيت كبير و تشترى كاسيت دابل داش touch screen و يكون فيه gps ,DVD player ,TV antenna ,parking camera
وتركب كام سماعه محترمه وشاشتين dvd , و ممكن كمان blue tooth kit
هتحس ان عربيتك بقت حاجه تانيه والموضوع مش هيتكلف اكتر من 10000 جنيه لو جبت حاجات اصليه مش صينى

**M.ABDEEN** · 28-05-2009 06:04 PM

المشاركة الأصلية كتبت بواسطة mohameddawoud

شكرا يا محمد بس مقولتليش اعمل ايه انا معايا a4 مش 5 وهى مفيهاش مشكله بس الأوبشن اللى فى السيراتو حيهبلنى وشكل التابلو هبل اعمل ايه بس هى الفكره كلها انى طبيعة شغلى كلها ايمدج وبدل وحاجات خانقه كده فياريت تحددلى

بص يا باشا الاوكتافيا بتاعت حضرتك لسه بخيرها لسه في عرف الاستهلاك متبهدلتش حرام تجيب نيو سيراتو وتبهدلها مش علشان هي مش حمل بهدلة لا....بس الاوكتافيا للبهدلة معمرة اكتر وانا طبعا معاي سيراتو الشكل القديم وهاموت على الجديدة مووووووووووت ولو جبتها هاركنها علشان اتفرج عليها نصيحة لو بهدلة جامدة قوي ماتبيعش الاسكودا

**enas75** · 28-05-2009 06:29 PM

شوف انا معايا النيو سيراتو .....العربيه ممتازه وشكلها تحفه ومع ذلك بقولك لا.....مش علشان العربيه فيها حاجه
بس عربيتك لسه جديده وعربيه الماني وحلوه ....واذا كان علشان اوبشن زياده كلها حاجات ممكن تتركب ومتحسش انك ناقصك حاجه
كمان لما تغير مش حتحس بفرق كبير ......وانا ضد تغيير العربيه لعربيه تساويها ....وضد التغيير وخلاص....
عايز تغير غير لحاجه اكبر واقوي.....وكمان اوروبي ...معاكش دلوقتي استني لما تحوش كمان شويه وجيب عربيه اقوي باوبشن حلوه
لكن لو عجباك قوي صلي استخاره وشوف

**Ahmed Samy** · 28-05-2009 07:06 PM

زي ما الأستاذة ايناس قالت من موقعها في الذرة ...

ليه تغير a4 عاملة 38000 بس و موديل جديد و كماليات كاملة ؟؟؟

علشان سمارت كي و فتحة سقف ؟؟

طبعا ده حقك ..بس استنى شوية خد خير عربيتك و شوف السيراتو هاتعمل ايه

ممكن ينزل حاجة أحسن ..ممكن تنزل كماليات أكتر (ربنا يهديهم و ينزلو مثبت السرعة و التراكشن كنترول) ...

يبقى ساعتها ...تغير و انت بالك مطمن

بس أنا مش ضد التغيير ....انا عايزك تعيد تفكير من منظور تاني علشان قرارك يكون سليم 100 %

**bishoy02010** · 28-05-2009 07:19 PM

متهيقلى تخليك فى الأوكتفيا وتكمل بيها كده 150 الف كيلو وبعدين تغيرها :) وتجيب العربية اللى انتة عايزها :)

**mohameddawoud** · 28-05-2009 10:28 PM

شكرا يا رجاله على النصيحه وانا كنت فعلا مقرر انى اغير العربيه بس كلامكم خلانى افكر واعتقد فعلا انى استنى شويه انا اساسا لسه مركبتش عربيتى كتير وربنا يخليكم على ردودكم وانتم فعلا نعم العون والأصدقاء

**bishoy02010** · 28-05-2009 10:36 PM

المشاركة الأصلية كتبت بواسطة mohameddawoud

شكرا يا رجاله على النصيحه وانا كنت فعلا مقرر انى اغير العربيه بس كلامكم خلانى افكر واعتقد فعلا انى استنى شويه انا اساسا لسه مركبتش عربيتى كتير وربنا يخليكم على ردودكم وانتم فعلا نعم العون والأصدقاء

لا شكر على واجب :)

الموضوع: اوكتافيا a4 ولا نيو سيراتو

LinkBack

أدوات الموضوع

عرض

-

-

-

-

المواضيع المتشابهه

مقارنة بين اوكتافيا 2006 سيراتو 2009 بوما 2008

سيراتو 2010 sx او اوكتافيا a4

مساعدة.. سيراتو 2011 وكيل او سيراتو 2012 خليجى ( سعودى )

ممكن مساعدتى فى اختيار سيارة كرولا ام اوكتافيا ام سيراتو الجديدة

شاركوني لو سمحتوا اشتري اوكتافيا a4 مستعمله و لا كيا سيراتو جديده

الكلمات الدلالية لهذا الموضوع

المفضلات

المفضلات

ضوابط المشاركة