امبارح كنت فاضى اخر النهار فقررت انى انزل احط نيتروجين فى الأطارات و اظبط الضغط فى عربيتى دايو لانوس ...
انا كنت ناوى اعمل كده من فتره بس مكنش عندى وقت ولما لقيت نفسى فاضى قلت مبدهاش و توكلت على الله ...

نزلت للمحل فى وسط البلد (عابدين) و قلت له عايز احط نيتروجين فقام بعمل الأتى ...

* قام بإفراغ الهواء من الإطارات و هى راكبه فى السياره
* احضر جهاز vacuum لشفط باقى الهواء داخل الأطارات
* وصل خرطوم النيتروجين الخارج من جهاز النيتروجين و بدأ بملو الأطارات و كانت بدايه الخلاف بسبب ؟

لقيته ظابط الضغط فى الجهاز على 28 فقبل ان يبدأ قلتله استنى انا عايز اظبط على 32 فبصلى بصه غريبه على انى مجنون و قاللى ازاى بس مينفعش خالص ده كتير قوى و عمرى محد طلب منى اظبطله على 32 قبل كده و بعد جدل و مناقشات ليثبت صحه وجهه نظره و توضيح ان اللى بعمله ده غير صحيح و ضرب من الجنون ... ولكنى ثبت على موقفى فقاللى خلاص هعمله زى ما انت عايز

* المهم ظبط الأربع فرد نيتروجين على 32 و بالمره خليته ظبطلى الأستبن كمان بنفس الشكل
* و رشلى ملمع إطارات ارمورال على الكاوتش هديه من عنده

على فكره نسيت اقول انى قبل النيتروجين كنت بظبط هواء عادى على 28 و بعدين خليتها 30 و عرفت من محمد ممدوح ان الضغط الصحيح هو 32 صيفا و شتاء

الموضوع ده اتكلف 25 جنيه لل 5 إطارات

نيجى بقى لملاحظاتى بعد النيتروجين و ضبط الضغط على 32 :

1- الباور ستيرينج تحسن بشكل ملحوظ

2- سحب السياره و تجميعها تحسن

3- النعومه فى المطبات و الحفر كما هى (يعنى محسيتش بفرق قيل النيتروجين عن بعده و ايضا محسيتش بفرق قبل ان اظبط على 32 و بعد الظبط على 32 يعنى محسيتش ان العربيه نشفت ولا حاجه لآن كتير من الناس قالولى لو ظبط على 32 هتلاقى العربيه ناشفه معاك فى المطبات وده محصلش النعومه هيا هيا متغيرتش

4- ما تضحكوش عليا فى النقطه دى وهيا انى حاسس ان العربيه بقت اعلى من الأول ( انا بقول جايز بيتهيألى)

5- الفرامل ادائها بقى اقل بنسبه بسيطه جدا يعنى حساسيه الفرامل اتغيرت ودى النقطه الوحيده اللى
مستغربلها و فى نقس الوفت مش لقيلها تفسير مقنع و نفسى حد يقوللى ايه تفسير ده ؟

بس هيا عموما مش مضيقانى و بقول برضه يمكن بيتهيألى ... هوا ده اللى حسيته و انا مروح امبارح من وسط البلد للهرم

انا فى المجمل مبسوط من التجربه و حاسس ان العربيه بقت احسن من الأول علشان كده حبيت اشارككم فيها و مستنى تعليقاتقم و بالذات على موضوع الفرامل ده

تحياتى ....