الموضوع: حوار من القلب للقلب - الجزء الثاني

ايه يابروف انت هربت ولا اييه ؟؟

أنا موجود كنت برة بس طول اليوم و كان يوم مهلك

المشاركة الأصلية كتبت بواسطة A7MED_PHARMA

ليه طيار بالتحديد..يعني كان مجرد رغية..؟؟
وللا عشق خاص للهروب من كل ماهو أرضي؟؟

لا لأني بحب الطيران خصوصا
و كمان كنت عايز أبقى طيار حربي مش علشان اتنطط على الناس زي ما معظمهم بيعملوا
لآ لأن انا بحب الحاجة دي و أنا مؤمن ان الإنسان بيؤدي بأقصى ما عنده أن لم تزيد في أي حاجة بيحبها
و بعدين دي مش أي حاجة دي البلد اللي أي واحد يتمنى يدافع عنها

المشاركة الأصلية كتبت بواسطة evoo90

بص يابروف بلاش باشمهندس دى لاحسن سواقين المكيروباص بقى يتقالهم يابشمهندس :)

هى قصه صغيره ومنها هاتحل الاسئله ..

بص يابروف

لو صاحبك لاشفته قبل كده ولا شافك بس اصحاب على النت بس مثلا وجه فى يوم اقترح عليك خطه كبييييييييييره لمشروع كبيييييير يمكن يكون للبعض مشروع مجنون كتير هايضحك عليك وكتير هايحبطك . ونسبه نجاح المشروع ده اقل من 40% خسارته ولا حاجه سوى انك هايتقال عليك مجنون وعبيط ومكاسبه انك هاتبقى حققت حلم ملااااااين وهاتبقى محبوب من كل الناس وحاجات تانيه كتير هاترفع من اسمك ...

علل :
او استخرج من القطعه زى مافى الاعدادى :)

ايه هايكون ردك عليه لما يقترح عليك ده ؟

وهل ممكن تنسحب فى يوم من المشروع ده ؟

واد ايه من وقتك ومجهودك ممكن تكرسه للمشروع ده ؟

وهل ممكن تحطه من اولويات حياتك ؟

يلا يا بروف فى انتظار نتيجه التحليل ;)

ماشي يا كبير البروفات ( زي كبير مهندسين كدة :) )
و الله انا موافق جدا
ليه لأن الإنجازات مش بتتم غير بالتجربة و المخاطرة و انا لما اجي أقعد اقول على كل حاجة جديدة او غريبة دي مش مضمونة و اخليني في التقليدي أحسن كدة أنا هبيع فول و طعمية
و كمان أنا مؤمن أن اللي إن شاء الله هيصنع أول سيارة مصرية مليون % هيكون عمل كدة
و معنديش مانع ادخل في مشروع و يا سلام لو كان مشروع علمي أو هندسي يا سلام دة قمة المزاج عندي
بس لو مشروع تجاري لو الفلوس اللي معايا تسمح ادخل مدخلش ليه
و بالوصف اللي انت قلته دة يبقى مش هنسحب منه و هخصصلع وقت كبير من وقتي و هحطه من أولويات حياتي علشان زي ما أنت بتقول يرفع من شأني و يا سلام لو يرفع من شأن البلد كمان
( علىفكرة يا أحمد انا فيه في دماغي كام فكرة كدة نفسي أنفذهم ممكن يكونوا السبب في اللي انت قلته )

المشاركة الأصلية كتبت بواسطة esraatefa

ايه دا.... دا تهديد ولا ايه؟؟:b4_611:

لا لا تهديد إيه ؟
دة أنت في دور أولادي و حد يهدد ولاده برضه
محدش يتخدع في كلمة أولادي دي دة انا لسة هتم ال 22 في آخر السنة بس دائما بحب أخزر مع أصحابي اللي أصغر مني و أقول لهم أنتوا اولادي

المشاركة الأصلية كتبت بواسطة evoo90

ايه يابروف انت هربت ولا اييه ؟؟

لا يا كبير موجود بس زي ما قلت فوق كان يوم مهلك و انا أساسا صاحي من الساعة 12 يوم 24 و لسة منمتش لحد دلوقتي علشان كان مطلوب مني أنفذ 2 فيديو هيتعرضوا في حفلة و للأسف مخلصتش إلا واحد و التاني كنت بخلصه في الحفلة

المشاركة الأصلية كتبت بواسطة esraatefa

1-عرفنا بنفسك كما تراها انت؟
شخص بسيط بحب الناس اللي نفسي يسيبوني في حالي بحب اعمل حاجة مفيدة نفسي زرع بذرة خير علشان تكبر و تبقى شجرة , دائما مفهوم غلط , عاطفي شوية , مش بحب الخداع
واحد تفكيره لم ارى شخص عنده نفس تفكيري ( في مواضيع معينة )
نفسي الاقي الحترام من اي حد لأرائي و طباعي

معلش مش عارف أوصف نفسي بصراحة


2-هل عملت حاجة قبل كدا وندمت عليها ؟
اه عملت للاسف


3-شوفت حد من نايل موتورز صدفة؟وكان ايه شعورك ساعتها؟
شوفت عضو معانا في المنتدى بس هو عضو غير نشيط


4-عرفت حد وندمت انك عرفته؟
لا الحمد لله لن كل الناس اللي عرفتها كلها في نفس طباعي

5-ماذا يعنى لك:
نايل موتورز&الصداقة&الشهادة الجامعية&مصر&النت

نايل موتورز : ههههه اللابتوب مفتوح 18 ساعة في اليوم
بصراحة نايل موتورز انا شايفة هو بيتي التاني علشان كدة أنا بهرب من الدنيا و كل الناس اللي فيها و أجي هنا

الصداقة : الصداقة شئ جميل جدا جدا ( أنا أصحابي ميكملوش عشرة ) و بحبهم جدا جدا و بحاول اخدمهم على قد ما أقدر و بحب ايام الثانوية و المرحلة اللي قبلها على طول علشان كنا متجمعين مع بعض و للأسف دلوقتي انا حزين جدا لأن كل واحد هينشغل في حياته و هيبعد عن الباقيين
بس فيه حاجة مزعلاني من أصحابي ..... مش بيسألوا و دائما أنا اللي بطلب و أسأل و دائما لو عرفت ان فيه حد فيهم سافر يقضي يوم محدش بيقولي مع أني بلغتهم يا جماعة لو أنتوا مسافرين قولوا لي اجي معاكم مع العلم أني عارف أصحاب أصحابي و كلنا عارفين بعضنا ( الحمد لله تأكدت ان مفيش حاجة هما متدايقين مني فيها )
و عندي مشكلة .... مش عارف هل اقدر اعمل اصحاب تانيين و لا لا في حياتي لأن أصحابي دول كنت متقوقع فيهم كدة و مش بعرف أتصاحب على حد تاني


الشهادة الجامعية : مجرد ورقة أهميتها انها بتعرفني أني خلصت مرحلة في حياتي و داخل على التانية
و كمان بتعرفني أني حققت رغبتي أني أبقى مهندس ( شكلا فقط ) بس فعليا من الشغل و الخبرة طبعا

مصر : دي بلدي و حاسس انها مظلومة علشان المصريين عمالين يشتموا في مصر بالرغم من أن مصر كبلد ملهاش دعوة و لكن العيب في الاشخاص نفسهم
و بفرح جدا جدا لدرجة اني بقعد أتنطط من الفرحة لما أسمع حاجة حلوة أو إنجاز عن مصر

النت : مكتبة معلومات كبيرة جدا جدا و وسيلة للتواصل و كمان سلاح ذو حدين


6-مين كان له التاثير الاكبر فى حياتك؟
لحد دلوقتي مفيش بس انا نفسي أطلع زي جدي لأن أنا شايف فيه التصرفات و الخلق المثالي اللي انا عايزه و كمان الناس كانت بتحبه


7-ماهو المكان اللى كلما ذهبت اليه تشعر براحة نفسية؟
مرسى مطروح


8-هل انت راضى عن نفسك؟
لا و ألف لا
فيه حاجات غلط عملتها نقط سوداء في حياتي
محاولتي التصرف بمثالية و عقلانية و منطق بتظهر ضعفي و انا مدايق من الموضوع دة
علميا الحمد لله


9-سرك بتقوله لحد ؟لو اه مين ولو لا لييه؟
آه بقوله لنفسي لأني تعلمت ( مع كامل حبي و إحترامي للناس ) أن مفيش أي شخص موضع ثقة دلوقتي مهما كان


10-ممكن تتجوز واحدة اكبر منك؟او جنسيتها اجنبية؟
لو حلوة ليه لا ههههههه
لا لا أظن دائما الرجل هو المسؤول عن بيته و عماد الأسرة و هو أقوى شخص في الأسرة ( رؤية شخصية ... ) فلما أتجوز واحدة أكبر مني أو حتى أطول مني هيكون الراجل عنده إحساس بالضعف أمامها


11-مين هو مثلك الاعلى؟
جدي لوالدتي الله يرحمه

12-ايه اللى بتحب تسمعه فى العربية وانت سايق؟
العربية قديمة و مفيهاش كاسيت و كمان كل فين و فين لما أسوق العربية

13-ماهو فيلمك المفضل؟
الكوميدي بس بحب الفيلمين بتوع " الطريق إلى إيلات " و يوم الكرامة جدا "

14-ايهما تحب الشتاء&الصيف&الربيع&الخريف� �
الصيف نظرا لأن قبل كدة كانت ذكرياتي الممتعة كلها في الصيف
و برضه ذكرياتي السيئة كانت في الشتاء

15-ماهو اكتر موقف مضحك ومؤلم حصلك؟
موقف مضحك " دائما بيطلعلي الشعر في الأكل أو الشرب عند أي حد مش عارف ليه أنا الوحيد دونا عن الكل "
و مرة من المرات كنا في قطر المهم أنا عندي حوال 6 سنين ( العبد لله رادار أبراص و سحالي ) كنت في الحمام بعمل زي الناس و الباب كان مفتوح ببص كدة على الارض جنب رجلي لقيت سحلية خضراء بعيون حمراء انا شوفت المنظر دة و جبت من 0-100 كيلو في نص ثانية جري على بابا و ماما ساعتها و لما رجعنا نبص عليه لقيته واقف زي ما هو
مرة كنت قاعد على الكومبيوتر بتاع البيت الديسكتوب الله يرحمه و الاقي الستارة بتتهز اقول لا عادي مفيش حاجة و كان باليل و مرة واحدة و انا بضرب بعنيا على الارض لقيت فأر واقف بيبصلي والدتي عرفت كدة عمالة تضحك و تقولي يعني كان عايز يكلم أصحابه

مؤلم " لما اتهمت اتهامات من أصحابي ( اللي كانوا معايا في السفينة ) في سلوكي الشخصي بجد ساعته كنت حاسس بإكتئاب فظيع "


16-اازاى عرفت المنتدى؟
كنت ببحث على النت عن حاجة بخصوص العربيات فتوصلت للمندى قرأت فيه شوية و لقيت الناس محترمة و جميلة و أسرة كبيرة فإشتركت في المنتدى على طول و دة كان يوم 12 مارس 2008 كنت ساعتها قاعد عاطل عن الدراسة:) و على فكرة انا مليش في المنتديات و الكلام دة هو نايل موتورز بس

17-لما بتكون مضايق بتعمل ايه؟وايه اكتر شئ بيضايقك من اى شخص؟
و لا حاجة و اللي بيضايقني هو عدم الإحترام ( و دة عندي له صور كثيرة )

19-ماهو هدفك فى الحياة؟
أني أعمل حاجة ترفع رأس بلدي و تكون أحسن من الدول المتقدمة ساعتها هحس أني عملت حاجة كويسة
و قد تكون صدقة جارية لي

20-ايه اللى ممكن يخلى دمعتك تنزل؟
لما نفسي بتصعب علي
لما بشوف موقف مؤثر ( آخر مرة دمعتي نزلت من حوالي أسبوع كنت بتفرج على فيلم ألف مبروك و دمعت على اللي حصله في النهاية )

21-بتدخل على اى قسم الاول لما بتدخل المنتدى؟
العام أو الإجتماعي

22-سؤال اخير لولبى:)
لو عرقت انك هتموت بكره(بعد الشر طبعا) هتعمل ايه؟
هستغفر ربنا عن اللي عملته
هسلم على كل الناس حتى اللي عملوا معايا مواقف وحشة و أسامحهم على اللي هما عملوه
هكتب وصية أن أهلي يتبرعوا بأعضائي لأي مريض
هروح ألم كل الفلوس اللي لي حتى لا أكون من أسباب عدم دخول اي شخص الجنة بسبب ديونه اللي عليه لي
و لو حد مش معاه هسامحه في الفلوس و أخلص ذمته



بالمرة بقى مادام بنسأل من هو مخترع السيارات؟
Nicolas-Joseph Cugnot

المشاركة الأصلية كتبت بواسطة esraatefa

اتفضل بقى عصير ليمون يروق اعصابك

ولو افتكرت اى اسئلة تانيه اكيد مش هتأخر:)



شكرا على الليمون
بس إيه الزجاج اللي على الطرف دة هما مش عايزين حد ينط من برا الليمون و لا إيه ؟

المشاركة الأصلية كتبت بواسطة pro_samir

مجيتش لية مقابلات طنطا قبل كدة ؟ تالت مقابلة كانت قريب وأكيد انت شوفت الموضوع

جاوب بصراحة وبوضوح وإلا

و الله العظيم كنت جاي بس يومها الصبح والدي قالي عايزك النهاردة بالليل علشان أساعده في تجهيز حاجات كنا هنوديها تاني يوم القاهرة

بس انا قلت يا ريت لو خلصت و الحق اي حاجة من المقابلة بس للأسف نزلت معاه الساعة 8 و مطلعناش الا بالليل متأخر

قشطة جدا
احكيلنا بالتفصيل الملل اوى ده..عن
1- هواياتك
2-نظرة مجملة عن رؤيتك للحياة
3-الافكار اللى بتدور فى دماغك لما تبقى لوحدك(مهما كانت تافهة)
4-المبدأ الاول والاخير..قول مبدأ واحد بس ممكن تمشى عليه
5-سؤال كان نفسك حد يسألهولك وتجاوبه....لازم تحط سؤال بإجابة ماليش دعوة

اظن الاسئلة واضحة وليها نماذج اجابة وكلها من جوة المنهج
بس لو مش عايز تجاوب على رقم3 براحتك عشان ممكن يكون تدخل فى خصوصيات حضرتك

باقى من الزمن 24 ساعة

خليك فى ورقتك وماتبصش فى ورقة زميلك لو سمحت

المشاركة الأصلية كتبت بواسطة Mzeid

ماشي يا كبير البروفات ( زي كبير مهندسين كدة :) )
و الله انا موافق جدا
ليه لأن الإنجازات مش بتتم غير بالتجربة و المخاطرة و انا لما اجي أقعد اقول على كل حاجة جديدة او غريبة دي مش مضمونة و اخليني في التقليدي أحسن كدة أنا هبيع فول و طعمية
و كمان أنا مؤمن أن اللي إن شاء الله هيصنع أول سيارة مصرية مليون % هيكون عمل كدة
و معنديش مانع ادخل في مشروع و يا سلام لو كان مشروع علمي أو هندسي يا سلام دة قمة المزاج عندي
بس لو مشروع تجاري لو الفلوس اللي معايا تسمح ادخل مدخلش ليه
و بالوصف اللي انت قلته دة يبقى مش هنسحب منه و هخصصلع وقت كبير من وقتي و هحطه من أولويات حياتي علشان زي ما أنت بتقول يرفع من شأني و يا سلام لو يرفع من شأن البلد كمان
( علىفكرة يا أحمد انا فيه في دماغي كام فكرة كدة نفسي أنفذهم ممكن يكونوا السبب في اللي انت قلته )


[CENTER]

يااااادى الفضايح مخصوم منك 30 يوم الشهر ده يا بروف