الموضوع: هل هناك فائدة من تحديث السوفتوير للسيارة؟

وحوش رينو الأعزاء ، ممكن لو تسمحوا لي أقول كلمتين في الموضوع دة

موضوع تحديث السوفتوير دة مش بيحصل كده لمجرد التحديث ، و مش حاجة تتعمل كل يوم ذي سوفتوير أجهزة الكمبيوتر مثلاً ، لأن الشروط و الوظائف هنا مختلفة
رداً على صاحب السؤال ، هل حضرتك ممكن تنزل ويندوز vista على جهاز بينتيوم III ؟ أو تنزل ويندوز 98 على جهاز موجود إليوم ؟ الإجابة لأ .. ليه ؟ أبسط حاجة عشان مش هتلاقي نفس ال-drivers و الأداء هيختلف و أسباب كتير هتخلي الموضوع صعب جداً ، و لكن ممكن يتعمل .
نفس الحكاية بيعملها صانعو السيارات ، المفروض ميجان II ليها كونترول بتاع فتيس مثلاً ، و دة ليه سوفتوير نزل سنة ٢٠٠٥ و نزل ليه تحديث بعديها في ٢٠٠٦ ، و يمكن في ٢٠٠٧ كان في تحديث تاني و يمكن أكتر من كدة كمان ، لكن الكنترول إلي نزل في ٢٠٠٦ يمكن يكون منزلش ليه تحديث خالص (عشان ممكن يكون نسخة مختلفة من الهاردوير أو من شركة تانية أصلاً غير الشركة إلي وردت نسخة ٢٠٠٥ ).

من هنا يتضح إن حضرتك عشان تعمل تحديث للسوفتوير بترجع للوكيل و تسأل هل النسخة إلي عندي (بيعرفوها من رقم شاسيه عربيتك ) نزل ليها تحديث ولا لأ ، و دة بيتعمل لكل وحدة كنترول من الوحدات إلي عندك حسب طلبك ، يعني هتلاقي الوكيل مثلاً بيقول ليك : أيوة في تحديث نزل لحضرتك في ٢٠٠٩ للكاسيت مثلاً و واحد تاني للموتور و واحد للزجاج الكهربا ، لكن الفتيس أخر تحديث نزل ليه كان في ٢٠٠٦ ، و بيسأل سعادتك هل عايز تعمل التحديث ولا لأ .
لو حضرتك عايز بتعمل التحديث ، لو شايف الحاجات إلي قالها مش مهمة بتقول لأ و تمشي .

بالنسبة للتكلفة ، التوكيل المفروض بيعمل التحديثات إلي بتحل مشاكل بدون مقابل (ذي ما بيعمل تحديث سوفتوير فتيس ٢٠٠٥ مجانا ) لكن دة مش معناه إنه هيعمل تحديث لموديل ٢٠٠٩ مجاناً ، أما التحديثات إلي بتتعمل بناءً على رغبة العميل عشان تحسين أداء مثلاً أو عشان يكون عنده أحدث حاجة (يعني مثلاً يكون أخر تحديث للزجاج بيخلي الشباك يقفل في وقت أقل أو تحديث للكاسيت يخلي الراديو حساسيته أحسن ) ، دة بيكون ليه مقابل ، و في الحالة دي صاحب العربية بيدفع فقط تمن الوقت إلي بيتعمل فيه التحديث و ليس تمن السوفتوير (بيدفع labor فقط يعني )

الخلاصة إن فيه تحديثات بتنزل لكن مش كل الناس محتاجة ليها ، أو على الاقل مش مستاهلة تدفع فيها فلوس إلى إذا كان عندك شكوى معينة من أداء جزء معين ، و ساعتها بترجع للتوكيل بالشكوى و بينزل ليك السوفتوير الجديد إلي يحل الشكوى ، لأن أجزاء كتير من العربية دلوقتي أصبحت بتشتغل بالسوفتوير مش ميكانيكي ذي زمان .