مساعدة في 316 موديل 2006-2008

**mahmoud69100** · 29-05-2009 09:31 PM

السلام عليكم ورحمة الله وبركاته
حبيت اسال شوية اسئلة بسيطة عن 316 من موديل 2006 ل 2008
اول حاجة هوا الموديل ده بينزل بشاشة ولا كلو من غير شاشة
تاني حاجة ايه الفروقات بين 316 و 320 في الكماليات غير الجير االاوتو والمنوال
تالت حاجة لو الموديل ده بينزل منو بشاشة تقريبا سعرها هيكون كام (مستعملة طبعا)او يعني حوالي كام لانو اكيد طبعا بيختلف من حيث الحالة والكماليات
واخر حاجة ايه العيوب اللي فيهاا
واسف جدا جدا على الاطالة
والسلام عليكم ورحمة الله وبركاته

**mahmoud69100** · 29-05-2009 09:35 PM

معلش يا جماعة مش عارف ليه في كلمة السلام عليكم ورحمة الله وبركاته نسيت الميم في المرتين متاسف معلش الكي برود العربي بتاعها ممسوح خالص للاسف

**som3aa** · 30-05-2009 01:36 PM

اول حاجة هوا الموديل ده بينزل بشاشة ولا كلو من غير شاشة
تاني حاجة ايه الفروقات بين 316 و 320 في الكماليات غير الجير االاوتو والمنوال

الشاشة ابتدت تنزل فى ال316 اخر 2008 و الموديل دا بينزل بشاشة و جنوط (احلى من بتاعت ال320) و فتحة سقف و multifunction و حاجات كتير و كان تمنها جديد 295 الف.
الفروقات فى الكماليات حسب الفئة لان ال316 بينزل منها كذا فئة فى منها فاضية خالص منغير اى حاجة و لا جنوط و لا multifunction و فى منها بتزيد شوية و اعلى حاجة اللى فيها الIdrive.

تالت حاجة لو الموديل ده بينزل منو بشاشة تقريبا سعرها هيكون كام (مستعملة طبعا)او يعني حوالي كام لانو اكيد طبعا بيختلف من حيث الحالة والكماليات

الصراحة معرفش لان عددهم قليل جدا و لسه نازلين مبقاهمش 6 شهور فصعب اساسا تلاقى منهم مستعمل الا فليل , عموما فى اعلان فى الوسيط بتاع امبارح عن واحدة منهم , ممكن حضرتك تكلم صاحب الاعلان و تسال طالب كام.

واخر حاجة ايه العيوب اللي فيهاا

معرفش بصراحة

**mahmoud69100** · 30-05-2009 02:15 PM

مش عارف اشكرك ازاي والله بجد متشكر جدا

**som3aa** · 31-05-2009 02:12 AM

مش عارف اشكرك ازاي والله بجد متشكر جدا

العفو على ايه , ان شاء الله حد يقدر يرد على كل اسالتك هنا بالنسبة للعيوب و سعرها مستعمل كام.

**farahat** · 01-06-2009 11:24 PM

شوف يا عزيزي ..
العربية دي كان نازل منها من أول ٢٠٠٦ فئتين فقط ، أول فئة كان فيها الحاجات الأساسية فقط، يعني تكيف عادي مش ديجيتال و باور هيدروليك و مفتاح تشغيل مع زرار start/stop و كاسيت CD مع تشغيل MP3 و زجاج كهرباء مع إمكانية رفع و خفض من ريموت السيارة و فرش جلد اسود أو بيج و مفيش أي كماليات تانية . و دي كنت ب-٢٤٦ ألف جنيه
الفئة التانية هي نفس الكماليات دي و يزيد عليها فتحة سقف و جنوط سبور فقط و مفيش حاجة تانية ، و دي سعرها ٢٦٢ ألف جنيه

في نهاية ٢٠٠٨ اكتشفوا إن العربية بالسعر دة غالية و مش بتتباع كويس خصوصاً بدون الكماليات ولا الأتوماتيك ، راحوا شالو الفئتين دول و نزل فئتين جداد
الفئة الأولى و هي sportline و دي هي هي الفئة الأولى و زاد عليها جنوط ١٧ و فرش سبور جلد x قماش و بودي كيت "M" و أعتقد كمان مالتي فنكشن ، و سعرها كان ٢٧٥ ألف
الفئة التانية هي trendline و هي نفس الفئة التانية و زاد عليها iDrive و مالتي فنكشن و جنوط ١٧ و أبنوس داخلي، و مش فاكر إذا كان فيها حاجة تانية ، و دي سعرها كان ٢٩٥ ألف

ال-320 تزيد عن ال-316 في حاجات كتير منها الفتيس الأوتو و لكراسي الكهربا و الستارة الخلفية الكهرباء و التلفون بلوتوث و أبنوس الابواب و التابلوه و فتحات التكيف الخلفية و التكيف ديجيتال و لايت باكيدج (أنوار مقابض الأبواب و المرايات الداخلية و عتب الأبواب ).

سعر ال-trendline إلي فيها شاشة لسة غالي شوية عشان مش موجود منها مستعمل كتير لأنها جديدة ذي ما قال الأستاذ Som3aa ، و سعرها لن يقل عن ٢٢٠ ألف إذا لقيتها

العيب الأساسي في العربية دي ان اداؤها مش كما هو متوقع من BMW و دة راجع لأن وزنها تقيل على الموتور ال-١١٥ حصان ، و العيب التاني انها ناشفة شوية عشان الكاوتش ال-run-flat

اتمنى أكون جاوبت على كل أسئلتك ، و أي اسئلة تاني اتفضل إسأل و إن شاء الله يكون في جواب

**mahmoud69100** · 04-06-2009 06:44 PM

انت مش جاوبت على اسئلتي بس ده انت جاوبت على كل حاجة ممكن تيجي في بالي انا بجد عاجز عن الشكر ومش عارف اقولك ايه والله ومعلش تعبتك معايا

**farahat** · 04-06-2009 09:19 PM

يا باشا ماتقولش كدة ، مفيش تعب ولا حاجة ، و إن شاء الله تتوفق للخير

**Hesham256** · 24-06-2009 11:38 AM

بس في سؤال عن رفع و خفض الزجاج ده لازم افضل دايس علي زرار و لا لما اسك هو يكمل؟؟؟؟؟ عشان عند زميلي و بيسك و الزجاج مبيتلعش ده مشكلة عنده و لا ايه؟؟؟؟؟؟