-
اتمنظروا بفلوسكم
كلنا شوفنا موضوع بشمهندس احمد عبد المقصود والمغالاة الرهيبة في الزواج بالرغم ان الاسرتين متوسطي الحال
من شوية اتصلت بيا صاحبتي وهي مخنوقة جدا وبتشتكي انها بتتعرض لموقف مشابه من اسرتين قرايبيها بينهم نسب والاسرتين متوسطي الحال زيي وزي معظم الشعب المصري
المشكلة ان محدش من الطرفين الزم الطرف التاني بطلبات فوق طاقته لكن الطرفين عايزين يظهروا بمستوى اعلى من مستواهم
طيب هتقولولي وهي مالها هم احرار
ماشي هم احرار... بس يتمنظروا بفلوسهم بقه وبما ان امكانياتهم المادية ما تتحملش كدة فلازم يستلفوا
ويستلفوا من مين ... من صاحبتي اللي معاها قرشين محيرانها بقالهم كام سنه عشان تجيب بيهم عربية مستعملة كمان مش زيرو
مامتها بتقنعها ان ده بثوابه ... ماشي بثوابه لو فك كربه مش للمنظرة ومغالاة زيادة عن اللزوم
وهي بتقول ان دي مش اول مرة وان ياما ضاعت عليها فرص علشان مش قادرة تجمع فلوسها على بعضها
الفلوس طول عمرها متبعترة في كل ناحية ومفيش شخص واحد استلف لحاجة مهمة فعلا
اشي كام علشان مين عايز يصيف واشي 5 علشان معرفش مين عايز يغير عربيته بعربية احسن واشي 2 علشان معرفش مين عايز كمبيوتر اضاافي لان واحد بس مش نافع مع الولاد
واشي 5 علشان فلان عروسته الزمته بفرح في قاعه 5 ستارز وانها بتشعر بالحرج لما حد يطلب منها مساعده وتكون في مقدرتها بس خلاص هي بتقول بقت حاسة انه استغلال
وللعلم هي لا فرحها كان 5 ستارز ولاعارفه تشتري عربية مستعملة لحد دلوقت
وبتقول ان القرشين اللي معايا في فترة من الفترات كانت تجيب شقه وسط على سبيل الاستثمار وبسبب الفركشة المستمرة دي مبقتش تجيب حتى عربية مستعملة خصوصا انها مش بتشتغل بقالها فترة عشان اولادها وكان في بيبي
وفي الاخر لما رفضت التسليف الاخير مامتها بتقولها ضيعتي ثواب كان ممكن تاخديه ولما ناقشتها ان مفيش ولا مرة كان عن حاجة تستحق وانه كله شغل منظره واللي عايز يتمنظر يتمنظر بفلوسه وانهم ضيعوا عليها فرص كتير قالتها كدة ضيعتي كل ثوابك اللي فات واخدت منها محاضرة طويله عريضه
ولو سلفت تاني يبقه لسه قدامها شهور او سنه على ما تجمع فلوسها تاني مع العلم ان لسه في مبلغ مرجعش لغاية دلوقت ومأثر عليها في موضوع شراء العربية
انا بصراحة جاية في صف صحبتي لان كل واحد احق بفلوسه انشاله يحطهم قدامه ويقعد يتفرج عليهم مدام فعلا مفيش حد بيستلف لحاجة مهمة كلها شغل منظرة وبذخ
بس انا خايفه اكون اخطأت لما وافقتها على رأيها وشجعتها عليه
انتم رايكم ايه ؟؟؟
-
اولا يكون ليا الشرف انى اول حد يرد على موضوعك
لكن مش غلطانة لان فى الزمن ده بقى صعب ان حد يجمع قرشين علشان يدبر بيهم حاله
انما فى ناس بتستلف فلوس علشان المنظره وطبعا ده ميكنش ثواب ولا اجر انا امتى اسلف حد لو محتاج بجد وعاوز فلوس لمرض او يعمل عمليه او مشكلة فى بيته انما علشان فرح ويعمله هنا ولا هنا ولا مصبف لا طبعا صابحتك صح وانتى صح
بلاش بقا كل واحد باصص فى اللى فى ايد اخوه وكل واحد بيحقد على فلوس التانى الناس بقت نفوسها مريضة بجد ومبقش فى عقل ولا تفكير
-
انت على حق و صاحبتك على حق ,
هي أولي بالفلوس دي و خاصة ان ده مش ظرف طارئ أو فك كرب.
-
اولا اشكرك على اثارة الموضوع لانه اصبح وضع عام و ليس حالة فردية
ثانيا صاحبتك قرارها سليم و مساندتك ليها هي اللي عليها ثواب ( في وجهة نظري الشخصية )
ثالثا هي اللي عشمت الناس فيها من بدري .. و المشكلة اللي قد تحدث مع صاحبتها او مع والدتها هي السبب فيها من الاول عشان كرمها الزائد عن الحد
رابعا الحل ( من وجهة نظري ) انها تستحمل الضغط عليها و تحاول تبقى شخصيتها قوية شوية و تفرض مصلحتها اذا لم تضر بمصلحة احد .. و تحاول تعوض الفتور الذي قد يحدث مع صديقتها عن طريق رفع معنوياتها و تقديم هدية لها في حفل زفافها و طبعا هي اعلم بما تحب صديقتها
اخر حاجة انها تحاول تبعد اثناء مناقشتها مع اي حد عن المواضيع المتعلقة بالفلوس و الا تحاول هي الاخرى ان تتمنظر على حد بأنها معاها فلوس عشان تجيب عربية او اي شيء من هذا القبيل حتى تقطع السكة على المتعشمين .. و لكن تظل اموالها على استعداد لتلبية الضروريات للغير و هنا تنتظر الثواب من الله
رأيي قد يكون خاطئ او غير مكتمل الزوايا
-
-
أولا مبروك على البيبي الجديد ..
ثانيا أنا من رأيي أن صاحبة حضرتك عندها حق ..
و من رأيي انها تعتذر بس بطريقتها هي ..
و أنا كان بيحصل معايا موقف مشابه في اول سنتين في الكلية لأنها كانت إقامة داخلية .. فكنت بسافر يو السبت و أرجع يوم الخميس ..
و زمايلي اللي كانوا معايا كانوا بيشربوا سجاير و بيصرف بتوسع .. و يوم الأربعاء بالليل أسمع الجملة بتاعت كل مرة " محمد معاك بس ... علشان أسافر بكرة " و كنت بتخنق جدا .. هي بالنسبة لي أول مرتين كانت ثواب بس لما الامر زاد كان خنقة و كنت على طول بقول لهم يا جماعة أنتم مش تيجوا تصرفوا فلوسكم كلها طول الأسبوع و متعملوش حسابكم أنكم مسافرين في أخره ..
و في الآخر مبقتش أسلفهم خالص ..
-
ممكن تعرضا للمشاكل الأسرية تقولهم انها عاوزة الفلوس (بدون كذب طبعا وهي زي مابتقولي عاوزة تجيب عربية)
وممكن تنصحهم وتقولهم انها هاتديهم الفلوس بس ليه مايوفرهاش طالما انهم هايصرفوها في المظاهر بس لو اصروا تديهم الفلوس وخلاص عشان خاطر والدتها
-
معاكى حق انتى وصاحبتك يا نور لانها لو فضلت على كده عمرها ماهتشترى عربية ولا هتعمل حاجة لنفسها ولولادها وكل ده ليه من اجمل المظاهر والبذخ فقط
خليها عند موقفها هى لو احتاجت فلوس عشان تشترى عربية فرصة ولقطة حد منهم هيسلفها ده يبقا كويس لو رجعولها فلوسها وقتها اصلا
وهى كده مش هتتحمل ذنب ولا حاجة لان الجوازة مش هتبوظ عشان فرح ماتعملش 5 نجوم وحتى لو باظت مش هيبقا ذنبها يبقا ذنب اللى بيدور عالمظاهر
هى تزعل وتلوم نفسها لو حد تعبان ومحتاج فلوس عشان عملية عشان ادوية مش عشان يتفسح ويعمل فرح كلاس
-
اشكركم كلكم بجد لانكم ريحتوني بردودكم بالرغم اني كنت متوقعه ان الغالبية ممكن تعارضني الرأي
هي كدة كدة حسمت الامر مش هاتسلف حد تاني مدام لا يستحق هي مش مضايقها غير موقف والدتها منها وانها جاية ضدها مع ان الوالدة مش مستفيدة حاجة من ده كله والموضوع بعيد عنها تماما
وللعلم هي مش بتتمنظر قدام الناس بانها معاها فلوس ولا هاتجيب عربية لكن مشكلتها انها متعرفش تدكب لو حد سألها دخلك الشهري كام تقول بمنتهى الصراحة لو حد سألها معاكي كام برضو تقول مش محتفظة لنفسها بخصوصية نهائي والناس الفضولية بيستغلوا ده لكن مع الوقت لما حست ان الاسئلة دي فيها نوع من الخباثة و بقت حريصه اكتر
وبعدين هي هاتتمنظر بايه !! انا بقولكم فلوسها متجبش عربية مستعملة وسط ..
وهحكيلكم موقف حصل معاها .. اسرة من قرايبها طلبوا منها مبلغ 5000 معرفش اشمعنه الناس مش بتطلب غير 5 دي !!!
المهم ان السبب ان في ضائقه مالية وانهم محتاجنها ضروري هايفتح سوبر ماركت شرك مع واحد علشان يحسن دخله
تكتشف في نفس اليوم اللي سلفت فيه الفلوس انهم رايحين يخطبوا لابنهم اللي لسه في 3 ثانوي علشان الولد متعلق بالبنت اوي وخايفين عليه من اهمال مذاكرته وخايفين عليه من اهلها وعايزين يظهروا حسن النية وبعدين لما الولد يرجع لعقله ويعرف ان ده لعب عيال هو هايفركش الخطوبة بنفسه
طبعا هم اترفضوا من اهل البنت بس مش ده موضوعنا
والله العظيم والله العظيم كنت هاتنقط من الحكاية دي وخصوصا لما عرفت ان والده بيسأل له في الجامعات الخاصة زي مودرن اكاديمي وغيرها
وبالرغم من كدة والده تعرض لازمة صحية فعلا وكان محتاج مبلغ كبير لعملية مستعجلة وعرضت عليهم فلوس من نفسها لكن كانوا اتصرفوا
وبعد ده كله مامتها تقولها ضيعتي ثوابك وتقولها قلبك اسود مش فاهمة انا ايه سواد القلب في كدة
-
الصراحة اكتر موضوع باكرهه في حياتي هو موضوع السلف انا مش عارف الناس اللي بتستلف عمال علي بطال دي ازاي مش حاسة باي مشكلة كده ده ......
و المشكلة انك ممكن تسلف حد فلوس بس للاسف علشان تاخد فلوسك تاني لازم انت اللي تطلبها منه مع ان المفروض اللي استلف منك يرجعلك فلوسك من نفسه بس ده غالبا مش بيحصل......
وكمان السلف ما يكونش ابدا علشان منظرة ولا كلام فارغ زي ده لازم يكون علشان حاجة اهم زي مصاريف علاج او مصاريف حالة وفاة او .... انما مش علشان واحد عاوز يكمل فلوسه و يشتري عربية و لا يحجز قاعة افراح خمس نجوم .....
Content Relevant URLs by
vBSEO 3.6.0 PL2