الموضوع: صيانة سوني اريكسون

أنا بصراحة أختلف معاكم (كريم منير وسنهوري) في الكلام على توكيل سوني إريكسون تحديدا.
كان ليا تجربة مع التوكيل في شهر 10 السنة اللي فاتت وكتبت عنها في منتدى الديفيدي وده نصها:

ياجماعة الموضوع ده إهداء إلى كل محبي السوني إركسون وخصوصا أستاذي والسبب الرئيسي لشرائي سوني إركسون M.Rgb.
الموضوع إن أنا إشتريت سوني إريكسون من حوالي شهر P1I تقريبا جديد جدا مفيهوش خدش واحد بس من غير ضمان بسعر تحفة جدا.
المهم الموبايل كان شغال زي الحلاوة معايا: لحد من إسبوع بالظبط البكرة اللي في الجنب بدأت تهيس.بقيت شغالة الإتجاهين إتجاه واحد.بمعنى إني لما أنزلها تحت تنزل عادي ولما أطلع فوق برده تنزل تحت.
طبعا إضايقت جدا وفكرت إني أجرب حظي وأروح التوكيل وأشوف هيقولوا إيه.
المهم رحت التوكيل يوم الثلاثاء الساعة 12 الظهر فرع مكرم عبيد وتقريبا مكنش فيه حد غيري في التوكيل.دخلت على الموظف وحكيت الحكاية وقالي هي بتتغير عادي وتمنها 120 جنيه وهتستلم الجهاز بعد 48 ساعة.
بصراحة أنا كنت متخيل إنها أغلى من كده بكتير جدا ده لو كانت موجودة أصلا:).المهم فكرت إني أعمل كام مكلمة كده في السريع وأدور على حد يسلفني موبايل لممدة يومين وأبقى أرجعلهم بليل أسيب الموبايل يتعمل وأمري لله.
المهم مشاغل الحياة شغلتي ونسيت الموضوع خالص لحد يوم الخميس الصبح قررت أخد أجازة اليوم ده وأنام طول اليوم وطبعا أقفل الموبايل.فقولت طيب أوديه بقى بما إني كده ولا كده مش محتاجه وأمري لله.وفعلا بقيت في التوكيل على الساعة 1 تقريبا وقابلت مهندس خدني وقعدنا في غرفة لوحدنا وشاف المشكلة وقالي هتتكلف 125.قولتله مش مهم الفلوس حتى لو هتتكلف أكتر بس أستلم الجهاز النهاردة.
الراجل قالي لا مينفعش النهارده هتستلمه بعد 48 ساعة.وتقريبا الراجل حس إني مضايق فرجع قالي طيب ثواني أنا هطلع الورشة أشوفه ممكن يخلصوه النهاردة ولا لأ.طبعا مش عاوز أقولكم إرتحت قد إيه.المهم للأسف نزل بعد 5 دقايق وقالي أنا أسف جدا بس بجد هما فوق قالولي عندهم أجهزة كتير ومش هينفع النهاردة فممكن تخليها بكرة الساعة 6.طبعا أنا شكرته جدا على تعبه معايا وسألته سؤال غبي جدا :).قولتله هو الموبايل هيبان إنه إتفك وإتبهدل وكده :) الراجل بصلي وضحك وقالي إنت جايب الموبايل التوكيل مش محل على ناصية الشارع:)
المهم تاني يوم الجمعة (مواعيد العمل يوم الجمعة من 4 عصرا ل10 بليل)إتصلت بيهم الساعة 4:30 سألت على الموبايل قالولي خلص.رحت التوكيل جري وإيدي على قلبي وخايف بقى من إن يكون العيب لسه موجود أو الموبايل شكله إتبهدل أو ...........ألخ.
المهم فوجئت بالمفاجأة الكبيرة جدا وهي إن الموبايل أقسم بالله مفيهوش خدش واحد وحتى مكان المسامير مش باين إنها إتفكت أصلا والبكرة متغيرة فعلا لأنها بقيت أتقل من الأول لأنها جديدة.
المفاجأة التانية بقى إن الحساب 110 جنيه فقط شاملة ضريبة المبيعات:)
بجد أنا مش عارف أقول إيه على قمة الذوق في التعامل والإحترافية في الشغل والأمانة للناس اللي شغالة هناك:)
أنا أول مرة أشتري موبايل ويحصل فيه مشكلة.وبصراحة من كتر مابسمع من أصدقائي في التوكيلات التانية كنت قلقان جدا وأنا رايح التوكيل ده.
أنا والله العظيم قررت إني لما أشتري موبايل تاني هيبقى طبعا سوني إريكسون وكمان هشتريه بالضمان مهما كان فرق السعر لأن فعلا يستاهل.
وفي النهاية أحب أقول شكرا ليكي سوني إريكسون على إختيار توكيل ممتاز ليكي في مصر.
وشكرا ليكي شركة الدلتا على المحافظة على ثقة العميل ورضائه.

ملحوظه مهمة:

-عنوان التوكيل:
شركة الدلتا

1-39 محمد توفيق دياب متفرع من مكرم عبيد - مدينة نصر - بجوار راديوشاك - ت :22873063
2-98 محي الدين أبو العز - المهندسين - ت :37487300
3-7 محمود أبو العلا - كفرة عبده - رشدي - الإسكندرية - ت:5424581
4-برج شجرة الدر - المشاية السفلية - أمام نادي تجديف الشرطة - المنصورة - ت:2252029

-مواعيد العمل طوال أيام الإسبوع من 10 صباحا إلى 10 مساء ماعدا يوم الجمعة من 4 عصرا إلى 10 مساء.

-بتدفع 20 جنيه مصاريف كشف على الموبايل ولما بيتصلح بتم خصمهم من فاتورة الإصلاح.

-فيه هناك دفع بالفيزا.

-كان فيه كذا عميل هناك وأنا بستلم وكان باين عليهم الرضا لما إستلموا أجهزتهم :)


بالمناسبة ناس كتير في قسم السوني إريكسون هناك راضيين تماما عن أداء التوكيل.