قالك سياحة داخلية!! غطيني يا أم خوفو و صوتي!!
و الله لو كانوا الفراعنة يعرفوا اللي بيحصل في الأهرامات دلوقت ما كانوا بنوها وكان خوفو ضرب أي حاجة و مات overdose وريح نفسه، المفروض أن تكون زيارة الهرم جميلة و سلسة فمنها زيارة لأجدادك و منها تنشيط لسياحة بلدك الداخلية و واجب وطني بدلاَ من الذهاب لأماكن يذهب ربحها لمؤسسات أجنبية .. ولكن ليه تنبسط لو ممكن نطلع عينيك !؟ .. أول حاجة بمجرد ما تعدل نفسك من الرماية علي دخلة الأهرامات .. سيفاجأك أشخاص إنتحاريون يعملون في مجال الخيل و التنظيم الخاص لزيارة الهرم لن يتوانوا عن إنهم يعملوا أي حاجة عشان يوقفوك .. أول خدعة سيوهموك إنهم تبع إدارة الهرم و يقولولك "تذااااكر تذاكر".. تاني خدعة هيقولك "ركنة الملاكي هنا خش خش" في إشارة لمدخل الإسطبل بتاعه و طبعاَ لو أول مرة تروح و متعرفش و دخلت فاكر إن ده الجراج يا ويلك يا سواد ليلك !! اما إذا إنت ناصح و عرفت تفلت من أول خدعتين هيقف قدام العربية و يرمي نفسه و لن يفلح معه غير إنك تخبطه بالعربية بالمعني الحرفي للكلمة عشان يبعد ! دخلنا الهرم وعدينا البوابة الحمد لله و وقفنا في نقطة التفتيش ... دي إجراءات أمن و مفيهاش حاجة بس ليه نظرة حرامي الغسيل اللي بينظرها أفراد الشرطة !؟ لماذا لا يتم التعامل معك كمواطن شريف رايح يتفرج علي أثار بلده .. فللوهلة الأولي أشعرني الشخص اللي وقفني إني متبلغ عني إني مهرب سلاح ولا حاجة! المهم تم تفتيش العربية و ركنت و قطعنا التذاكر و كله تمام .. و إحنا عالباب .. إيه ده ستاند كاميرا ؟ ده له تذكرة !! قلتله الكاميرا نفسها ملهاش تذكرة .. و الحامل له تذكرة !!؟؟ قاللي أيوة يا أستاذ .. بعشرين جنيه .. قلت طيب ماشي قاللي بس يعني لو قدرتنا ممكن نعمل معاك واجب! .. رحت قطعت تذكرة أكرملي .. دخلت .. و انا بعدي من بوابة كشف المعادن .. طلعت الموبايل و المفاتيح و الذي منه .. و كان معاهم كام جنيه معدن .. بمجرد ما حطيتهم برة الجهاز موظف الأمن حط إيده عليهم و قاللي "إيه يا باشا مفيش حاجة علينا كدة ؟؟" .. فمديت إيدي أخد فلوسي و لقيته إحتجز إتنين جنيه بصوابعه و بيقول "طب يعني صبح علينا!" و المرة دي سبتهم و مشيت مش إستسلام و لكن من هول الصدمة و انا مش مصدق اللي بيحصل أكني داخل وكر أبو دومة مش الأهرامات! أول ما حطيت رجلي عالرملة و دخلت لقيت واحد لابس جلابية و عمة و ماسك حصان بيقولي "الباشا مصري! والله حبايب قلبنا و ولاد بلدنا ... الركوبة من هنا لحد أبو الهول و البانوراما بمية جنيه بس عشان خاطرك ب 80 جنيه و عشان إنت إبن بلدنا هحسبهالك ب 60 مع إن والله ما بطلع الفرسة دي بأقل من 50 لأي حد!" لسة هقوله مش عايز حصاا ... قاللي يا أستاذ ده عشان خاطرك و الله هو انا ليا بركة إلا إنت؟! هات 35 جنيه وحلال عليك الرحلة .. المهم أخد خمسة و عشرين جنيه و أكدلي إن السعر ده معزة شخصية منه ليا بسبب أخلاقي و ذوقي ذائعي الصيت! من خلال بحثي علي النت في جغرافيا المكان عرفت إن كان فيه مقبرة معينة لأحدي الملكات و ممكن تنزلها .. فقلتله وديني المقبرة اللي عند إستراحة الملك .. قاللي مفيش مقبرة هنا .. مفيش إلا مراكب الشمس في الحتة دي و إستراحة ال.... قلتله يا عم إزاي مفيش مقبرة .. قاللي يا باشا مفيش انا مش عارف إنت بتتكلم عن إيه .. المهم قفشت وقلتله يا توديني يا هات فلوسي وأمشي .. أتاري إيه بقي؟ البهوات بتوع الأحصنة هناك مقسمين الهرم مناطق .. كل واحد له منطقة يشتغل فيها ولا يتعدي علي منطقة غيره .. لذلك لو أثار موجودة خارج المربع بتاعه فذلك يلغي وجودها من الأساس! مفيش أثار موجودة غير في المنطقة بتاعته غير كدة الفراعنة معملوش حاجة ! رحنا عند المقبرة .. حبيت أدخلها .. البيه اللي واقف عالباب شاورلي علي لوحة "ممنوع دخول الكاميرات" بإبتسامة من الودن للودن .. و قاللي بس عشان إنت إبن بلدنا هنسيبك يا عم تصور اللي إنت عايزه بس "قدرنا" برضه! كأني داخل أصور مقبرة خالته مثلاَ ..كملت الجولة وتوقفت في النهاية عند "أفا" أبو الهول بالحصان بعدما سمعت صوت بيقول "قدها و قدود يا بطل هتقدر عليها أيوة يا سلطان إطلع!" في محاولة منه لتحفيز حماره المسكين في مطلع رملي مخليه يطلع في الروح .. و ما أن وصل إلينا قام مطلع إزازتين بيبسي معرفش منين و نبهني إن حماره "سلطان الغرام" بعافية شوية اليومين إنما العادي بتاعه بياخد المطلع ده عالرابع ! المنظر من عند أفا أبو الهول يجعلك تري ما يراه أبو الهول .. و هو منظر للقاهرة بزحامها وعشوائياتها و كركبتها وعدم تناسق مبانيها .. للأسف قعدة أبو الهول مش مطلة علي أي حاجة كويسة في القاهرة ! لذلك أتساءل لو كان يعلم منذ ثلاثة ألاف عام إنه بدل من أن يطل علي الأهرامات فقط ليحرسها فسيطل معها علي العشوائيات و الفوضي وإنعدام الجمال و الذوق و سيكون الدخول إليه بهذا النظام .. تفتكروا كان وافق علي شغلانة حارس الأهرامات دي!؟ أشك ! وقالك سياحة داخلية!
