تفاصيل اول او اكتر حادثة بالعربية "وانت اللى كنت سايق "ولسه فكرها لحد دلوقتى

**yoko** · 03-06-2009 11:46 PM

أنا وأنا في السعوديية وقبل إمتحان الثانوية العامة بإسبوع (كان معايا رخصة على فكرة)وموصل إتنين صحابي لقيت زميلي داخل عكس وبيهرج قال هيقف face to face وطبعا لبست الفرامل لكن كان فيه فيلة بتتبني والرمل على الأرض معرفناش نقف قمت أنا لامم يمين قبل ما أخبط عشان الخبطة متجيش في صدر العربية أنا كنت بكرولا ٢٠٠٦ وهو نيسان ألتيما ٨٨
أول ما خبطنا لقيت كبوتو عمل ٨ محترمة قلت بس أنا كده إتبهدلت عربيتي نزلت لقيت عربيتي يادوب الرفرف إتنى على خفيف أنا كنت ماشي قبل الحادثة على ٨٠ وهو كان طالع من ركنة وبيفرك جاب حوالي ٧٠ أما هو بقي إكصدام أمامي (الفبر والحديد الي جوه) ردرياتير وحتت من الموتور إتكسرت طبعا المرور حطها ١٠٠٪ غلطتة عشان ماشي عكس وإستنيت والدة لما يجي عشان مكنش معاه رخصة ولو إتقال إنه كان الي سايق هيتسجن شهر على الأقل وبالعفية سكتنا الجران كان واحد فيهم حالف ليدخل الواد السجن عشان شافة كذا مرة بيأمريك في الشارع ده صلحت الرفرف بحوالي ٤٠٠ ريال لإن إترد على السخن وترش

**yoko** · 04-06-2009 01:00 AM

حتى حدثيتي اليتيمة متعتبرش حادثة
وحادثة كمان بس والدي الي عملها وهو ماشي بالفورد (عربية سيدان ٤٦٠٠ سي سي ٢٢٠ حصان)وكان ماشي على ١٨٠ كم\ساعة وفوت المخرج بتاع الطريق فحب يلف عكس من المدخل !!! (لا تعليق) قام ملبس فرامل ولافف طبعا العربية لفت ولبس في الخرصانة بس الحمد لله العربية موديل ٩٤ وعضمها ناشف يدوب إطبقت حاجة بسيطة
وقال لوالدتي إنوا خبط في عمود وهو بيركن قدام الشغل وصدقت !

**pedro732000** · 04-06-2009 09:17 PM

ياباشا الحمد لله انك اتجوزتعشان تبطل تسرح وتحلم كتير

**TefaShoman** · 06-06-2009 02:27 AM

المشاركة الأصلية كتبت بواسطة ehabbasha30

اول حادثة ليا كانت ظريفة اوى
كنت ماشى بعربيتى ال 128 اللى هى اول عربية جبتها ... كنا بالليل انا وخطيبتى ايام الخطوبة ... وسرحان فى الكلام وكنا بنقول احلى كلام .... كنت ماشى على طريق زراعى وكنت طافى النور وانا مش واخد بالى ...( حب بقى) ... وفجأة لقيت خيال قدامى بيتحرك ...اكتشفت ان النور مطفى قلت افتحة عشان اشوف اية الخيال دة ...عقبال ما اكتشفت وفكرت ونفذت ..كانت المفاجأة ....
جاموسة لقيتها فوق الكبوت ...تصدقوا ...ملحقتش حتى اضرب فرامل
يادوب دخلتلى من الزجاج الامامى وباستنى من هنا وهنا وخرجت تانى ههههههههههههههههههههههههه هههههههههه
الف حمد وشكر.... الجاموسة خرجت سليمة ومماتتش كان زمانى متعلق هناك

الاخيرة بقى ربنا ما يوريكم
اتقلبت مرتين ووقعت فى الترعة
نمت وانا سايق
بنفس العربية قبل الزواج بشهر واحد بس
كانت هتبقى ارملة قبل ما تبقى مدام ههههههههههههه
بس الحمد للة بعد هول الحادثة الاخيرة دى قمت سليم مفيش غير صباعى الصغير بس هو اللى مصاب
خارج من الترعة والعربية مقلوبة ماسك صباعى الصغير

هههههههههههههههه ...

أكتر حوادث دمها خفيف سمعت عنها ...

بس طبعا الحمد لله انها عدت على خير

متخيل المنظر وانت طالع من الترعة وماسك صباعك ... هههههههههههههه

ربنا يسترها علينا ويحفظنا من شر الطريق

**SeiffoZ** · 06-06-2009 02:45 AM

أنا أول حاثة أعملها كانت فى عباس العقاد ...
و كنت على سرعة 15 ..
دوست فرامل فى تقاطع و مكملتش دوس للأخر موقفتهاش يعنى ..
كنت مركز فى عداد الحرارة و باصص فيه للأخر ... و سايب العربية تماما بتاتا ...
قومت لابس فى ماروتى ... الخسائر مفيش الحمدلله ..

الحادثة التانية فى طريق النصر ..
العربية دوست فرامل بس العربية بتتحرك ..
و انا ابص على الالعربية إللى جنبى ... ألاقيها بترجع لورا و الكاوتش مش لبيتحرك خالص و بتترحك بنعومة و انا باصص و مذهول (و الحقيقة عربيتى هى اللى بتتطلع قدام هههه) .. و فاكر إن عربيتى واقفه ..
و هووووب لبست فى اللى قدامى

**Samah AbdAllah** · 07-06-2009 03:48 AM

انا كنت مسافرة وفى نزلاية كوبرى وقف قدامى نص نقل على مطب الفرملة معملتش حاجة بسبب نزلاية الكوبرى العربية دخلت فى النص نقل ولا تتخيلوا شكل العربية بعدها ونشكر حزام الامان والا كان زمانى فى صندوق النص نقل

**dr-mohamed** · 11-06-2009 06:49 AM

ههههههههههههههههههههههههه ههه

والله موضوع حلو وحوادثكم الله لا يعيدها بردو دمها حلو

انا بقة تخصص حوادث ولو حبيت احكي لكم حوادثي ممكن اعملها مسلسل

خدوا عندكم الحادثة الاولى

وانا مسافر على الطريق الزراعي قلت يا واد خد كوبري كفر الزيات وادفع ال3 جنيه وارحم نفسك من دخول طنطا وكفر الزيات (اه على فكرة شكلي معمول لي عمل على الكوبري ده طلعت عليه 4 مرات كل مرة لازم اعمل حادثة)

المهم الليلة اللى قبلها كنت عايز ازود زيت الكارونة والموتور لقيت بتاع الزيوت اللى بغير عنده هيقفل قلت له طب اكشف على الزيوت بسرعة قالي ناقصة ولازم تزودها بسرعة طب زودها يا عم الحاج قالى بكرة قمت انا ايه واخد بعضي تانى يوم ومسافر من الفجر
وانا على كوبري كفر الزيات اتارى زيت الكارونة نشف والكارونة اتحرقت قامت العربية كلها اتكلبشت والعجل الخلفي متحركش وسمعت صوت حاجات بتتكسر والكاوتش بيصرخ في الارض ربنا الهمني مشدش فرامل وسبت العربية تعيش حياتها مع نفسها بعد ما زحفت حوالى 50 ا و60 متر وقفت لوحدها (الكوبري كان فاضي تقريبا لستر ربنا والا كان زمانى ضيعت اى حد ادامي)

نزلت من العربية وببص لقيت علامات الكاوتش ورا المسافة دي كلها ببص تحت العربية لقيت شياط اتصلت بواحد معرفة قريب من مكانى وجاب عربيته وجاب ميكانيكي حاول يصلح الكارونة الاول بعد ما فكها طبعا منفعش قمنا جرينا العربية لغاية اقرب منطقة عمار وسبتها عند ميكانيكي غير لها بكارونة استيراد وللاسف كانت بايظة يا دوب رجعتني القاهرة وغيرتها بواحدة تانية

و دي الحلقة الاولي