الموضوع: وجهة نظر فى أسعار البنزين

المشاركة الأصلية كتبت بواسطة baskota

مع الاحترام لكل اللى اتقال

مين اللى قال ان كل واحد معاه لانوس ولا فيرنا دخله الشهرى يسمحله يحط بنزين 90 ولا 92

معظمنا عارف كتير من الناس بيشترى عربية ازاى وليه

ناس كتير بتشترى بالتقسيط او حتى ينتظروا فترة طويلة يدخروا فيها تمن العربية ولا حد ورث مبلغ بسيط يكمل عليه ويجيب عربية او يعمل 15 جمعية ورا بعض لحد ما يجمع تمن العربية وده مش عشان يتمنظر بالعربية ولا واقف فى طابور ال 80 عشان ياخد الدعم ويبوظ عربيته وخلاص لأ الناس بتعمل كل ده وتشترى عربيةعشان ترتاح وتترحم من زحمة المواصلات وبيشتروها جديدة عشان يترحموا من مشاكل الصيانة والتصليح كل شوية عن ميكانيكى ولا صنايعى
الناس دى ظروفها ما تسمحش بشراء بنزين 90 و 92
وياريت يا جماعة اللى يعيش برة مصر ميقارنش الحياة فى مصر باى مكان اخر لكل دولة ظروفها ونظامها ويشوف هو بيشتغل قد ايه هناك عشان كده دخله عالى
وبلاش نحكم على ناس مانعرفش ظروفها ايه

مع الإحترام برضه للكلام ده المنتدى مليان مواضيع عن اضرار استخدام البنزين 80 مع العربيات الجديدة وانه مضر ليها على المدى الطويل
وحتى لو قلنا نتجاهل نقطة استخدام البنزين الملائم للعربية والمصممة انها تشتغل بيه
خلوني اقول مثال: لو هاتعزم واحد على الغدا والشخص ده معدته حساسة من الفول والطعمية وامكانياتك انك مثلا تجيب فول وطعمية بس ومتقدرش تجيب اكل اغلى من كدا هاتعزمة برضه وتتعبة ولا بلاش تعزمه احسن؟
اظن المثال واضح

دا طبعا مش مجال ان احنا نتكلم عن الفشخرة بتاعة الناس
بس اللي بيحصل يا اخواني الأفاضل ان الناس بيخنقوا نفسهم بعربيات مش قد مصاريفها
يافرحتي راكب عربية 2009 ومش قادر احطلها بنزين وميعاد القسط بتاعها بيبقى زي الهم على القلب

طبعا في رأي هايقولك انه اللي بيعمل كدا بيريح دماغه من تعب المستعمل وقرف المستعمل، وطبعا دا كلام جميل.
بس مستحيل يكون كل المستعمل وحش
انا مثلا والله العظيم كان عندي عربية مستعملة زمان (سوزوكي سويفت) وعمرها ماعطلت ابدا وكانت بحالة كويسة، واعرف امثلة كتييير لناس عندهم عربيات قديمة وحالتها كويسة، واكيد في اعضاء في المنتدى عندهم عربيات قديمة ماشية زي الفل

ياريت محدش يزعل مني بس اجدادنا قالوا على قد لحافك مد رجليك ومظنش كانوا غلطانين

وتقبلوا جميعا فائق الإحترام والتقدير

المشاركة الأصلية كتبت بواسطة BASKOTA

مش معنى ان الانسان يكون عنده طموح ويحاول يحققه فى حدود امكانياته يبقا فشخرة اصل اللى بيجيب لانوس ولا اى عربية من الفئة دى مش بيتفشخر

دى ابسط المتاح فى حدود الامكانيات

ياريت وبكررها بلاش ننصب من نفسنا حكام على تصرفات الاخرين ربنا اعلم بظروف كل انسان

انا بتكلم بناء على امثلة اعرفهم في بعض ناس اعرفهم وجيران وقرايب وعارف معاناة بعضهم في دفع الأقساط وبعضهم فعلا عمل يجي 15 جمعية على ماقدر يجيب العربية زي ماحضرتك قلتي في مشاركتك اللي قبل كدا، واعرف واحد فعلا كان بيحط بنزين 90 للهيونداي فيرنا اول ماشتراها وبعد اول شهرين اشتغل على ال 80 عشان الأقساط تاعباه ودلوقت بيدور على مكتب تأجير سيارات يأجر منه العربية لأننه مضايق من اقساطها
طبعا مثال يزعل لأني بحب الشخص ده جدا وناس كتير نصحته انه بلاش يورط نفسه بس فرحة الجديد لا تقاوم طبعا.
والموضوع مش تنصيب انفسنا كحكام بقدر ماهو امثلة الواحد بيشوفها في الحياة بيفرحوا بالعربية الجديدة لمدة شهر واحد بس وبعدين بيكرهوها مع بداية الأقساط.

وشكرا على المناقشة الجادة