الموضوع: يارس ولا جين 2

المشاركة الأصلية كتبت بواسطة abohalmos

ازيك يا توت ؟؟؟؟
انا متابع الموضوع بشغف جدا
و بصراحة ارائك عاجبانى ....و فعلا واضح انك بتفهم اوى ما شاء الله و ارائك عادلة
و بدون تحيز لجين 2 بالذات او لغيرها
و انا كان ليا سؤال عند حضرتك
انا محتار بين سيريون 1300 مانيوال ...و ياريس 1300
و عاجبينى الاتنين دول قوى ....انا طبيب و مشاويرى صغيرة ......و عندى اسرة من زوجة و امى و طفلة و مولود قريب باذن الله . و سواقتى هادية جدا .....و السفر ممكن لو مرة فى الشهر ... وانا فى الصعيد
فى رأيك انهو احسن فيهم ليا .....مع ملاحظة انه انت عارف موضوع الطبيب ده لازم تكون عربيته شكلها ....يعنى زى مانتا فاهم ......عشان الشغل و كده ؟؟؟؟ و دى متوفرة فى الياريس
انما بصراحة سعرها هاف اوبشن (87 الف ) بدون سنتر و لا زجاج كهربا و الفول اوبشن (93 الف ) ....يعنى فرق السعر حوالى 7 الاف جنيه .....يعنى حاجة تخنق ....لانى هاقسط ......فالمبلغ ده يوصل حوالى 10 الاف بالقسط ....
انا الحمد لله دخلى كويس .....بس مش بحب حد يستغلنى ....فمش عارف انا محتار اوى ....
السيريون انا عارفها كويس و دخلت فى منتدى دايهاتسو كتير و كل الناس بيشكروا فيها بس موضوع الهاتشباك و صغر الشنطة شوية .........و كمان ناس بتقول لازم تشترى عربية يكون ليها كبوت عشان الحوادث لا قدر الله .....و اقعد افهم فيهم انه السيريون واخدة 4 نجوم فى اختبار الامان الاوربى ....؟؟؟؟؟
الياريس ...شكلها حلو برضه و رسمة للدكتور و كويسة للعيلة برضه ...بس اللى خانقنى موضوع انى ادفع 87 الف و ازاز منافلة ......فالواحد هاياخد تريقة للصبح .....و لو جبت الفول اوبشن هاتدبس فى 10 الاف زيادة .....
رأيك ايه يا عم توت ...........لو مكانى تعمل ايه ؟؟؟؟؟
وانا كونت بفكر اعمل موضوع عن المقارنة دى فى قسم المقارنات ........بس للاسف معنديش الخبرة دى
وا انا شايف انك حد فاهم اوى و اعتز برأيك جدا

يا باشا ألف شكر على الكلام الجميل ....... و أنا أتشرف أن حضرتك مُعجب برأيي و بتأخد رأيي ..... و أنا تحت امرك .

هو الفرق بين العربيتين فنيا ..... يُعتبر زيرو ..... يعني أنا مش شايف فرق فني و الاثنين ممتازين .
و لكن يعيب الياريس ثمنها المبالغ فيه .......
العربية لو ثمنها كدا خارج مصر .......... كان الواحد يشيريها و حاسس أن ده ثمن عادل .......
إنما العربية فعلا برة مصر بثمن السيريون ......... و أنا شايف أن توكيل تويوتا مستغل أسم تويوتا أسوء أستغلال في موضوع التسعير ( ده رأي شخصي بحت ) .

و أنت مش عاجبك الهاتش باك و فعلا ثقافة الهاتش باك في مصر ضعيفة خصوصا في الأقاليم اللي غالب عليها العربيات الكبيرة علشان الوجاهة الأجتماعية و الفشخرة .

و برضه أنا شايف أنك مستغليها زيي ......... و في نفس الوقت الميزانية مش سامحة أنك تشتريها كمان لأنك هاتدفع مبلغ أكبر علشان شوية كماليات موجودة في أي عربية في السوق !!!!!!!!!! .

فأيه رأيك أرشحلك عربية بعيدة عن الأثنين ؟؟؟؟؟؟؟؟؟؟

لو لسة متمسك بالمقارنة بين الأثنين دول بس ..........
شوف أيه المناسب ليك و اللي فعلا يستاهل ثمنه ........ و أدفعه .
لأن السيريون وضاح أنها مش مناسبة علشان موضوع الهاتش باك ...... بس أنا لو مكانك و بفكر فيها ....... و لا يهمني من موضوع الناس و المحتمع ده .......... بكبر دماغي ........ أهم حاجة أعمل اللي أنا عايزة و مش بيأذي حد ........ يبقى خلاص ....... محدش لي عندي حاجة ...
فمتربطش نفسك بأختيار معين علشان خاطر المجتمع !!!!!! و نظرة المجتمع عمرها ما هاتتغير إلا بناس زينا يبدأوا حملة التغيير الفكري و العملي ........

لذلك إذا كنت معجب بالسيريون و مستعد تركبها و تكون متميز بعربية حلوة ........ز أشتريها .

لو لسة عايز عربية منظر و سيدان و موتور موفر و عربية محترمة جدا .......
أنا أرشحلك و بكل قوة ............. الكيا ريو ........ عيبها الوحيد ( سوق اعادة بيعها مش عالي زي السيريون بالظبط ) بعكس الياريس في النقطة دي أحسن منهم .

و أدي الكيا ريو ............... و قولي رأيك يا باشا ........

[img2]http://www.autospectator.com/uploads/Kia/2007/Rio/07KiaRio.jpg[/img2]

و إن شاء الله أحنا معاك لغاية ما تشتري عربية حلوة و محترمة ...... و تريحك نفسيا و فنيا و ميكانيكيا .

أخوك توت .......

ملحوظة :
المقارنة دي أنا شايف أنها برضه تنفع لصاحب الموضوع و أنا كنت ناوي أفتح موضوع منفصل لأخي الكريم الدكتور أبو حلموس ....... بس قلت ....... أخونا kojyad صاحب الموضوع ممكن يستفيد بالآراء اللي هاتتقال مني و من غيري من الزملاء الأفاضل .

أنا رأيى الجين تو عيبها موضوع التقفيل فقط ولكن العيوب اللى فيها عيوب بسيطه بتتعالج فى الصيانات الأولى و بتكون عيوب بعيده عن الموتور (بتكون عاده فى الكماليات) يعنى العربيه مش حتعطل بيك يعنى

الناس متخيله أن العربيات البروتون كلها معيوبه وده مش صحيح لأن فى عربيات كتير ماكنش فيها عيوب تقفيل

ملاك العربيه ده بيحبوها جدا و مبسوطين بيها

أنا معايا جين تو و سوقت عربيات كتير فى الأسره (كورولا - أفيو - لانسر 1300) و فى الشغل (صنى و أوكتافيا) صدقنى مش شايف أن فى فرق مستاهل فى أى حاجه يخلينى أدفع فرق الثمن بين الجين تو و أى عربيه, لأنها من الأخر فيها كل حاجه

على فكره:
فتيس الجين تو الأوتوماتيك: F4A41 و ده ماركه ميتسوبيشى وكان بيركب فى اللانسر الشكل القديم
كومبريسور التكييف: ساندن يابانى و ده كومبريسور مشهود ليه بالكفائه
منظومة فرامل ال ABS & EBD: دى من أولها لأخرها ماركه BOSCH المانى شامل الكونترول يونيت وال ماستر و تيل الفرامل
و أخيرا الموتور: تصميم شركه لوتس الأنجليزيه

ضيف على كده عوامل الأمان و الثبات و الصاج

مش شايف ميزه فى الياريس غير أنها يابانى و تقفيلها أحسن, غير كده الجين تكسب فى كل حاجه

المشاركة الأصلية كتبت بواسطة أبومريم

ياريت تقولنا على ال 100 مصيبة الي حصلت معاك في الجين 2

هقلك طبعا عليهم كلهم.. و بالمناسبة انا كنت عامل موضوع هنا في المنتدي من حوالي سنة عشان كنت ببيع الجين تو بتاعتي. و بعدين البشمهندس توت حضرتك داخل فيا شمال اوي اوي اوي كدة لية؟! دمك محروق اوي اوي اوي كدة لية؟! انت مبسوط بيها دي حاجة جميلة و ربنا يزيدها بركة انا بقول رأيي و كل واحد حر في رأية و بعدين انا يعني مش هألف حاجة عشان مفيش مصلحة يعني في كدة!
مبدئيا العربية مليانة عيوب رهيبة في التقفيل و طريقتة و جودة الخامات المستخدمة في التقفيل..
عربيتي كانت لونها نحاسي موديل 2008 و كانت زيرو.. المهم يعني تاني يوم رايح ارخص في المرور فا عديت علي البنزينة عشان احط بنزين, المهم تنك البنزين فتح و مش عايز يقفل! العربية كانت مليانة فروقات كتيرة في الشنطة و من عند الفوانيس الخلفية و الكبوت. (الكبوت عملتة بالرجلاش) بس باقي الفروقات انسي! العربية كانت صفاحة بنزين و مع العلم انا مش بقرص ولا بحرق عليها ولا بجري.. و مشاويري كانت علي القد اوي.. دة انا اوقات كنت بعمل مصروف خاص للبنزين! المالتي فانكشن كان بيهيس بمعني تيجي توطي الصوت يروح معلي و حدرتكم ركيبة جين تو و اكيد واجهتكم المشكلة دي.. فا دايما كنت بجري علي التوكيل و قال اية الصيانة الجاية هنجبها من ماليزيا عشان هي مش عندنا! المرايات الجانبية بتاعتها مش بتجيب في الغالب الزاوية الأخيرة اللي في الأخر, لدرجة شكيت في نفسي مع ان دي مش اول ولا تاني عربية اركبها.. المهم يعني سألت اكتر من شخص علي موضوع المرايات دة و قلي نفس المشكلة مراياتها متعبة جدا! الفرامل بتاعتها رديئة و لازم تدوس لتحت خاااااااااااااااااااالص, فيها حتة بوش كبيرة و محترمة! دة غير بقي المشاكل الصغيرة اللي زي مثلا حتة البلاستيك اللي علي فرملة اليد دايما تقع و مرة قفلت الباب عادي فا السنتر باز و العربية مكنتش عايزة تتقفل! و كانت ليلة زرقاء! دايما العربية اول ما جبتها و طول ما انا ماشي بيها كنت بسمع صوت جي من الكنبة زي حكة او حتة حديدة بتحك في حديدة تانية, فا رحت التوكيل و قال اية بيفكوا الكنبة و بيحطوا تحتيها حتة كرتون و بيقفلوها تاني! دي حاجة تضحك! دي لو العربية دي متقفلة تحت الكوبري هتطلع احسن من كدة! انا دافع مبلغ كبير عشان ارتاح في عربية مش تجنني! انا عموما دي المشاكل اللي واجهتني فيها.. و بعدين يا جماعة احنا مش داخلين حرب ولا هي اهلي و زمالك عشان الناس اللي جاية تمسك في زمارة رقبتي! احنا هنتخانق مع بعض؟ دي مش طريقة مناقشة! انا بقول حاجات واقعية حصلت ليا مش اكتر ولا اقل و ربنا يبركلكم في الجين تو بتاعتكم! و ميرسي جدا ليكم و فرصة سعيدة!