اقتراحات لحل الازمه الماليه و الركود فى سوق السيارات
ازيكم ياشباب
انا هاخد من وقتكم دقايق بس معايا هنا فى الموضوع ده ولو ممكن دقايق تانيه للتفكير فى حل او اقتراح
الموضوع ببساطه ان بعض امراء صناعه السيارات مش بيفكروا ازاى يخرجوا من الازمه او يحلوها خالص
لكن بيفكروا انهم يهربوا منها بأى شكل من الاشكال .
ليه مايسيبوش بقى مواتير ال2000 سم3 والاعلى من كده اللى بيستهلكوا وقود كتييير ومصاريف تشغيل اعلى وصيانه اعلى ويعملوا عربيات رخيصه ومصاريفها قليله واكيد الكل هيركبها وكله هيشترى
مثلا:
انااقبل ما اجيب الافيو قلت لوالدى انه يجيب السيفيك 2009 او الشارك 1500 او الهيونداى كوبيه او مازدا 3
طبعا عربيات حلوه كتير ومعظمنا اللى مش معاه زييها نفسه يجيبها
رد والدى رد اقنعنى فعلا .....
انا عن نفسى مش كل يوم طالع على الجبل وعايز عربيه موتورها عالى ولا بجر عربيات على طول ولا شغال بنقل بيها حاجات تقيله واصلا السواقه فى مصر زى الزفت
تركن العربيه تحت البيت تنزل تلاقيها بقت حنطور ساعات بتتعمل عارضه للجون بتاع العيال ولاد الجيران
وياسلام لو ابن جارك بقى موهوب هتنزل تلاقى رسمه شمس وحصان وعروسه
ولو اتنين حبيبه معديين لازم يمضوا قلب بقى وسهم وحرفين
ممكن تبقى ماشى فى امان الله تلاقى واحد رمى نفسى قدام العربيه
انا نفسى اشوف عربيه واحده فى البلد دى مافيهاش خبطه ولا خربوش تحس انك فى حرب فى الشارع
المهم عشان مانخرجش من الموضوع
احنا فى ازمه ولازم ناخد احتياطتنا كويس يعنى بلاش منظره بقى واشترى عربيه بنص مليون عشان اتمنظر بيها
الحل الوحيد اللى ممكن يوقف الشركات دى على رجليها انهم يعملوا عربيات ارخص واقل مصاريف تشغيل
فين عربيات الخلايا الهيدروجينيه فين عربيات الغاز فين عربيات الكهرباء
من وجهه نظرى ان ده هيساعد الشركات دى قوى دلوقتى لازم يعملوا كده كفايه بقى منظره ومواتير جباره هو احنا هنطير بالعربيه والموضوع ده هيكون ليه ايجابيات كتييييير واولهم تقليل الحوادث والتلوث وكتييييييير بس هما يفكروا ازاى يواجهوا مش ازاى يهربوا
دى وجهه نظرى فى الموضوع واللى عنده اى اقتراح ولا تعليق يتفضل بيه
اسف على الاطاله لكن الموضوع انا شايف انه مهم جداا..............
