الموضوع: ساحة الفضفضة

[frame="10 80"]
(لا تقل يارب لى هم كبير ولاكن قل ياهم لى رب كبير)
[/frame]
بس مش عارف الواحد على قد ما بيبقى حزين ومكتوم ألا أنة بيحاول ينسى أى حاجة لأن ياجماعة الأستسلام للأكتئاب دا ضعف كبير وممكن يوصل الواحد أنة يعمل أى حاجة
ربنا يحفظنا جميعا

انا دايما بفضفض للحيطه او فى النادى بفضفض للشجره
بس بجد بتعب قوى لما اكون مضايق من حاجه او شايل هم حاجه وما اطلعش الكبت اللى فيا
لما اكون ماشى فى الشارع بتعصب واضايق على الناس واقعد اكلم فى نفسى بس فى سرى طبعا
ولما بكون راكب العربيه فى الليجانزا بفترى فيها وبسوق بحده شويه اما الافيو مابعرفش اطلع اللى جوايا عليها بشغل الكاسيت واسرح فى الطريق ولما بكون بلعب بفترى فى المضرب كسرت مضرب قبل كده من الزهق ....
سواء الحيطه ولا العربيه ولا الناس اللى فى الشارع ولا الكوره والمضرب مافيش حاجه فيهم هتقدر تفيدنى بشيئ
موضوع جامد يانور لعل الموضوع ده يهون عليا شويه
دلوقتى انا مضايق من حاجه فى الدراسه
انا فى سنه خمسه دبلوم فنى صناعى قسم سيارات (وحدات نقل ورفع) وده يعتبر القسم الوحيد على مستوى القاهره كلها
المهم ان القسم ده جامد جدا ومستقبله كويس جدا بس المشكله مافيش اهتمام خالص
لأنه القسم الوحيد ومالوش اشقاء ...
طب نعمل مقارنه ونشوف مين اللى لازم يكون فى اهتمام عليه اكتر
قسم تبريد وتكيييف
قسم براده
قسم خراطه
قسم هيدروليك
قسم نسيج
والباقى مش فاكرهم
تعالوا بصوا فى القسم بتاعنا بندرس ايه..
من سنه اولى لغايه سنه خمسه فى 3 مواد اساسيين
التكنولوجيا التخصصيه
ودى 3 اجزاء
محركات كل مايخص المحرك من تركيب وانواع ومميزات وعيوب وكل اللى تتخيلوه عن المحركات البنزين والديزل
شاسيه كل مايتعلق باجزاء نقل الحركه من جير بوكس وقابض ووصلات وكرونه واكسات ومحاور كل حاجه
كهرباء كل مايتعلق بكهربه العربيه من البطاريه والمارش والدينامو والموزع والانوار وكل حاجه برده
دى ماده واحده
بعد كده فى ماده الرسم
من اولى لثالثه
رسم مناظير ومساقط وتجميع وفك وكلام من ده على الورق (سكتشات)
سنه رابعه وخمسه الرسم بيبقى اوتو كاد 2d 3d
وتيجى بقى ارخم ماده
من سنه اولى لثالثه اسمها ميكانيكا
ورابعه وخامسه اسمها اداء معدات
كلكم عارفين الرياضه2 بتاعه الثانوى العام والفيزياء والكيمياء والديناميكا والاستاتيكا والكلام ده
دى بقى اصعب من ده كله
تخيلوا اى حساب لاطوال او اوزان او معاملات وزوايا وكل مايتعلق بالسيارات بيدرسهولنا فى 5 سنين بس!!!!!
بصوا السنه دى عندنا ايه
وحدات نقل ذات سيور 7انواع من المسا
وحدات نقل ذات جنازير
وحدات نقل ذات قواديس
ناقل بالتثاقل
ناقل ذو البريمه
اللودر ذو القادوس الواحد
اللودر متعدد القواديس
البلدوزر
انتاجيه اللودر
الحفار الهيدروليكى
القلابات
المضخه الترسيه
الطلمبه الطارده المركزيه
المحرك الهيدروليكى
الاسطوانات الهيدروليكيه
وحدات الاداره الهيدروليكيه
السير العدل
السير المقص
السير على شكل حرف v
كل درس من دول فيه مالا يقل عن 7 مطاليب يعنى 7 مسائل وكل مسئله ليها اكتر من 3 4 قوانين عشان تتحل
ياريت على كده وبس
الماده مالهاش كتاب وشغالين من شويه ورق وملازم طب بسيطه
معروفه عالميا ان اى سرعه فى اى قانون اسمها v صح
عندنا فى درس تبقى v فى درس تانى تلاقيها n فى درس تانى تلاقيها w
الرموز بتتحول بمزاجها والمطلوب حفظ حوالى 200 300 رمز وفوق ال 200 قانون
يعنى مره احفظ السرعه v ومره n ومره w وتيجى ساعه الامتحان ممكن تلاقى السرعه بقت f
ازاى ماحدش يسألنى بجد الماده دى بقت بالمزاج
ومعظم الحاجات دى مالهاش لازمه
انتوا عارفين فى سنه 3 كانت اول سنه ليا فى التدريب العملى فى شركه الحديد والصلب
المفروض اننا هنتدرب على عربيات زى اللى فى الكتب بتاعتنا مع ان اللى فى الكتب معظمه منقرض من الاف السنين
تخيلوا الاقى العربيات اللى هنتدرب عليها عامله ازاى
لو حد يسمع عن ماركات ماجروس وزيل وحاجات غريبه والله العربيه ماشيه بالعافيه
يوميا العربيات دى كانت بتخش تعمل صيانه
ومرقعه بالصاج ومكسره والكاوتشات متأكله والمفروض اصلا انها تتحط فى متحف ماتمشيش
دى من قبل الحرب العالميه التانيه!!
الوضع بجد لايطاق
المواد كتير وتقيله جدا وملخبطه خالص وماحدش فاهم اى حاجه فى اى حاجه
والله القسم ده كنز كنت مره فى مؤتمر فى الاداره وبسلم على مدير التعليم الفنى بيقولى انت فى مدرسه ايه
بقوله فى كذا قالى ربنا معاكم يابنى انتوا املنا المدرسه دى اساس التعليم الفنى!
كنت عايز اتكلم وافضح الدنيا بس قولت بلاش
ومن قريب كنا فى معرض المشروعات الصغيره ب15 مايو وكان هناك المحافظ
كان فى مشروع بتاع قسم تبريد وتكييف من مدرسه تقريبا الانتاج الحربى متكلف حوالى 30 او 40 الف
وحده تبريد كامله وكبيييييييره ومكثفات ومواتير كل اللى كانوا موجودين جم يتفرجوا على مشروعى الغلبان ابو 6 الاف جنيه
بجد انا مخنوق قوى من الحوار ده
انهارده كان عندى ماده الاداء
وخرفت فى مسألتين من ارخم المسائل
انا كنت طاحن نفسى مذاكره كنت عايز اجيب مجموع عالى ادخل كليه هندسه ولا فنون تطبيقيه او معهد الطاقه باسوان بس للأسف مش باين اى حاجه
هيبقى قدامى كليات مجموعها قليل زى تربيه وتعليم صناعى
بس مش دى طموحاتى كان نفسى اعمل حاجه بس مش باين (ازمه اقتصاديه وشركات كبيره بتتباع وناس بتطرد من شغلها وامراض وقرف) وكوسه ووسايط
والدتى شغاله فى الاداره العامه للمرور قالتلى لو عايز ادخلك شرطه ولا قوات مسلحه هدخلك
بس ده مش ايفو مش متخيل نفسى امين شرطه ولا ظابط جيش
مش عايز سلطه ولا سلاح وعربيه وحرس
انا عايز ورقه بيضاء وقلم رصاص
ناس كتير فاكرانى عبيط وعيل بقى بجرى ورا العربيات واقعد العب فيهم
اخواتى وابويا وامى بيضحكوا على رسوماتى اللى برسمها فى البيت
ادعولى اعرف اثبت ذاتى وانى على حق ياااااااااارب
وشكرا نور على الموضوع الجامده
ومعلش على الاطاله ياجماعه....

المشاركة الأصلية كتبت بواسطة aif

ما ينفعش نفضفض هنا .... الا لو موضوع عام ... زي الدراسة او الشغل ... زي ما ايفو قال
لكن المواضيع الشخصيه ... موضوع عاطفي ... موضوع أسري .....اكيد ما ينفعش
ده الواحد ممكن مالاقيش صديق يأتمنه على اسراره ......... يقوم ييجي يفضفض هنا على الملأ ....
انت عارف مين اللي ح يقرأ الكلام اللي مكتوب هنا ...... يمكن اكتر من مليون واحد ....... ده مشاع

مظبوووووووووووووووووط