موقف شهم من مقدم شرطة

**Ahmed Sharaf** · 14-06-2009 05:57 PM

النهاردة كان عندى اجتماع فى مبنى قدام مجلي الشورى , قلت المشوار صغير آخذ تاكسى اسهل بدل مادور على مكان اركن فية , ورحت الاجتماع وبعد ما خلصت نزلت الشارع اوقف تاكسى علشان اروح عند كوبرى الجلاء - يعنى مسافة صغيرة - وكل ما اوقف تاكسى يقللى معلش مش سكتى وانا واقف سايح من الشمس... لغاية ماجيت اوقف سابع تاكسى وقللى بردة مش سكتى ومشى لقيت مقدم شرطة واقف جنبى وبيبلغ باللاسلكى نمرة التاكسى اللى مرديش يقف وقاللى تعالى هنا ووقف تاكسى ......... أول تاكسة جة وشاورتلة مرديش يوصلنى ولسة بيمشى راح المقدم موقفة وقاللى روح اركب التاكسى , وقال للسواق ورينى الرخص وطفاية الحريق , السواق خد الرخص ومكنش معا طفاية وكمان اعمى مخدش بالى من الرتبة وكان فاكرة صول ورايح واخدلة عشرة جنية ... المقدم قالة وصل البية وتعالالى ... وانا قعدت اتحايل على المقدم يسيبة , وفعلا الحمد لله سابة والراجل السواق قعد يعتذرلى ويقوللى معلش اصل العربية كانت سخنة وكلام كدة .
انا حبيت اخكيلكو دة لان فعلا احترمت الضابط جدااااااااا.

**badblood** · 14-06-2009 06:13 PM

تحيا مصر

**أبو إياد** · 14-06-2009 06:20 PM

والله الواحد لما يشوف حاجه زى كده بجد بيحس بالسعاده الحقيقيه فى ظل ظروف الحياه اللى بنعيشها
الحمد لله

**essamr** · 14-06-2009 06:31 PM

تعظيم سلام

**ahmedhilmy** · 14-06-2009 06:34 PM

مش اكتر من مجرد صدفة و برده تحيا مصر

**ahmed1981** · 14-06-2009 06:54 PM

كان تاكسي أصفر ولا أبيض ولا إسود في أبيض ؟؟

لو إفترضنا إنه تاكسي أسود في أبيض
فحسب تعليمات محافظ القاهرة الهمام (الكلام ده أنا متأكد منه تماماً وهو تعليمات من المحافظ شخصياً) لا يوجد له عداد أو بنديرة والتعامل بالإتفاق
بمعنى إنه لو وقفلك وقلتله على مكان
يقوم يعرض عليك المبلغ
ويا تتفقوا وتركب
أو تختلفوا ويمشي ويسيبك
ومش من حق المقدم الهمام الشهم أن يوقفه
وحتى وهو بيجدد الرخصة لا يسأله المرور عن العداد ولا يراجع على البنديرة

ولو إفترضتا إنه تاكسي أصفر أو أبيض
حضرتك قانوناً بينك وبينه العداد وتوقفه وتركب
ولو لم يقف المفروض المقدم يأخذ رقمه أو يوقفه لو أمكن ويجازيه

**Terrible_DaRsH** · 14-06-2009 07:25 PM

حدث معايا نفس الموقف فى فترة الامتحانات .

مفيش تاكسي كان عايز يروح المشوار , لغاية الظابط قال للسواق وديهم مكان ما عايزين يا اسطي .

انا مستغرب الموقف لغاية الان بصراحة ! بس شيء كويس مش وحش .