السلام عليكم ورحمة الله وبركاته


السادة الأفاضل ملاك الجميلة BYD والسادة أعضاء نايل موتورز الكرام



عاوز أحكي لكم عن صيانة أول 1000 كم لعربيتي الجديدة
BYD
وهي علي فكرة أتوماتيك GLX-I

وماخبيش عليكم أنا الصراحة كنت خايف جدا من الصيانة دي بدرجة كبيرة جدا جدا ومرعوب منها من اللي الشكاوي اللي سمعتها من الزملاء اللي قاموا بالصيانة في توكيل الأمل فرع القاهرة بالعباسية وكان أساس شكواهم من سوء المعاملة من القائمين علي المركز والإستغلال والزحام والتأخير والإهمال في التعامل مع السيارات والتهرب من مسئولياتهم تجاه عيوب الصناعة

طبعا ده كلام جامد جدا مني ... بس كله من شكاوي الزملاء وكله مكتوب في الموقع واللي شاكك يدخل ويشوف المواضيع كلها

والصراحة أنا حاطط شقى عمري كله في العربية دي وده مبلغ مش صغير إطلاقا ومش مستعد أنه يضيع بسبب سوء الخدمة في التوكيل

أنا الحقيقة كنت بافكر أعمل الصيانة خارج التوكيل في أي مركز عام يعني مش متخصص في موديل معين خصوصا إن السيارة موتورها ميتسوبيشي وعفشتها وصالونها تويوتا كورولا يعني مش حتتعبني بره كتير خصوصا إن رسوم الصيانة عندهم رخيصة جدا بتوصل ل 30 جنيه فقط بس معاملتهم كويسة لأنه طبعا مش عاوز يخسرك كعميل عنده

ولما وجدت بعض الزملاء بيشكروا في فرع التوكيل اللي في إسكندرية الصراحة إتصلت بيهم علي طول وعرفت مواعيدهم وخدت فكرة عن نظامهم وبيعملوا إيه في الصيانة وكده ونويت أجرب صيانة أول 1000كم عندهم

فقررت عشان ظروف شغلي إني أسافر إسكندرية الجمعة وأكون السبت الصبح اول زبون علي باب مركز صيانة الأمل بالأسكندرية

ووصلت المركز الساعة 9.10 صباحا لقيت المركز علي وشك يفتح لإستقبال العملاء وكان في طابور مكون من 3 عربيات لادا جايين يعملوا صيانة زي حالاتي ففرحت :10D5C8~1107:إني مفيش قدامي ناس كتير ووقفت وراهم فالطابور وكلها ربع ساعة ولقيت طابور طويييييل من اللادا أيشي ملاكي وإيشي تاكسي ملوا المركز قلت الحمد لله لحقت نفسي

مفيش نص ساعة وجالي مهندس الإستقبال البشوش محمد فرج وطلب مني رخصة العربية وملا النموذج بتاعهم وسألني عاوز زيت نوعه إيه ووضح لي اللي حيتعمل في الصيانة ....المهم سألته فين المهندس أسامة لأني سمعت عنه كتير من الزملاء في الموقع ورحت له فعلا والصراحة قابلني بترحاب شديد جدا وعرفته بنفسي وقعدت معاه شوية صغيرة وأنا كنت مجهز ورقة مطبوعة بملاحظاتي اللي عاوزهم يظبطوها في العربية زي مثلا قوة التكييف أقل من العادي وفيه صوت خفيف في طارة الدريكسون وتثبيت جزء من موكيت الأرضية وشوية حجات صغيرة كده...
المهم الراجل أخد الورقة وقعد يقراها بتمعن وفضل يسألني عن التفاصيل اللي أنا كنت كاتبها وصور منها صورة وسلمها للمختص اللي حيقوم بالصيانة وإحتفط بالأصل عنده وطلب مني أنتظر بالإستراحة قلت له ماشي..

طبعا وأنا في الإستراحة كل شوية أبص من الشباك علي العربية بيعملوا فيها إيه ولقيتهم مهتمين جدا بيها وماسابوهاش لحظة رغم طابور العربيات اللي عندهم ورفعو العربية وربطوا العفشة وغيروا الزيت وكشفوا علي كل أنظمة العربية ...

وبعد حوالي ساعتين جالي موظف ينده عليا رحت له قاللي أنهم عاوزيني أطلع معاهم أجرب العربية قلت حاضر

رحت لقيت العربية خرجت علي الباب مع المهندس وركبني جنبه وخرجنا عالطريق نجرب العربية بعد الظبط والصراحة أنا حسيت بإختلاف أول ما ركبت صوت الموتور بقي أهدي والسحب ممتاز والتكييف ثلااااجة وكان فيه ملاحظة إن السي دي بيفصل في المطبات فمشي بالعربية في طريق مليان مطبات ولقيت السي دي شغال تمام التمام

بس ورجعنا المركز وخدوا العربية يقفلوا الشغل بتاعها وقالو لي عشر دقايق وتكون جاهزة....
ورحت أدفع الفاتورة كانت ب 302 جنيه وده ثمن زيت موبيل وان + فلتر أصلي فقط والمصنعيات مجانا

وفعلا ... بعد عشر دقايق لقيتها جاية عند الباب ومغسولة غسلة فلة
بسم الله ماشاء الله

زي ماتكون طالعة من المعرض والله... وركبت أنا والأسرة العربية والأولاد كانو مبسوطين بيها أوي وطلعنا بيها علي الطريق زي الفل

وهنا بقي أحب أفجر مفاجأة من العيار التقيل

أنا فولت من بنزينة موبيل قبل التوكيل بتاع إسكندرية بعد ما عملت صيانة الألف كم فيه يعني بعد ما تخرج من إسكندرية بـحوالي 23كم ومتجه للقاهرة راجع بيتنا وفاتح التكييف ومشغل الراديو ومعايا الأسرة كلها السحب تمام التمام وشديت مع لانسر وكانت زي الفل وعملت أحلي شغل

وبعد ما روحت البيت خلاص وأنا باركن العربية يعني مشيت حوالي 250 كم بعد ما فولت في إسكندرية .... بابص علي عداد البنزين .. !!! إتصدمت ومصدقتش نفسي

لقيت العداد بيقول إن العربية إستهلكت أقل من ربع التانك بشرطة واحدة .....تخيلوا؟؟
والعربية أتوماتيك والتكييف شغال طول السكة
طيعا أنا إستغربت وقلت يمكن العداد بايظ !!! ... بس أنا جربتو كتير جدا وشغال تمام التمام

وده إن دل إنما بيدل علي أن العربية إستهلاكها نموذجي جدا جدا

وعل فكرة أنا كان معايا عربية قبلها علي طول 1300 كان إستهلاكها أعلي من دي بكتير تخيلوا؟؟!!

بس برضه لازم نعرف إن طريقة السواقة ليها دور كبير في معدل الإستهلاك وده جربتوا علي BYD برضه يعني كنت باشد عليها واقرص علشان أشوف حتستهلك بنزين قد إيه لقيتها ممتازة جدا بالمقارنة بعربيات كتير

............................*

علي فكرة طول الطريق وانا رايح كنت ملتزم بسرعة 100كم علشان الردار وكمان كان فيه حادثة شنيعة علي الطريق واللحظة اللي فكرت افتح شوية بسيطة كنوع من تغيير الملل فوجئت بلجنة الرادار المتينة وهبشوا 150 جنيه ربنا يسامحم

وبكده أنهي تقريري عن صيانة الألف كيلوا

وباوجه الدعوة لكل الزملاء حتي اللي عملوا الصيانات من مدة طويلة يحكوا لنا بالتفصيل عن كل اللي قابلهم من ساعة ما دخلوا مركز الصيانة لحد ما مشيوا علشان ده يكون دليل لينا كلنا وممكن نعمل موضوع مثبت عن الصيانات نجمع فيه تقارير كل صيانة علي حدة مثلا 1000كم مع بعضه و ال 5000 مع بعضه وهكذا علشان الفائدة تعم وكل واحد يعرف حيدفع كام وحيتعمل إيه في عربيته ومحدش يضحك عليه ويعرف حقوقه كاملة وعلشان كمان نقدر نقيم أداء فروع الوكيل تقييم مظبوط

مشكورين إخوتي وآآآآآسف جدا علي الإطالة وإنتظروني مع تقرير صيانة الـ5000 إن شاء الله اللي إحتمال أعمله في فرع القاهرة


وربنا يستر