ربنا يستر (تجربة سيئة مع ميكانيكي خارج التوكيل)

**Samer_3M** · 06-07-2009 02:23 AM

السادة المحترمين مالكي السيارات الأوبل

أنا عندي سيارة أوبل فيكترا 2000cc موديل 1997 وطول عمري بأعمل لها جميع الصيانات و الاصلاحات باخوان مقار بالدقي مهما تتكلف قليل او كتير

ما حدث معي يوم السبت الموافق 4\7\2009

رحت اخوان مقار لتغيير أويل سيل الكرنك الامامي (أويل سيل طرمبة الزيت) و لأنني ذهبت متأخرا فقالوا لي ما ينفعش دلوقت تعالى يوم الاثنين فلاجل ضيق وقتي رحت اشتريت الأويل سيل من اخوان مقار وقلت سأجرب أركبه برة وكان الناس دائما بيوصفولي واحد في فيصل اسمه (منير - رضا)

و لأنني عندي خبرة كبيرة بالميكانيكا و غاوي و اتعلمت كتير على يد أساتذة(رباية خواجات) الخواجة صدقي نصيف ربنا يعطيه الصحة ( ميانيكي بتاع الأسرة من سنة 1979) مثال للأمانة والشرف و النظافة و الخبرة العريقة

شفت العجب العجاب و عرفت ليه الناس كرهت الأوبل في مصر لما شفت الي اتعمل في عربيتي على يد الدكتور منير و البروفسير رضا

أولا: كسروا وش التقسيمة الداخلي و ما لقيتوش أصلي ( مضطر للصيني ب 150 جنيه) و هما بيحاولوا فك سير الكاتينة

ثانيا : و زي ما اتعلمنا أنه لازم يهوي التروس بتاعت التقسيمة و سير الكاتينة راكب على شان يعرف يهوي المسامير و ده خلع السير و فضل يحاول يهوي المسامير( علما بأن ذلك خطأ أن يلف الكامة العلوية و الكرنك ثابت مهما كان نوع الموتور لأنه بذلك يعرض الصبابات للخطر و بيحمل على السوست و كستبانات الزيت الي في الوش السيلندر) و الكلام ده زي ما اتعلمناه و ربنا ستر

ثالثا : جاء البروفسير رضا يركب الأويل سيل بعد ما طلع عيني و زي ما اتعلمنا انه المفروض يجيب لقمة صلب كبيرة على مقاس داير الأويل سيل و يفضل بشاكوش خفيف يدق سنه سنه على شان ينزل في مكانه عدل

و لكن ده جاب المرزبة(شاكوش ثقيل) وفضل يدق عل الويل سيل نفسه مش مهم ينزل ازاي المهم انه ركب وخلاص و هو كدة و يبقى الزبون يأكل زلط

رابعا : بأخذ رأيه في انه يوجد تعريق زيت من أويل سيل خرطوم تبريد زيت الأوتوماتك الي راكب في الفتيس و مسئول عن نقل الزيت الهيدروليك من الفتيس الى السرابنتينة

يرد يقول ده لازم الخرطومين يتغيروا على شان قدموا و السخونه أكلتهم و ربنا يسترعلى السرابنتينة و احنا بنفك بس انت ماتعلش هم كل قطع الغيار عندنا و بنتصرف( عملي فيلم)

و هي الحكاية زي مانزلت تحت العربية و شفت ان الخراطيم سليمة تماما و الحكاية كلها حتت الأستيك الكاوتش الي راكب على اللواكير بتاعت الخراطيم(اويل سيل)

خامسا : وقفت و شفت العربيات الأوبل الي واقفة عنده كلها معكوكه و كلبساتها مكسرة و عدمانه العافيه و ده دليل على العنف المفرط ضعف الخبرة في التعامل مع السيارة الأوبل

سادسا و الأهم: كانوا بيقولوا انهم اسطوات كبار باخوان مقار و لما سألت عنهم و كانت المفجأة

منير كان بتاع زوايا مالوش في حاجة خالص و رضا كان ميكانيكي على قده و ما نفعش في مقار

ودفعت المصنعية كاملة و زيادة زي ماطلبوا و كمان بقشيش و كمان ثمن التقسيمة الى كسروها على شان دائما أفتكر الي حصل معايا و أعمل الصح بعد كدة (دائما بنتعلم)

علما بأنني غدا باذن الله ساذهب لاخوان مقار لمراجعة كل الي اتعمل

و لكن أهم الأسباب التي دفعتني لكتابه هذه الواقعة أن أحذر جميع المتعاملين مع مثل هؤلاء لأننا في النهاية نقع ضحايا و هم يستمرون و لا غبار عليهم

و شكرا

___________________________________
برجاء اعطاء الموضوع عنوان يعبر عن المضمون وعدم استخدام عناوين مبهمة
تم تغيير العنوان بواسطتي
مشرف القسم

**dr-mohamed** · 06-07-2009 03:06 AM

والله انت حد محترم وربنا يكرم كل ركاب الاوبل وركاب كل الماركات بواحد زيك يكون فاهم بجد ويقول على الصنايعية اللى عامليلن نفسهم اسطوات وهما شوية عيال واخدين الصنعة بالعافية وفي النهاية يبهدلوا سمعة اي عربية وتلاقيهم بيقلوا لزباينهم اللى مش فاهمين حاجة زيي انهم هما اللى كانوا مشغلين مقار وام الخواجة مقار ذات عن نفسه لا منكن يعمل حاجة ابدا من غير ما يشورهم الاول

**tamertamer** · 06-07-2009 03:16 AM

كلامك صح 100 فى 100 ودة قلى بقولة على طول دور على الصنيعى قبل قطعة الغيار لان التركيب دة فن وتشغيل مخ واغلبية الصنيعية من كتر الهباب قلى بيشربوة دمغهم مبتشتغلش خالص ربنا يكون فى عونك ومتجبش وش التقسيمة صينى لانى بسمع انة بيسيح وربنا معاك

**ghost** · 07-07-2009 11:19 AM

يا شباب انهرده حتى الصنيعى ياخد اسم احسن الناس و يقوال انا ابنه و هو تييييييييييت
حصل معايه الموضوع فى عربيتى الهيونداى قبل ام ابيعه فتح الماتور اربع مرات
كانت الميه خلصة من الريداتير من و احد صحبى نتيجة قطع فى كوتش المياه و مشى من غير ما يبص على الحراره
على اعتماد ان السياره موديل حديث
نسب نفسه للحج عبيد ملك المرسيدس فى مصر بعد السوئل عنه و جدا ان اساسن الراجل لم يتزوج خالص و كان الصنيعى الفاشل عنده لكن احاجه الكويس فيه تجميع الفتيس فقط لا غير بتاع الانسر الاتومتك لكن غير كده هو تيييييييييييييت على اما تفرج و ربنا يستر على العربيات و اصحاب العربيات من الفهلوى و النصاب يخدو فلوس و خلاص و يقعد يعدل فى العربيه على اساس ان الخواجه ده عبيط و كل ده زيادات لا غير

**Ashraf_Ashraf** · 07-07-2009 11:28 AM

دا الطبيعى الفهلوه وزبون يعدى ويجى غيره
النهارده معدش فى صبيان اصلا بتتعلم زى زمان الاسطى كان ينضرب علشان يتعلم ويطلع استاذ الكلام ده راح
كل واحد معاه قرشين جاب عده وبقى اسطى ومتعرفش تكلمه وهو لمواخده حمار مايفهمش
مشكله اعتقد مع العربيات الجديده ومع الالكترونيات الحديثه هتزداد سوء وربنا يستر