السلام عليكم ورحمة الله وبركاته

النهاردة عربيتى عملتها معايا.......صوت تكتكة خفيفة من الدركسيون عند لفه...........مرتين تلاتة و الصوت أختفى و نورتلى لمبة الأيرباج ولمبة السيرفيس............يبقى أيه ؟ شريط الأيرباج..........برافو يا شُطار

الحمد لله من قبل و من بعد........العربية عاملة دلوقتى أكتر من 96 ألف كم بشوية صغيرين و مازلت حاسس أنها عربية تكاد تكون زيرو.

المهم......نظراً لأنى مش بحب تكون فى حاجة بايظة عندى ( أياً كانت ) توكلت على الله و عملت أتصالين.......واحد لمحمد بك الكبير........قصدى محمد بك مصطفى عشان المشكلة دى حصلت عنده قبل كده......بعد السلامات واللذى منه.........محمد قالى أنه كان فك شريط الأيرباج بمساعدة صديقة المهندس أحمد الدسوقى اللى بيشتغل فى توكيل رينو السعودية على أمل أنهم يعرفوا يصلحوه عند النخيلى.... ( عشان الناس تتخيل أيه شريط الأيرباج....هو عبارة عن كابل عريض شوية زى كابل الهارد ديسك الساتا كده و أسمه Flat Cable ) بعد المحاولات عند النخيلى لم ينجح الأصلاح
محمد برضه كان سأل على تمن الشريط أستيراد فى فرنش موتورز قالوله 800 جم.
كلمت بعد كده السلطان عمرو عبد الخالق.....كنت سمعت منه عن واحد قريب منى عمل شغل عالى مع واحد قريبه..........بعد السلامات و اللذى منه.....عمرو قالى أنه هيجيبلى رقم المهندس ده......5 دقايق و لقيت المهندس هو اللى بيكلمنى.....وصفلى الورشة و كنت عنده بعد 15 دقيقة.

و نظراً لأن مش أى حد ممكن أسمحله يشتغل فى العربية .....قعدت مع المهندس ده نتجاذب أطراف الحديث ( حلوة دى.... ) المهم الحديث كان فى ظاهره ودى و لكن يحمل فى طياته ( دى كمان عجبتنى ) الكثير من الأسئلة اللى عبارة عن tricks يعنى ميجاوبش عليها صح غير واحد عارف هو بيقول أيه.

بعد لما أطمنت و سألت على تمن الشريط ( 650 جم ) توكلنا على الله و أبتدى الموضوع اللى مخدش أكتر من 15 دقيقة.... وكان الموضوع منتهى.

على فكرة........فى العديد من الحلول اللى تخلى اللمبة تطفى بس الأيرباج مش هتشتغل فى حالة الحاجة ليها لا قدر الله...........يبقى بنضحك على مين على العربية و لا على نفسنا.

شريط الأيرباج هو اللى فى الدائرة اللى فى المنتصف ( جواها....مش هيبان غير جزء منه لو دققت فى الصورة الأولى على طرف الدائرة ) الشريط ده مصنوع من مادة بلاستيكية و مع الوقت بتنشف و متبقاش لينة فى الحركة زى الأول.....و الشريط يتقطع.....ده ملخص اللى بيحصل.

عشان مزيد من السهولة بس......بيغيروا الوحدة اللى فى الصورة بالكامل بدل ما يقعد يفك دراعات الأشارة.

أسيبكم مع الصور.