عملت طقم الشنبر اخيراً مع ان العربية ماكنتش محتاجاه دلوقتي كل اللي كان عندي نقص في زيت الموتور بس مش اكتر من كده لكن سحب وجري لغاية 150 كم بدون اي تاثير على الموتور وماكنش في دخنة لا بيضا ولا سودا بس كبس الموتور كان بين 58: 62 %
المهم واحد صاحبي قال لي نشوف فيها ايه روحت لميكانيكي قال لي ده كاوتش صباب والموضوع هياخد يوم ونص قلت حلو اوي بعد ما فك الوش لقينا بستم بيلؤ خفيف جدا جوا السلندر قال لي دي كده هتحتاج طقم شنبر – بيني وبينكم انا لو كنت اعرف من قبل ما يفك انه طقم شنبر ماكنتش هعمله كنت همشي بزيت شنبر لغاية الشتا وابقى اعمله في الشتا زي ما عبده قال لي – لكن قدر الله وماشاء فعل المهم الراجل غير طقم الشنبر وراح يخرط الصبابات قال لي في صباب مش هينفع تخرطه فهنحتاج نغيره وقال لي انه جاب صباب جديد وفك البوابة والايدل ونضفهم والشغلانة خدت منه 3 ايام ً لما رحت استلم منه العربية لقيت فيها حاجة مضيقاني جداً
العربية بتفصل اول مارفع رجلي من الدبرياج سألته قال لي انه ماجاش جنب الدبرياج خالص قولتلة العربية في الاول كنت ارفع رجلي من الدبرياج العربية بتجري (كنت ممكن اوصل مشوار صغير 1كم من غير مادوس على البنزين خالص) لكن دلوقتي اديها سنة بنزين وماتجمعش على الاول الا بعد شوية وكذلك في التاني ولما اجي اديها مارشدير احس كانها هتبطل ولما اركن على المطلع اللي تحت البيت تبطل برضه وهي على الاول كاني مديها غيار بدري لكن من الثالث للخامس زي الفل قال لي لين الاول 1000 كم وبعد كده نشوف اللي انت عاوزه نعمله ونغير البوجيهات والسلوك وفلتر الهوا والبنزين
رحت قيست كبس الموتور بعد ماطلعت من عنده لاقيته 3 بساتم 77% وبستم 69% (البستم الثالث)
كنت في مشوار في فيصل قولت اعدي على عبده استشيره روحت لعبده العربية ماعرفتش تطلع المطلع بتاع الورشة – عبده كان هيقتلني – قال لي العربية كانت زي الفل انت عملت فيها ايه حكيت له القصه – المهم عبده قعد يديها امبليهات جامده كان بيطلع دخنة سودا من الشكمان على4 او 5 دفعات وفي الاخر فرقعة جامده – قال لي ممكن يكون حساس شكمان او بوجيهات او ارشاشات المهم فك البوجيهات لاقاها سودا مهببة روحت اشتريت سلوك بوجيهات وبوجيهات جديدة وركبناهم قامت العربية اتظبطت تمام وبقت تجمع على الاول والتاني واحس بعزمها اتظبط عبده قال لي المفروض الكلام ده كان اتعمل مع طقم الشنبر مش يستني لما تلين
قال لي عشان نتأكد انه مافيش حاجة تاني تعالى نروح لمحمد السيد نحط العربية على الاسكانر رحت انا وهو لمحمد السيد قال لنا العربية زي الفل حساس الشكمان والرشاشات والrpm وحالة البساتم( او الكبس تقريباً مش عارف ايه بالظبط فيهم) هو قال انها 8 وقال لي كده كويس جداً
عبده قال لي امشي اسبوع كده وتعالى نشوف البوجيهات تاني لو هببت تاني وعملت نفس الحركة هنضطر نفك الوش ونشوف الصبابات اتعمل فيها ايه لان كده هتكون من الصبابات لكن لو البوجيهات سليمة يبقى كده تمام
دلوقتي لما بشيل رجلي من الدبرياج بتجري على الاول لكن مش بنفس السرعة الي كانت قبل كده – امبارح كنت بركن على المطلع اللي قدام البيت عندي بضهر العربية (المطلع جامد ) اديتها سنة بنزين مع العلم الاول كانت بتطلعه من غير بنزين ارفع رجلي سنة زياده بس الاقيها طلعت المطلع ده
ممكن يكون الميكانيكي عمل حاجة غلط في الصبابات فعلاً ؟ هــ:hang: