صيانة ال 30000 للألتو !!!
السلام عليكم و رحمة الله و بركاته
اعزائي اعضاء المنتدي الكرام
رحت اول امبارح عملت صيانة ال 30000 للألتو... طبعا 3000 في 11 شهر ده رقم جبار ما سمعتش بيه قبل كده في وسط صحابي اللي عندهم عربيات
المهم
ادي المشكلات اللي كانت موجودة
1- انا مفوت صيانة ال25000
2- دفتر الصيانة بتاعي اتسرق في شنطة اللاب توب لما كسرولي ازاز العربية من شهريت تقريبا... و الحمد لله
3- العربية محتاجه تغيير زيت
4- صوت العربية عالي شوية -و ده اعقد انه بسبب الزيت-
5- لما باشغل التكييف باسمع صوت صفارة في الاول-تقريبا سير التكييف فيه مشكلة-
6- حاسس ان العفشة مش متظبطة.. الله يكون في عون العربية علي النقر و المطبات و المدقات اللي باهريها فيها
7- الغريب ان الفرامل عندي بتصفر علي اقل حاجه "مع العلم اني مغير تيل الفرامل في صيانة ال 15000"
رحت التوكيل الاربع سألت علي مشكلة الدفتر دي و تفويت الصيانة اللي فاتت قالولي مافيش مشكلة بس اروحلهم تاني يوم لأني وصل الدقي الساعة 4 تقريبا
يوم الخميس 9 صباحا كنت هناك. بلغتهم بالاعطال وسيبت العربية و مشيت
ما تم
1- تغيير زيت موبيل 1
2- تربيط العفشة
3- شد سير التكييف
4- مراجعة زيت الفتيس و الباور و المياه الخضراء
ده الطبيعي
اللي مستجد علي الصيانة
5- تغيير طقم البوجيهات
6- تغيير فلر الهوا
7- قالولي تيل الفرامل الامامي عايز يتغير "ده اللي انا مغيره في 15000" ... انا قلتلهم ما غيرهوش لما اجيلكم
و لما روحت باقوله المشكلة كده في ايه ؟؟؟ انا لسه مغير التيل قالي مغيره في ال15000 و دلوقتي 30000 يعني معدل تآكل التيل عندك ثابت و ده بيرجع للاستخدام
طبعا انا ما اقتنعتش نهائي
خصوصا ان التيل اللي فات كان ناحيه بس اللي متاكله و التانية سليمة
قلتله انا مش هاغير التيل
المهم الجزء الاهم في التقرير
تكلفة الصيانة 630 جنيه
الفلتر 110 جنيه
البوجيهات 90 جنيه
زيت موبيل ون 210 جنيه
المصنعيات 150 جنيه
والباقي ضرايب
هي بصراحة العربية طالعة من عندهم كأنها زيرو
بس حراااااااااام لما كل شهرين اروح ادفع 600 جنيه .
في انتظار أرائكم
أسف طولت عليكم
تحياتي للجميع
