تحيه شكر وتقدير لرجالة مرور الاسكندريه

**M.Osama** · 22-06-2009 05:10 PM

اولا حمدالله علي سلامتي انا لسه راجع من اسكندريه امبارح وتحديدا في شاطئ النخيل في 6 اكتوبر

بصراحه المرور هناك بجد نظام فوق العاده واحترام جدا وحصلي موقف معاه قلت احكيهلكم..

وانا خارج من النخيل ورايح علي اسكندريه ومعايا والدتي واخواتي فوجئت بكمين.. كنت شادد الحزام بس الازاز اللي جمبي فاميه واللي ورايا ستاير.. بس لحسن حظي كنت منزل الازاز اللي جمبي وفاكك الستاير اللي ورا بس كنت داخل علي الكمين مشغل الزينون اللي في الفوجات وناسي تماما انه بقي مخالفه

المهم الظابط وقفني.. رتبته مقدم وطلب مني التراخيص وريتهاله.. طلب مني التوكيل وريتهوله.. وقف قدام العربيه كدا وقالي هاتلي النور الواطي والعالي.. طبعا نور ابيض عادي.. لف لفه حوالين العربيه وبعدين قالي اركن علي جمب بعد اذنك

المهم ركنت ونزلتله بقوله خير وبتاع قالي فاميه ورا.. وانا فعلا عندي الضهر فاميه.. قلتله ودي ملهاش مخالفه فوريه ؟؟ قالي لأ الفاميه سحب التسيير.. قلتله اوكي.. بصلي كدا وقالي اسحب ؟؟ قلتلو اتفضل يباشا طبعا اللي تشوفه اعمله..

المهم قلتله طب لو شلته دلوقتي سعادتك ممكن تغيرلي البند لستاير مثلا عشان ادفع عليه مخالفه فوريه.. قاللي طب روح شيله... رحت شلته ورجعتله لقيته اداني التراخيص ومخدش حاجه مني

ظابط فقمة الاحترام والله..

غير كدا في اسكندريه نفسها لواءات كتير جدا واقفه عالطريق وجوا خالد بن الوليد وربنا انا اول مره اشوف 2 لواءات شرطه ماشيين علي رجلهم في الشارع بيتفقدوا الحاله الامنيه من غير عساكر ولا هيلمان

بجد بلد في قمة الاحترام والزوق

وربنا يكون فعون الاسعاف بتاعها انا بيتهيألي الناس دي مبتنمش دا كل دقيقتين عربيه اسعاف معديه فريره

**Ashraf_Ashraf** · 22-06-2009 05:27 PM

والله الواحد بيسعد لما يسمع عن الناس اللى بتفهم ومش هما الاول والاخير لم مخالفات
ربنا يكتر منهم وحمد الله على سلامتك

**hossam_elwani** · 22-06-2009 05:30 PM

ياباشا الرتب الى كانت فى اسكندرية فى الشوارع عشان رئيس الوزراء كان هناك غير كده انسى

**ahmedfawzy14** · 22-06-2009 05:45 PM

اسكندرية كده طول الصيف يا جماعة
لجان فى كل حتة
نصيحة اللى عربيته فى ملصقات وزينون وستاير وخلافه
يجى مواصلات احسن

انا بسببهم مش عارف اخرج بالشاهين بليل
كل مكان لجنة

اول البيطاش لجنة
اول اكتوبر زى ما قال الاخ صاحب الموضوع لجنة
المنشية على البحر ساعات بيسحبوا رخص لو الطريق زحمة
بحرى طبعا قبل القلعة كده لجنة دائمة ليلا طول الصيف
ده غير لجنة المعمورة اول ما تدخل
ولجنة المندرة بعد الكوبرى وانتا رايح المعمورة
ولجنة الكيلو 21
ولجنة سموحة للى طالع من شارع مول زهران
ولجنة على اول شارع الاسكندر من ناحية البحر
ولجنة على اول خالد ابن الوليد برده من ناحية البحر
ولجنة المنشية عند محكمة الحقانية

ده غير اللجان اللى مش عارفها
على فكرة كل اللى لجان دى وقفت فيها للاسف
واغلبهم سحب رخص او تشيل المخالفات

خلوا بالكوا يا جماعة مش عاوزين حد جى يتفسح فى اسكندرية ويرجع منها زعلان

**ahmedfawzy14** · 22-06-2009 05:48 PM

المشاركة الأصلية كتبت بواسطة hossamdoaaaa

ياباشا الرتب الى كانت فى اسكندرية فى الشوارع عشان رئيس الوزراء كان هناك غير كده انسى

لا طبعا

ده مدير ادارة مرور اسكندرية اللواء محمد فوزى
كل يوم فى ميامى بنفسه
ومعاه كل لواءات وعمداء مرور اسكندرية

انا شايفهم بنفسى هناك يوم السبت
وبيروحوا بعد الساعة 3 الفجر

على اغلب لجان اسكندرية بتبقى شادة الحزام خميس وجمعة وسبت
وبالذات من بعد 6 المغرب لحد 11 بليل كده

**Maged_Samy** · 22-06-2009 05:59 PM

اللى ايدو فى الميه مش ذى اللى ايدو فى النار - ربنا كرمك بضابط محترم . بس احنا عايشين فى تسيب تعالى تانى وشوف مهازل العربيات السوزوكى على اول شارع الهانوفيل بطريق مطروح العمومى وسيارات السرفيس وهتغير نظرتك تماماً للمرور بالاسكندرية

**Mohamed_Ibiza** · 22-06-2009 06:19 PM

كل مكان فيه الوحش وفيه الحلو .. والاتنين لازم يذكروا

**جمال** · 23-06-2009 12:16 AM

المشاركة الأصلية كتبت بواسطة maged_samy

اللى ايدو فى الميه مش ذى اللى ايدو فى النار - ربنا كرمك بضابط محترم . بس احنا عايشين فى تسيب تعالى تانى وشوف مهازل العربيات السوزوكى على اول شارع الهانوفيل بطريق مطروح العمومى وسيارات السرفيس وهتغير نظرتك تماماً للمرور بالاسكندرية

فعلا موضوع السوزوكى ده غريب جدا
انا من زمان مارحتش البيطاش , ومن كتر فوضى السيارات عند مدخل البيطاش انا كنت هاتوه و افوت المدخل
كمية رهيبة من عربيات السوزوكى اللى بيسموها ( التناية )وعاملين فوضى عارمة , الغريب اكثر انها بنمر ملاكى و السائقين اطفال لايزيد عمرهم عن ال 15 سنة, كل ده مع وجود عدة افراد من المرور وبيسهلو حركتهم الفوضوية وكل المخالفات موجودة من سير عكس الاتجاه وتوقف خطأ وطبعا مفيش رخص و كل ماتتخيله من مخالفات تلقاه