اقتباس:
المشاركة الأصلية كتبت بواسطة camaro
معلش يا حماعة أنا لي رأي في الأفلام دي ..
إحنا كل فيلم نقعد نقول دة فيه رسالة .. فيه رسالة .. كلمة بتتكرر كثير من ناس كثير مننا أو من المخرجين أو العاملين في مجال التمثيل .. و كلمة ثانية كمان بيقولوها و هي ( دة الفيلم دة بيتناول مشكلة كذا أو كذا ) .. معلش يعني إيه بيتناولها .. يعني بياكلها على العشاء و لا إيه .. لأن دي بقت حجة عند العاملين في مجال السينما و أيضا الكثير مننا بيقولوها ..
و كمثال بسيط فيلم خالد يوسف اللي كان فيه تقريبا عمرو سعد و هالة فاخر و سمية الخشاب و غادة عبد الرازق اللي كان من سنة مش فاكر اسمه بصراحة .. الفيلم دة لما طلع خالد قال دة بيتناول مشكلة العشوائيات و مشكلة كذا و كذا .... يا فرحتي و يا هنايا و منايا أعمل بيه إيه ما الشعب كله عارف إن المشكلات دي موجودة في البلد .. أضاف إيه بقى الفيلم .. لو كان عرض حلول مقترحة للمشكلات دي ماشي تمام أو حتى إسهامات في حلها أهلا و سهلا غير كدة يبقى اسمه في الأول و الآخر فيلم بيعرض في السينما ..
أما موضوع رسالة و مش رسالة فدة كله في رأيي اسمه كلام فاضي .. نتيجة لنفس الكلام السابق ..
أما لو عملت فيلم بتوضح فيه أخطار الإدمان و علاجه ففي الحالة دي الفيلم بيكون له رسالة مثلاَ موجهة للشباب أو على حسب موضوع الفيلم ..
و آسف على الإطالة بس حبيت أقول رأيي ..
هو مش شرط ان الفيلم يقدم حل للمشكله هو ممكن يعرض المشكله من جميع النواحى والقائمين عليها هما ال يقوموا بحلها