عرض للطباعة
نويت باذن الله شراء سياره مستعمله فى حدود 30-35 الف وكتير من الناس نصحونى فى الاكسيل فياريت اعرف ايه رأيكم فيها وتقييم المتعاملين مع هيونداى لانها هتكون اول عربيه اشتريها باذن الله . والمواصفات اللى محتاجها هى تكون بتكييف وثابته على الطريق وصيانتها غير مكلفه ومشاكلها مش كتير
فايه رايكم ياجماعه وايه افضل الموديلات وايه اهم حاجات اخد بالى منها وياريت الاسعار
انا مقدرش افيدك كتير بس اللى ااكده ليك ان فعلا احسن اختيار فى الفئة السعرية من 30 الى 35 هى الاكسيل ولو عايز نصيحتى حاول تدور على الاكسل الهاتشباك موديل 96 او 97 لانها تقفيل كورى 100 فى 100 وكانت نازلة انجكشن حتى ال 1300 منها كان انجكشن و بتستحمل وعندنا واحدة موديل 96 وعاملى لغاية دلوقتى حوالى 200 الف وشوية وعمرها ما اشتكت ولا احنا اشتاكينا
اهم حاجة وانت بتشترى خد معاك ميكانيكى شاطر خليه يفليهالك واديله اللى هو عايزه ما تبخلش عشان ماطعيتش
افهم منك ان السيدان مش تقفيل كورى ؟؟
الناس رشحتلى الاكسل علشان تقفيل كورى
زود الميزانيه شويه وهات اكسيل 1500 علشان ال1300 لما بتشغل التكييف فيها العربيه بتتكسح
وسيبك من حكاية المصرى والكورى لان غبور كان بيقفلها كويس زمان فى التسعينات مش زى الهبل بتاع دلوقتى
فعلا ال 1500 احسن بكثير من ال 1300 بس محتاج تزود الميزانية شوية
و خلى بالك و انت بتشترى و تبص فى الحوض كويس لانها بيبقى فيها شروخ زى بتاعت ال 128
الكوري كان اخرة 94 وممكن تلاقي عربية 1300 كوري موديل 93 او 94 اغلى من الـ1500 المصري، المهم تكشف على العربية كويس قبل الشراء.اقتباس:
افهم منك ان السيدان مش تقفيل كورى ؟؟
الناس رشحتلى الاكسل علشان تقفيل كورى
فعلا زى ما الاستاذ نادر بيئول الكورى اخره 94 وبعد كده اتجمعت فى مصر لكن الهاتشباك لم يكن لها خط انتاج فى مصر وكانوا بيتوردوها من بره عشان كده مش موجودة كتير
الهونداي كوري لحد 94 بس عموما 1500 احسن من 1300 بكتير حتي لو مصري لو عاوز تجيب بنفس السعر تقريبا ممكن تجيب سويفت احسن من الاكسيل من ناحيه الموتور والثبات لكن عموما الاتنين صاجهم ضعيف
على فكرة يا جماعة أنا لما كنت بدور على عربية كان أول اختيار ليه بناء على نصائح ناس كثير أوي كانت الاكسيل وفعلاً دورت كثير وشفت كثير منها ووجدت أن فيه موديلات 96 تقفيل كوري وفيه منها تقفيل مصري برده يعني الكوري نزل منها لحد 96. وفعلاً الملحوظة اللي قالها الأخ ihab مضبوطة تخللي بالك كويس وتبص في الحوض بتاعها وخصوصاً عند الكارتيرة يمين السيارة لأن بيبقى فيها شرخ في معظم العربيات. طبعاً بالإضافة للكلام اللي قاله الأخوة الكرام أن 1500 أفضل من 1300 بكثير، وربنا يوفقك.
السلام عليكم ورحمة الله وبركاته ،
أنا معروض على سيارة اكسيل موديل 96 1300 CC بكل الكماليات ، وحالتها كويسة وبسعر 34000 الف جنيه وممكن تنزل ، هل أشتريها ؟
وهل الفرق بين الاكسيل 1500 و1300 كبير للدرجة التى تجعلنى لاأشترى ال1300 .
مع العلم أننى لاأشغل التكييف الا فى شهرين الصيف فى السنة ، وفى الشتاء لاأحب التكييف الساخن .
أرجو الرد من الاخوة أصحاب الخبرة .
عربية ناعمة علي الطريق كماليانة حلوة علي سعرها تكيف - باور - 4 زجاج كهرباء - اريال كهرباء - فتح الشنطة كهرباء -
شنطة واسعة - تابلوة معقول -
عيوبها
صاج خفيف
خفيفة علي الارض ( بلاش تعدي 100 )
:lol:
شكرا على الرد
ولكن سؤالى بالتحديد أنه أمامى سيارة 1300 CC بحالة جيدة وبسعر معقول ، هل أتوكل على الله وأشتريها ولا أنتظر (وأنا تعبت من طول الانتظار حتى أجد سيارة 1500 CC) ، مع العلم أننى لاأستعمل التكييف الا قليلا ، أى أن الموتور لن يتأثر كثيرا بتشغيل التكييف .
أرجو افادتى ، وشكرا مقدما . [smilie=mylove.gif]
المفروض ان ال GLS مافيش منها 1300 سي سي، 1500 بساقتباس:
المشاركة الأصلية كتبت بواسطة AYMAN4PLUS
كلامك سليم ، أعتقد أننى نسيت وذكرت ان بها جميع الكماليات ، لاننى سوف أعاين السيارة على الطبيعة غدا ان شاء الله ، ولكن حسب كلام الصديق الذى سيحضر لى السيارة أخبرنى أن السيارة بها تكييف ، ولكن بالنسبة الى باقى الكماليات بالتأكيد ليس كلها متوافرة لان السيارة ليست GLS .
مازال السؤال فى انتظار الاجابة عليه : هل اذا كانت السيارة 1300 CC بحالة جيدة وبسعر معقول ، هل أتوكل على الله وأشتريها ولا أنتظر (وأنا تعبت من طول الانتظار حتى أجد سيارة 1500 CC) ، مع العلم أننى لاأستعمل التكييف الا قليلا ، أى أن الموتور لن يتأثر كثيرا بتشغيل التكييف .
أخيرا هل سعر 34000 جنيها مناسب لهذه السيارة .
أرجو الرد من أصحاب الخبرة بالسيارة .
وشكرا مقدما .
نصيحة من اخ لو حدودك متسمحش تزود 3 او 3.5 الف تانى يبقى هات ال 1300 ولكن لو تسمح حدودك بكدة او ممكن تصبر شوية يبقى تجيب 1500 احسن انت مش كل يوم هتشترى عربية
الفرق فى السحب بين 1300 و ال 1500 هتحس بية الى حد ما كمان لو محمل العربية نفرين ولا ثلاثة يفرق معلك جامد وكمان التكيف فى شهرين الصيف . كمان مشاكل 1300 كتير شوية غير الانجكشن فى 1500 هيوفر معاك فى الينزين
انا كنت محتار زيك كدة بالضبط لما جيت اشترى بين 1300 و 1500 ولكن صبرت شوية وجبت اكسنت 1500 فى الاخر.
والامر يرجع ل لله ورايك وربنا يوفقك
+1اقتباس:
المشاركة الأصلية كتبت بواسطة moudy2002
شكرا للاخوة الاعزاء على الرد ،
الحقيقة أنا ظروفى تسمح أن أزود المبلغ شوية ، ولكن مشكلتى انى بقالى شهرين مستنى العربية المعجزة اللى مش عايزة تيجى ، وعشان كده لما ظهرت عربية قدامى الاكسيل 1300 ، عملت زى الغرقان اللى ما صدق ولقى قشة يتشعلق فيها ، لاننى فعلا مبتهدل فى ذهابى وايابى من العمل حيث أننى أسكن بمدينة جديدة ولازم أنزل كل يوم البلد قاطعا مسافة لاتقل عن 35 كيلو متر فى الفردة الواحدة ، وبدأت أشعر بنوع من الحزن عند ذهابى وايابى من العمل بسبب سوء حالة المواصلات فى بلادنا .
أنا موافق على رأيكم ، ولكننى لى استفسار بسيط :
أيهما أفضل من ناحية كفاءة أداء السيارة الاكسيل أم الاكسنت ، طبعا أنا أتكلم عن السيارة 1500 CC.
وشكرا مقدما على الرد .
بالنسبة للموتور فالاكسيل افضل لان موتورها موتور ياباني "متسوبيشي" معدل من هيونداي اما الاكسنت فموتورها كان من بدايات اعتماد هيونداى على نفسها "كوري".
بالنسبة للصاج الاتنين "زفت" ورق يعني قطع الغيار الاكسيل ارخص بشكل عام ويعتبر شكل الاكسنت اكثر حداثة من الاكسيل.