هاحكي لكم موقف حصل لي داخل نفق الأزهر علشان تاخدوا بالكم
في يوم الصبح كنت جاي من مصر الجديدة لوسط البلد علشان اصرف شيكات كنت راكب العربي الفيورا 127 وحاطط شيكين في ظرف والظرف على التابلوه تحت علبة المناديل امام الكرسي اللي بجوار السائق وانا كنت لوحدي في العربية وفاتح الشباك اللي جنبي واللى جنب الكرسي اللي جنبي
المهم دخلت النفق من اتجاة صلاح سالم وقرب انتهاء النفق وفي احدي المنحنيات العربيات هدت لحد ما النفق وقف تماما وفي لحظة لقيت دوامة هواء داخل العربية طيرت علبة المناديل ولاقيت الظرف طاير خارج العربية
انا اتجننت وسبت العربية دايرة وسط النفق ونزلت ادور على الظرف. كان فيه هواء شديد جدا داخل النفق ومش عارف اتجاه الهواء رايح ولا راجع المهم رجعت حاولي 100 متر للخلف وعمال اسأل الناس محدش شاف ظرف طاير والناس فاكرانى ؟؟؟؟ المهم مالقتش حاجة رجعت العربية وقلت يمكن الظرف طار للأمام ومشيت بالعربية مالقتش حاجة برضه لاقيت رصيف داخل لجوة في النفق قمت راكن فية ونزلت ادور تاني برضة مالقتش حاجة
رجعت العربية وانا موش عارف اعمل ايه وبفكر لو حد لقي الشيكات وراح صرفها ومعرفش ايه اللى خلاني افتح الباب اللى بجوار كرسي السائق واذا بالشيكات بدون الظرف محشورين بين الكرسي اللي بجوار السائق و الباب. طبعا انا طرت من الفرحة ومابقتش عارف هما جم هنا ازاي وازاي اصلا خرجوا من الظرف وحمدت ربنا وشكرته
خلاصة الموضوع لو داخل نفق الأزهر اقفل الشبابيك أو متحطش حاجة مهمة داخل العربية