سلام عليكم
الحمد لله على كل شيء
امبارخ خبطني سواق مكروباص شبه المكروباص
, الحمد لله الخبطة - المقصودة تقريبا - جت في الاكصدام اللي قدام و الحمد لله الاكصدام شالها , و الظريف اني كنت واقف ساعتها , عشان المكروباص اللي هجم عليا و انا في وسط التقاطع يعدي
بس هو كان الحمد لله لا اخلاق ولا سواقة ولا اي حاجة:I_angr1[1]:
ظاهريا العربية الحمد لله مافيهاش حاجة , ماعدا ان لوحة الارقام بتاعة المرور بقت عاملة زي الورقة المعجونة
طبعا سمعت من لسان السوابق - مجازا السواق - ما لذ و طاب مع ان هو الغلطان و ان عربيته ما حصلهاش حاجة , تخيلوا , و لما جه يتحرك تاني زق عربيتي بالميكروباص و طلع
الجزء التاني كان مع الشرطة , أسوأ من الجزء الأولاني
------------------------------------------------------------
الخبطة كانت بسيطة , بس انا بصراحة كانت قفلت معايا اني اخد حقي
طلبت له النجدة , معارفي بيقولوا لي انت تقريبا كنت عايش في امريكا و مش واخد بالك
و طبعا ما جتش , و بعد نص ساعة اتصلت بيهم تاني , لتاني مرة قالوا لي جايين لك
و بعدها بربع ساعة كمان - يعني بعد ساعة الا ربع - اتصل واحد منهم يقول لي بمنتهى البراءة
( هو الواد ده لسه واقف ؟ )
قلت له لأ , قال , طب انت عايز تعمل له محضر ؟
قلت له اكيد , قال لي طب تعال لنا نقطة دار السلام اللي جنبك
خدت بعضي و رحت
هناك قابلني امين شرطة , قال لي طب استنى لما اللي بيكتب المحاضر ييجي اصله طلع في بلاغ
كنت عارف ان الموضوع غتاتة في غتاتة , بس كانت دماغي قفلت بقى
و قعدت
الظريف ان لما امين الشرطة ده شاف العربية , قعد يحاول يقنعني ما اعملش محضر حتى لأن العربية مافيهاش تلفيات , و أظهر لي انه مش مصدقني , بس المهم ان انا اصريت على موقفي
فقلت له , بصراحة انا ليا حق عند السواق ده و عايزه , قال لي ماحدش هايفيدك بحاجة , قلت له يعني كنت انزل اضربه يعني ؟ , قال لي ايوة كنت انزل اضربه !!!!!!!
الأظرف ان في النص و انا قاعد , جاله واحد بيقول له فيه واحد ماسك لنا سيف في البيت عندنا و عايزين حد يطلع معانا , قال له ماحدش هايطلع معاك , قال له طب اروح القسم يعني - كنا واقفين في نقطة مش قسم - قال له ولا حد من القسم هايطلع معاك !!!!!
طبعا عملت المحضر - بعد ما كتبوه اول مرة و نسيوا يكتبوا فيه رقم عربيتي و عادوه تاني - و خدت رقمه و مشيت
من الحاجات الظريفة برده , اني كنت ماشي من غير نمرة قدام الساعة 12 بالليل , و عديت على لجنتين عاااااااااااااادي جدا
عمار يا مصر
طلع سواق المكروباص فاهم صح , و عارف ان ولا حد هايعمل له حاجة , و قال لي كده فعلا ساعتها :POINTI~2[2]:
و انا عايش في بلد تانية و فاكر ان ممكن اخد حقي من بلطجي:O_stupid[1]:
يا ترى الواحد في موقف زي ده يعمل ايه ؟
ينزل يضرب السواق التاني فورا ؟:donatello:
طب و اللي مش هايقدر يضرب البلطجي ده يعمل ايه ؟
يبقى عارف انه كده كده سايب حقه ؟
ولا يعمل حسابه في سيف محترم تحت الكرسي في العربية , اول ما يحصل كده يمد ايده يجيب السيف و ينزل يشرح البلطجي اللي في الميكروباص قبل ما هو اللي يبهدله ؟ :death: ما هي غابة اصلها :36_7_4[1]:
اروح ادفع لاتنين تلاتة بلطجية و اخدهم على الموقف اللي السواق ده بيقف فيه و ازقهم يرنوه العلقة التمام , :evil1: و الله فكرت فيها , بس ما قبلتهاش على نفسي
باعتذر للاطالة , و عارف ان الكلام مكرر , يمكن الواحد بس كان عايز يفضفض
و فعلا انا عايز طريقة لو اتكرر الموقف ده تاني اخد حقي و ما يحصلش معايا كده
سؤال كمان يا جماعة , دلوقت لوحة الأرقام اللي قدام عندي بقت عاملة زي الورقة المطبقة , و مش نافع تركب طبعا و العربية كده من غير نمرة قدام , اعمل فيها ايه عشان اركب لوحة تانية ؟