قطع الغيار الاصلية والمضروبة فى الـ 127 ... راى الخبراء ضرورى عشان احترت كثيير

السلام عليكم ورحمه الله وبركاته

انا من اشد محيبى السيارة 127 خصوصا التوب

ولكن منذ فترة اعترف لى احد الأصدقاء بأنه كان يعانى من صيانة السيارة 127 ... فى نفس الوقت اخبرنى احد الأصدقاء بأنه قام بتغيير السيارة الى الكترونى وريح دماغه

بصراحة لم افهم شىء

واثناء الاطلاع على معلومات كثير من خلال منتدانا الأكثر من رائع علمت "أنه مشكلة الفيات هى قطع الغيار المضروبة فى بير السلم ومعروف ان عمرها الأفتراضى ليس كبير"


السؤال : ما هى الأجزاء التى يمكن تغييرها فى السيارة الـ 127 واستبدالها بقطع غيار من ماركات اصلية محترمة صعب ان تكون مضروبة .... خصوصا الأجزاء الأساسية فى كهرباء السيارة او فى عفشة السيارة

احد الاصدقاء كان يتحدث مثلا عن المساعدين الرياضى وكيفية تركيبهم مع السوست فى السيارة الـ 128


يا ريت اعرف ايه الأجزاء التى ممكن تغييرها وسعرها ونوعها

امثلة: استبدال المارش او الموبينا او الاسبراتير او البوجيهات .... او اى قطع غيار ترى انه من المناسب تغييرها بقطعة شبيهة فى سيارة اخرى ... الخ

بالطريقة دى اقفل باب الميكانيكية والكهربائية الى حد ما ... والله اعلم


مع اطيب التمنيات
اخوكم حسين غزالة

فى الانتظار ... ولا العربية موش اد المقام

شوف انا مش هاقدر ادل حضرتك على ايه اللى يتغير و ايه اللى مش هيغير

لكن نصيحتى ليك الا تعدل فى العربيه كأساسيات (موتور - شاسيه - عفشه) تحت اى ظرف كان لاننا لن نعرف عن العربيه اكثر من الشركه التى صنعتها بتلك المواصفات

اما من حيث موضوع قطع الغيار المضروبه فالموضوع كله متوقف على ضمير صاحب محل قطع الغيار

و بما ان الشعب المصرى 90% منه ضميرهم مات و اندفن من زمااااااااااان فسوف تجد ان 90% من المحلات تبيع قطع غيار مضروبه
اما الـ 10% الباقيين فعلى ما تلاقى واحد منهم

اقول لحضرتك انا على 3 محلات قطع غيار فيات كويسين جدا جدا

1- محل اسمه (فيات 2000) امام سنترال رمسيس فى اول التوفيقيه
2- محل اسمه (احمد محرم) بجوار كليه الهندسه فى المطريه
3- محل اسمه (المركز الايطالى) فى الحرفيين

مع خالص تحياتى

للتصحيح ليس الا

اقتباس:

---

محل اسمه (احمد محرم) بجوار كليه الهندسه فى المطريه

---

المحل أسمه أحمد محرم ودة فى عين شمس وليس المطرية وبجوار كلية الهندسة المحل دة بصراحة محل كويس جدا والناس الى فيه محترمين جدا جدا جدا ً وفهمين هما بيبعو اية وعارفين اية ينفع لأية مش بيبعو وخلاص

الله يكرمك يا استاذ ياسر ... شاكر لحضرتك جدا .... بس معلهش بعد اذنك سؤال كمان

معروض على سيارة 127 باب واحد ايطالى ... اعتقد بيقولوا عليها توب


هل يوجد فرق بين قطع غيار السيارة التوب الايطالى و بين السيارات ذات الاربع ابواب مثل الفيورا على سبيل المثال


هل قطع غيار السيارة التوب متوفره مثل الفيورا ذات الاربع ابواب

وهل لحضرتك راى خاص فى هذه السيارة ونصائحك الغالية تكون ايه من حيث سعرها المناسب ولو اساسياتها سليمة هل بسهولة ممكن تصليح اى شىء يظهر فيها


مع اطيب التمنيات
اخوكم حسين غزالة

ضيف كمان الكيلانى ألى فى شارع شمبليون موزع معتمد قطع غيار فيات

بص يا باشا هو طبعا ً الأساس فى سيارة هو أساسيتها الكويسة تبص على الشاسية والقوائيم وغيره .. ودة طبعا ً شغلة السمكرى الشاطر الفاهم الى هتاخدو معاك فى اى عربية هاتشتريها

أما بالنسبة للفرق ما بين العربيتين انا ركبت الأتنين والأتنين احلى من بعد

بس لو هاتجيب توب هات اخر موديل الى هو 80

والفرق ما بين التوب والفيورا

الفيورا
1- شكل التابلوه أحلى
2- اربع أبواب وسهولة ركوب الأفراد
3- موديل حديث
4- عداد ار بى ام
5- شكلها الخارجى بيبقا أحلى لما تتشد

التوب
1- تابلوه مش قد كدة بس بيبقا موسع العربية من قدام لأنه صغير عن تابلوه الفيورا
2- طبعا ً بيبان بس
3- أخر موديل موديل 80
4- لا يوجد بها ار بى ام ولاكن يمكن تركيبه
5- شكلها الخارجى جيد أيضا ً

الماتور واحد فى الأتنين والصيانة وقطع الغيار هيا هيا

أما بالنسبة للأسعار

بالنسبة للفيورا لو موديل حديث مثل 1986 او 1687 فابريكة جوة هاتعمل فى حدود 17.500

بالنسبة للتوب أخر موديل الى هو 1980 فابريكة جوة هاتعمل حوالى 14

وعلى حسب الحالة والموديل السعر بيفرق

اقتباس:

---

. فى نفس الوقت اخبرنى احد الأصدقاء بأنه قام بتغيير السيارة الى الكترونى وريح دماغه

---

طيب متحاول تفهم منة ياباشا عشان انا عندى 127 و عايز احول الاسبرتير الكترونى و حتى الان محدش رد عليا:(

حط فى بالك ان طقم الكهرباء بتاع ال 127 مش بيعدى ال 35 جنية
أما الألكترونى المشط بس بيعدى 100 جنية

اقتباس:

---

المشاركة الأصلية كتبت بواسطة gasserhassaan

طيب متحاول تفهم منة ياباشا عشان انا عندى 127 و عايز احول الاسبرتير الكترونى و حتى الان محدش رد عليا:(

---

حاول تشترى ابلاتين وكوندنسر فرنساوى او انجيليزى اصلى وان شاء الله المشكلة هتتحل

السلام عليكم ورحمة الله وبركاته

الله يكرمك يا ياسر ... وما انحرمش منك ابدا ....

هو ده الكلام ... تسمح لى ارفع لك القبعة تحية

وكمان احب اشكر الاستاذ maka ... لأنه بدأ الآن فقط فى التعديلات الحقيقية المطلوبة للناس اللى عايزة تريح دماغها بخصوص طقم الكهرباء

يا ريت نسمع وتعرف امثلة كثير زى كده ... نغير ايه فى السيارة الى قطع ممكن تكون غالية ولكن اصلية تريح دماغك من الميكانيكية والكهربائية الخ

بالنسبة لموضوع الالكترونى ... انا سمعته من صديق بيحكى على كهربائى شاطر عمل الموضوع ده وبالطريقة دى صاحب السيارة ريح دماغه تماما بس الكلام ده كان منذ مدة طويلة جدا ... لكن الفكرة نفسها ممتازة واعتقد انه مهما كان تكليفتها لا تقارن مع تحسين اداء السيارة وراحة صاحبها من الكهربائية ورخامة الصنايعية

عن نفسى انا احب الناس الدماغ العالية .... يعنى كلنا عارفين ان الفيات قطع غياره معظمها موش اصلية ولا تعمر كثيرا طيب ايه الحل ... نفضل نشتريها ونتعذب بعد تركيبها ... ولا فيه بديل بس انواع شبيهة فى سيارات اخرى ... اكيد ياسر و maka وكل الاخوة الافاضل عارفين الحل

مهما كانت قطعة الغيار بسيطة اكيد هاتريح صاحبها إن شالله تكون لمبة اشارة .... المهم نبعد عن الصينى على اد ما نقدر

مع اطيب التمنيات
اخوكم حسين غزالة

اقتباس:

---

بالنسبة لموضوع الالكترونى ... انا سمعته من صديق بيحكى على كهربائى شاطر عمل الموضوع ده وبالطريقة دى صاحب السيارة ريح دماغه تماما بس الكلام ده كان منذ مدة طويلة جدا ... لكن الفكرة نفسها ممتازة واعتقد انه مهما كان تكليفتها لا تقارن مع تحسين اداء السيارة وراحة صاحبها من الكهربائية ورخامة الصنايعية

---

طيب عازين حد يكون جرب و يقولى اجيب اية بس و انا هاعمل