ارجو من الاخوة افادتى

**hobby10** · 06-06-2009 03:24 AM

السلام عليكم

انا ياجماعة معايا لوجان بقالى شهرين بس دلوقتى ومؤخرا جبت للزجاج الخلفى ستارة اللى هى بتبقى شفافة شوية دى وبحط قدام الشماسة الدهبى لما اجى اركنها فى الشمس يعنى المهم اللى كنت بفكر فيه طيب وبالنسبة لزجاج الشبابيك الاربعة انا عملت فرش جلد للعربية الشبابيك حيدخل منها شمس برضه والدنيا بقت حر واحنا لسه فى اول الصيف ... هل اجيب برضه شماسات للزجاج الجانبى برضه ولا ايه الحل وهل اصلا الشماسات دى موجودة ولا ايه ؟؟؟ .......... حاجة تانية برضه كنت بفكر علشان العربية بدأت تتجرح شوية منى مع فتح الباب مثلا مع العربية اللى جنبها او انزل مثلا الاقى واحد ظريف راكن العربية ورايا بس تقريبا راكن عليها الاقى شوية تجريحات فيها (الدهان يبقى مش موجود فى اماكن صغيرة واللون اللى تحته هو اللى يبقى باين ) المهم بفكر اركب للأبواب الصدادات الفل المضغوط اللى اوقات بتبقى فى العربيات الجديدة وبالنسبة لجوانب العربية الاربع قطع اللى بيتلزقوا على جوانب العربية وبيبقوا لونهم رصاصى وبأشكال مختلفة (اللى مقلقنى فى الموضوع ده هو هل الحاجات دى حتفيد فعلا وحتحمى العربية ولا زى قلتها ده غير كمان انهم بيتلزقوا بلزق كده مش فاكرة اسمه بس فى ناس قالولى انه مبيتشلش ولو شلت الصدادات دى العربية شكلها حيتشوه وناس تانية قالولى بيتشال بالبنزين وانا بقى مش عارفة مين الصح) فياريت ياجماعة
حد يفيدنى فى النقطتين دول الزجاج والصدادات سواء للابواب او جوانب العربية الاربعة ..... وشكرا ياجماعة فعلا انى عارفة انى لو محتارة فى قرار عارفة ان فى ناس ممكن فعلا تدلنى وتدل كل اللى محتاج نصيحة ...... سلام وفى انتظار ردودكم.

**Cell_k** · 06-06-2009 03:52 AM

السلام عليكم

اولا مبروك العربية ربنا يرزقك رزقها و يكفيك شرها

بالنسبة للزجاج فى شماسات صغيرة على قد زجاج الابواب و بيكونوا اربعه مع بعض و بيتلزقوا بالاصق الضاغط و حاول تركن العربية فى مكان ضل شوية علشان جلد الكراسى و بالنسبة لكرسى السائق ممكن تجيب شلتة بس مش من اللى فى البيوت

و بتكون شكلها شيك و فيها كل الالوان ديه هتريحك من سخونة الشمس على الجلد .

بالنسبة للصدادت هى فكرة كويسة لكن مش ضرورية قوى انت حاول تحافظ على العربية و لما تطلع من مكان ضيق افتح اول درجة من الباب بس علشان تانى درجة هترزع الباب اوتوماتيك فى العربية اللى جانبك

و انا عارف ان فى ناس بنت حلال نفوسها بفته بيضة تحب تعلم على العربيات الجديدة بنا يكفينا و يكفيك شرهم
و فى نهاية توكل على الله فهو حير و كيل و شغل سورة البقرة فى العربية كتير و ربنا يحفظهالك .

**hobby10** · 06-06-2009 11:46 PM

السلام عليكم
ايه ياجماعة محدش ليه رأى تانى فى الموضوع ولا ايه ... انا بصراحة كنت عشمانة اكتر من كده فى ان الناس حتفيدنى برأيها .... وشكرى للاستاذ Cell_k على رده وعلى الافادة .

**Mahmoud Saloum** · 06-06-2009 11:53 PM

الصدادات فكرة جميلة بس المشكلة ان كل سواقين التاكسى عاملينها. اما الزجاج ركب ستاير جنب وابقى نزلها وانت ماشى وارفعها لما تركن

**Amr_Moh** · 07-06-2009 12:33 AM

v-cool....

**hesham_tawfiq** · 07-06-2009 12:35 PM

الفى كول غالى جدا
فكرة الشماسه اللى بالضغاطه دى هى الانسب او لو ممكن تصرفى اكتر فيه ستاير مخصوص للزجاج الجانبى
اما فكرة الصدادات دى هتبوظ شكل العربيه
حاولى وانتى بتركنى تراعى ان فيه ناس تحف ممكن تركن حواليكى :-)
وهاتى عراقه للكرسى الامامى

**hobby10** · 07-06-2009 05:09 PM

شكرا ليكم جميعا وشكرا يأستاذ هشام على رأيك .... الف شكر على النصيحة

**ash257** · 07-06-2009 08:01 PM

أنا طبعا مش هاقدر اقول حاجة بعد رأي الاستاذ هشام، مع اني برشح الفي كول بشششششدة حتى لو غالي بس تكون درجة لون فاتحة علشان المرور مايتكلمش معاكي.
من ناحية الحرارة الفي كول في الخليج -انا مقيم حاليا في البحرين- ممتاز ممتاز بصراحة تحفة وبيعزل من 75-85% من الحرارة على حسب السعر مع إن درجة الحرارة هنا عالية شوية لأ شويتين بصراحة ومن ناحية الأربع جوانب بتاعة العربية الصدادات كويسة قوي وبعد ماتتشال ممكين يتعالج مكانها بالبولش الملمع ومايسبش أي أثر ولا يأثر في البوية.
وأخيرا بقه ده طلب يا ريت تقولي لنا العربية اللي معاكي مغربي ولا روماني ويا ريت تقييم كويس للعربية قولي فيه عن المميزات والعيوب بتاعة العربية من وجه نظرك.

**hobby10** · 09-06-2009 12:10 AM

السلام عليكم
شكرا على اهتمام الجميع بالرد وان شاء الله حركب الصدادات بس اكيد لازم احافظ على شكل العربية ومش اى حاجة يعنى ان شاء الله وبالنسبة للزجاج بصراحة مع الاسعار العالية اللى لقيتها فى المنتدى هنا فى موضوع من المواضيع للعازل ده اكيد مش حينفع ادفع 2000 جنيه مثلا فى عازل هى حلو قوى عليها شماسات وستارة ورا وكده يعنى ( على فكرة انا سألت على موضوع العازل ده والمفاجأة ناس تقولى الموضوع ده بيبدأ من 1200 وطالع وناس تقولى 80 جنيه وناس تقولى 400 !!!!! ايه الفرق بقى ولا ايه الموضوع الله اعلم ياريت لو حد يفهمنا ايه الاسعار الغريبة دى وايه الفرق بين واحد والتانى ؟؟؟؟؟؟؟؟ ) .................
بالنسبة للوجان هى رومانى الشكل الجديد كاملة العربية ممتازة بالنسبالى الحمد لله
انا روحت صيانة الالف والحمد لله هى بس انا حاسة ان الفتيس فى النقلة الاولى والتانية سعات بتبقى تقيلة بس تعدى يعنى وححاول اشوف الموضوع ده فى الصيانة الجاية ان شاء الله غير وكمان استهلاك البنزين بالنسبالى اعلى شوية من المعدل اللى هم قايلينه ليها يعنى مش 7.2 اعتقد حاجة زى 9 مثلا غير كده العربية تمام عزلها حلو التكيف كويس .... لو حد عنده استفسارات معينة انا فى الخدمة .... وياريت حد يقولنا اى معلومة مفيدة عن موضوع اسعار العازل وانواعه ..... شكرا للجميع

09-06-2009 01:16 AM

بالنسبة للعازل الحراري أجود أشهر نوعين إنتاج أمريكي (على حسب معلوماتي ) :
-3M
-V Kool
إن شاء الله جاري تدبير ظروفي لتركيب النوع الأول لوجود ضمان 10 سنين مش 5 زي النوع التاني , فرق جامد في السعر .
إنضم مؤخرا للمنتدى السيد المهندس / سامر سمير مسؤول النوع الأول و سعر 2000 جنيه سعر خاص لأعضاء المنتدى .
أما عن حالة عربية حضرتك أصبري لغاية قبل 10000 كم بشوية إن شاء الله تلاقي العربية حاجة تانية خااالص (للأفضل) , زي ما حصل معايا في الميجان .