من اعمالكم سلط عليكم ( واقع من الشارع المصرى )
سلام عليكم ورحمه الله وبركاته
حصل لى موقف النهارده صعب جدا جدا وحبيت اشارك اللى حصل مع الاخوه فى المنتدى
خرجت انا واخويا فى مشوار حوالى الساعه 5 واثناء الطريق كالعاده كان فى منطقه عمل وبسبب عدم النظام والتسابق فى الدخول للممر الوحيد اللى يسمح بمرور العربيات الشارع كله وقف
انا كنت واقف فى وسط الشارع قدامى على اليمين شارع جانبى الناس بتدخل منه والحاره اللى على الشمال فيها اعمل حفر ومقفوله بحواجز يعنى مش ماشى غير اليمين والنص بس
وقفنا حوالى ربع ساعه بالمنظر ده لحد ما ربنا كرم والطريق اتفتح وفجأه لقيت واحد جاى بعربيه 124 من على شمالى وعايز يلحق ياخد غرزه منى ويدخل بينى وبين الحواجز برغم ان ده طريقى انا وهو طالع من الصف وعايز يدخل لوحده من الشمال
اللى حصل ان الغرزه مش هتاخده برغم انى وقفتله خالص لانى بحب اكبر دماغى الا انه دخل بالغصب وخبطلى المرايه كسرها وجرى
جريت جنبه بقوله يعنى ينفع اللى انت عملته ده قالى وانا يعنى اعملك ايه ؟؟
بصراحه انا الكلمه استفزتنى جدا جدا جدا وبرغم كدا حاولت اهدى اعصابى وقولت افهمه غلطه
جريت وراه تانى قولت امشى جنبه اقوله يعنى عيب ومينفعش هو كان فى اواخر الثلاثينات من العمر وكانت المفاجأه
بمجرد ما جيت جنبه رمى على بطريقه مفاجاه وبنيه خبط عربيتى عن قصد لدرجه انى وانا بفاديه بأقصى درجه طلعت بجنب العربيه الشمال على الرصيف وهو مازال بيرمى على علشان يدخلنى فى عامود نور
انا كنت مذهول من اللى بيحصل ومش قادر افسر هو بيعمل كدا ليه لكن كان فات الاوان وخلاص فقدت اعصابى خصوصا انه وهو بيعمل كدا شتمنى بالاهل
فضلت ماشى وراه وهو عمال يفرمل مره واحده ويرمى يمين وشمال عايز يلبسنى فى اى حاجه والنتيجه كانت انه كان هيتسبب فى ان واحد جنبه زنق عليه كان هيخطب ام شايله ابنها وبتعدى الشارع والمنظر كان بشع
حسيت انى لازم اعمل حاجه وانا لازم ابعد عنه علشان يهدى وربنا يسامحه على اللى عمله لكن لقيته مازال بيشاورلى بأيده من الشباك بحركات قذره وبيشتمنى
جن جنونى ومش فاكر بعد كدا غير ان الطريق وقف وانى فجاه وقفت فى وسط الشارع سيبت العربيه مفتوحه وجريت على عربيته لسه بقوله انت ايه اللى بتعمله ده شتمنى تانى
فما كان منى الا انى نزلت فيه ضرب برغم ان سنه اكبر منى بحوالى 10 ل 15 سنه
الموضوع كبر قوى وهو نزل مسك مفتاح الصليبه عايز يكسر عربيتى ودفاعا عن عربيتى مسبتوش انا واخويا الا بعد نوبه ضرب طويله جدا على اثرها مبقاش مركز والناس مسكته وبرغم اننا كنا ولاد حلال وكام مره كان يقع وكنا ممكن نبهدله الا اننا كنا كل شويه نهدى ونقوله خلاص توكل على الله يرجع تانى عايز يتخانق
بعد نص ساعه من الضرب الناس سلكت لنا طريق ومشينا وسيبناه
انا غلطان ومعترف بغلطى انى نسيت العرف والدين والاخلاق وتعديت على واحد يفوقنى سنا وقد يكون عنده عيال فى سنى
برغم انى حاولت اتفاهم معاه اكتر من مره الا انى كنت كل مره بقابل شتيمه وعنف
بس هل لو كنت بلغت عنه كان هيبقى فى حل ؟
هل لو كنت سيبته ومشيت كنت هبقى سلبى والله اعلم كان هيعمل فى مين ايه تانى ؟
هل اللى عملته صح ولا كان فى تصرف تانى المفروض اعمله ؟
الموضوع يحزن جدا وقد ايه شارعنا بقا كله همجيه وقله أدب وقله ذوق من كبير وصغير وبقا علشان الواحد ياخد حقه لازم يكون همجى ويستعمل دراعه
بس ارجع واقول الله اعلم الراجل ده عمل ايه فى مين غيرى ودعى عليه علشان اخر يومه يقع فى ايدى
من اعمالكم سلط عليكم