السيارة: سوزوكي سويفت ٩٤ (معانا من الزيرو)
السائقين: انا ووالدي فقط !
الحدث: تغيير الزيت من شهر بالضبط.
المشكلة:
سافرت من إسبوع لرأس غارب صدة ردة = ٤٦٠ توتال
تاني يوم الإسماعيلية صدة ردة = ١٦٠ توتال

٦٢٠ كم كله على بعض...

بدون أي مشاكل ولا حاجة
تالت يوم سافرت من غيرها ولقيت والدي بيكلمني العصر بيقوللي:
هو: العربية سخنت منك في السفر؟
انا :لأ... هي عمرها سخنت أصلا؟ داحنا بنغير المية من السنة للسنة وبتكون مانقصتش!
هو: طب شفت المية إمتى آخر مرة؟
انا: من إسبوعين ... ليه؟
هو: النهاردة الصبح كنت رايح مشوار سمعت دبة جامدة في الموتور... ركنت وسمعت كويس مالقيتش حاجة... كمان شوية سمعتها تاني.. فتحت الكبوت سمعت المية بتبقلل وبتغلي... فتحت لقيتها نشفت... طلعت مقياس الزيت... ولاااا نقطة زييييتتتت في الموتور... هاتجنن... كلمت الميكانيكي جالي بزيت ومية... حطينا الزيت، دورت... زودت مية... كله تمام... الموتور سليم تماما...!!! مافوتش !

المشكلة إننا مش فاهمين دة حصل إزاي...
لغاية دلوقتي ولا نقطة مية أو زيت نقصت... يعني مافيش أخرام. والبوجيهات مش معرقة زيت ولاحاجة...
كل الناس بتسمع مابتصدقش لكن إللي هايتجنن بجد (غيري انا ووالدي طبعا) هو الميكانيكي اللي جاب الزيت والمية ... كان جاي متوقع هايحل موتور و أفلام بناء على المعطيات اللي سمعها في التليفون...
إحنا عارفين ان أكيد دة ستر من ربنا... لكن إيه في السيارات اللي ممكن يعمل كدة؟ ساعدوني يا عمالقة الميكانيكا بالمنتدى... علما بأن الزيت اللي نشف دة كان إسسو من الغالي...